קרעמער אויף טוויטער האט געשריבן:אין ליכט פון "כינוס כלל ישראל" איז מעגליך אז איך וועל גענצליך אויפגעבן דעם אינטערנעט. קיין אפריל דער ערשטער וויץ. ערנסטע געשעפטן. השם יעזור.
דערנאך איז זיין טוויטער קאנטע אויך אויסגעמעקט געווארן. פארשוואונדען וואו אין וואסער אריין, מיט אירע הונדערטע טוויטס. היינט האב איך שוין געזען אן אשכול אין אייוועלט ווי קרעמער ווערט באוויינט און מוספד. די אחראים און מנהלים פון אייוועלט האבן דערווייל אנגענומען א שטילשווייגעניש איבערן גאנצן מעשה, אבער איך גלייב אז גאר בקרוב גייט מען אדער הערן פון קרעמער אז ער שפירט זיך פשוט נישט אזוי אמבעסטען, אדער אז ער געזעגנט זיך פון אייוועלט בדמעות שליש.
וואס זאגט דאס פאָר פאַר אייוועלט? זייענדיג דער גרעסטער שרייבער אין אייוועלט, וועט זיין פארלוסט שטארק געשפירט ווערן. ווי זאגט יענער? "אייוועלט איז אויס וועלט". אנדערע זאגן אז דאס וועט בכלל נישט שאטן, אייוועלט פארט שוין היינט צו טאגס אויף די אייגענע רעלסן, ס'דארף נישט קיינעם'ס הילף. וואס איז דער אמת? ימים ידברו.
