פרעה זאגט לכו נא הגברים אבער משה זאגט ניין! בבנינו ובבנותינו

[געפילטע פיש]

פרעה זאגט לכו נא הגברים אבער משה זאגט ניין! בבנינו ובבנותינו כי חג ה' לנו

מאז היתה ישראל לעם איז אלעמאל געווען א מלחמה צווישן די צד הקדושה און די סתרא אחרא, ווי די צד הטומאה וויל אפטיילן און מאכן חילוקים ביי כלל ישראל, אפטיילן צווישן מענער און פרויען. די חרטומים שטייען און בעטן זיך ביי פרעה לאז שוין די אידן גיין דינען זייער גאט, שוין גענוג מיט די מכות! אבער שיק נאר די מענער, אזויווי ס'איז די מנהג דא ביי אונז אין מצרים, אז נאר די מענער טוען די ריטואלע געצענדינעריי, די מענער זענען די וואס זענען מקריב קרבנות, שיק שוין די מענער, לאז זיי מקבל זיין זייער תורה, לאז זיי מקריב זיין קרבנות צו זייער מדבר גאט, די פרויען דאגעגן לאז איבער דא אין מצרים, וואס פארשטייען זיי צו דינען א גאט? לאז זיי עוסק זיין אין כמעשה ארץ מצרים, די נשים מסוללות, דאס קענען זיי, און דעטסיט, -שלח את-האנשים, ויעבדו את ה' אלוקיהם.

משה לאזט זיך אבער נישט, און שרייט צוריק בלא! בנערינו ובזקנינו נלך; בבנינו ובבנותינו נלך--כי חג-ה' לנו, לנו פאר אונז אלע, דאס אידישע פאלק שיידט נישט אפ די ריטואלען צווישן די מינים, נאר סיי מענער און סיי פרויען קענען אנקומען צום שטאפעל פון דינען אונזער גאט, אין אונזער בית המקדש וואס מיר גייען אויפשטעלן גייען סיי מענער און סיי פרויען ברענגען קרבנות צוגלייך, חטאת, אשם, תודה, אן קיין אפשייד אפצוטיילן דעם פאלק.

לעצטענס איז אנשטאנען א פירוד ביי כלל ישראל, מ'וויל אפטיילן צווישן די מענער און פרויען, אבער דאס מאל איז עס פארקערט, כאילו חלילה נאר פרויען קענען דינעם דעם באשעפער, און מענער נעמען חלילה די בעק סיט ווען ס'קומט צו עבודת ה'. נאר פרויען קענען זיך פירן בדרך הסלולה לנו מדור דור? נאר פרויען זענען אומשטאנד צו זיין די פאנטרעגער פון אידישע שטאלץ? מיר מענען פארלאנגען גלייכבארעכטיגקייט! מיר ווילן אויך האבן די זכות אז די וועלט'ס פרעניות זאל ווערן אפגעטוהן אין אונזער זכות! מיר ווילן אויך שיצן אויף אונזערע ברודער אין ארץ ישראל פון די רעקעטן! נאר די פרויען קענען צוריק ברענגען די דריי בחורים לעבערידגערהייט מיט זייער ליכט צינדען און קבלות אין צניעות? מיר מענער זענען נישט ווערד דערפאר? איז דאס וואס משה רבינו האט געוואלט ווען ער האט צוריק געשריגן פאר פרעה בבנינו ובנותינו?

על כן, ווילן מיר מענער בעטן אז די מוסדות וואס שיקן אהיים צעטלעך פאר די נשים צדקניות וועגן תקנות אין כל מיני געביטן, גיבט אונז מענער גלייכע רעכטן, און גיבט אונז אויך אפאר שאלות. אט גיבן מיר אייך אפאר פארשלאגען וואס איר קענט פרעגן, גענומען פוענם צעטיל וואס איז לעצטענס ארויסגעקומן פון מוסדות דרבינו יואל.

טאטע'ס מוסד אלס קינד__ ישיבה קטנה___ ישיבה גדולה____ כולל____ וויפיל יאר אין כולל___
אויף וועלכע נומבער שערט זיך די טאטע___ שמש אדער בארבער?___ סקווער בעק___ פריזאר___
שערט איר זיך גענוג אפט?___

וואס איז די קאפ לבוש?___ פלאכע ביבער הוט___ הויכע___ שטאפענע___ טשאלענט טאפ___ דאשיק___ אנדערע___

וואסארא מין גלעזער? אייזערנע__ פלעסטיק דינע___ פלעסטיק דיקע___ לינזען___ האט איר א היתר פון א רב צו האבן לענזעס?___ וועלכע רב?______
גייט איר ווייסע זאקן שבת? ____ אויב יא, נוצט איר בענדליך אדער וועלקראו? ____
(כידוע איז אד"ש שטארק מקפיד אויף בענדליך מ'זאל קענען מקיים זיין א מצוה און בינדען די לינקע פוס ערשט, און די רבי זאגט אלעמאל אז דאס איז בסוד אברהם אבינו, קושר ומתיר וכו')
וואס פאר א רעקל גייט איר? לאנגע___ קרוצע___ דריי פערטל____ ריפסענע____
וועלכע קאליר רעקל? שווארץ____ בלוי____ אנדערע (גרוי\גרין וכדו') ____
נוצט איר דעאדעראנט? יא____ ניין____
אויב יא, שמעקעדיגע? יא____ ניין____
וועלכע קאמפאני____ וועלכע שמעק____
האט איר א היתר פון א רב דאס צו טראגן? ____ וועלכע רב________
גייט איר אין שטוב מיט א הוט? ____ רעקל?
גייט איר אין גאס מיט א הוט? ____ רעקל?
גייט איר אין כולל מיט א הוט? ____ רעקל?
גייט איר אין ארבעט מיט א הוט? ____ רעקל?
גייט איר אין בית מדרש מיט א הוט? ____ רעקל?
גייט ביים שבת סעודה מיט א שטריימל? ____בעקיטשע? ____
זאגט איר נאך דברי תורה ביים שבת סעודה? ____ אויב יא, פון וועלכע ספר? ____
קניפט איר איין די בארד? ____ אויב יא, ווי אזוי? ראבער בענד ____ באבי פין ____ דיפידידו ____ האר ספריי ר"ל ____
ווארט איר אלעמאל זעקס גאנצע שעה צווישן פליישיג און מילכיג? (כידוע די רבי שליט"א איז שטארק מקפיד דערויף, און מיר ערווארטן פון עלטערן אין אונזער מוסדות אויך מקפיד צו זיין און נישט מקיל זיין אין דעם) ____
פארבארגט איר אמאל געלט פאר א צווייטן? ____ האט איר סטאקס אדער באנדס? ____ האט איר א היתר עיסקא? ____ ביי וועלכן רב? ____ פאון נאמבער ____
(כידוע איז דאס א הארבע ענין וואס איז גאר גרינג אונצוקומען צו א דאורייתא)
טראגט איר מיטן עירוב ____ בצינעה? ____ בפרהסיא? ____
גייט איר מיטן אויבערשע קנעפל אפען?____ אינדערהיים ____ אין גאס ____ ארבעט ____
וועלכע קאר דרייווט איר? מעיק ____ מאדעל ____ יאר ____ קאנדישען ____ ליעס אדער געקויפט ____ קאליר ____
ווי אפט נעמט איר עס צו א קאר וואש? ____ וואו ____ פאון נאמבער ____ נאמען פונעם רב המכשיר ____
ביי וועלכע רב זענט איר בודק די חמץ פאר פסח? ____ פאון נאמבער ____ אויב איר נוצט א טעקנישען ווער איז דאס? ____ וועלכע זייף נוצט ער ____

וויפיל אזייגער שטייט איר אויף יעדע טאג? ____
לערענט איר פארן דאווענען? ____ וואס לערענט איר? ____ מיט א חברותא? ____ נאמען ____ פאון נאמבער ____
וועלכע מקוה גייט איר יעדן טאג? ____ ווי לאנג נעמט עס ____ נעמט איר א שויער פארן ____ נאכן ____ טבילה אדער ביידע? ____
פאון נאמבער פונעם רב המכשיר אויפן מקוה ____
וואו דאווענט איר ____ כאפט איר זיך מיט פאר ברכו? ____ נאך ברכו ____ , דאווענט איר שמונה עשרה מיטן ציבור ____
ווען לייגט איר רבינו תם תפילין? ביי חזרת הש"ץ ____ אשרי ובא לציון ____ נאכן דאווענען ____ ביי די ארבעט ____ פאר'ן שקיעה ____

דאס זענען נאר אפאר ביישפילן ווי אזוי מ'קען אריינדרינגען אין אונזער פריוואטע לעבן אזויווי מ'טוט מיט אונזערע חשובע פרויען, וויאזוי מיר גייען אנגעטוהן, וויאזוי מיט פירן זיך מיט דאורייתא'ס און דרבנן'ס, מנהגים און קפידות, ווייל מיר ווילן אויך האבן א חלק אין קיום העולם להשיב את חמתו מעל בני ישראל. לאמיר אלע שרייען צוזאמען, מיר ווילן איקוואליטעט! גענוג מיט די פרויען סופיריאריטעט!