העי, דו ווערסט ווייַס! וואס גייט פאר?

[חנניה זרח שטיגליץ]

אנטשולדיגט, וואס ווילט איר פון מיר?!?
צום דריטן מאל אין בערך צוויי דריי וואכן וואס "חברים" וואס מיינען זיכער נאר מיין גוטס האבן געשטעלט פאר מיר די פראגע ברבים. און גיי שוין, ווען כ'קוק זיך אין מירער זע'ך בכלל נישט קאליר ווייַס. יא א האר דא און דארט טוישט זיך, כ'בין שוין נישט 30. איז וואס?

אידן מיינען קיינמאל נישט שלעכט, מ'האט נישט וואס צו רעדן. דאס ווייסט מען שוין יא, אז ווען מ'טרעפט אן א פרעמד'ן פרעגט מען נישט וויפיל קינדער האט איר? אבער ווען מ'זעהט א חבר נאך א שטיק צייט נישט זען און מ'שרייעט הויעך העי וואס גייט פאר ווערטס מיר ווייַס, הא? סטרעס? דזשאב? צער גידול? טייערע פריינט כ'האב עס אפשר נישט ארויסגעוויזען אבער ס'האט מיר וויי געטון, אפילו ס'איז נישט קיין בושה ווען צוויי דריי הארעלעך ווערן ווייַס, בין איך נישט גרייט געווען אויף אזא פערזענליכע דייעגנאסעס פון דיר ברבים נאך דערצו ווען מ'פארשטייט וואס דאס דארף לכאורה אינדיקירן.

טייערע חבר נעקסט טיים דו זעהסט מיר אין דריי חדשים און זעסט נאך א ווייַס הארעל, שפרינג נישט אויף. מוזט נישט אלץ רעדן, סיג לחכמה שתיקה.

אז איר וועט נישט אויפהערן האב איך מורא אז כ'וועל טאקע ווייַס ווערן.