מיין השגחה פרטית געשיכטע

[שלום_זכר]

על ניסיך שבכל יום עמנו... כסדר אין לעבן שטויסן מיר זיך אן אין אפענע השגחה פרטית, וואס הן עס איז א חיזוק באמונה, און הן עס איז אינטערעסאנטע סחורה איבערצודערציילן פאר אנדערע, מיט די נויטיגע Wow עפעקט...

מעשה שהיה כך היה עטליכע טעג צוריק. כ'האב געדארפט מאכן פאספארטן פאר דריי פון מיינע קינדער. דער געזעץ איז אז מען קען נאר מאכן פאספארטן אין דער אנוועזנהייט פון ביידע עלטערן. האב איך געדארפט אויסקלויבן א צייט ווען מיין ווייב תחי' און איך האבן געקענט צוזאמען פארן צום פאספארט אפיס, און אויך האבן מיר געדארפט ארויסנעמען אלע דריי קינדער פון חדר/סקול צו גיין צוזאמען מאכן די פאספארטן.

עס איז נישט געווען גרינג צו מאכן די אראנזשירונגען, דאן האבן מיר זיך געשלעפט מיט'ן טרעין אנצוקומען צום פאספארט אפיס, און ענדליך, באגאסן מיט שווייס פון די דרויסנדיגע היצן, זענען מיר אריין אין דעם בנין. מיר האבן געווארט א שטיק צייט ביז עס איז אנגעקומען אונזער רייע, און דער באאמטער האט אנגעפאנגען איבערצוקוקן אונזערע דאקומענטן, בוירט סערטיפיקעיטס, בילדער, וכו'. נאך 15 מינוט, זאגט דער באאמטער אז איך דארף אים יעצט געבן דריי באזונדערע טשעקס צו באצאלן פאר די דריי פאספארטן. יעדער טשעק דארף זיין אויסגעשריבן פאר $140. עס איז מיר שווארץ געווארן פאר די אויגן. כ'האב געוואוסט אז מ'דארף מיטברענגען די טשעקס, אבער עס איז מיר אינגאנצן ארויס פון קאפ! געוואלד, נאך די אלע אפקומענישן און אראנזשירונגען וועלן מיר דארפן איבערמאכן דעם גאנצן שפיל נאכאמאל.

כ'האב מיך פראבירט צו איינבעטן ביי דעם באאמטער. כ'האב אים געזאגט אז ער זאל פראצעסירן אלע דאקומענטן כדי מיין ווייב און קינדער זאלן נישט דארפן קומען נאכאמאל, און איך וועל קומען דעם נעקסטן טאג מיט די טשעקס. עס איז אבער נישט געווען צו וועמען צו רעדן - אדער ברענג איך אים דריי טשעקס אויפ'ן פלאץ, אדער מוז איך נאכאמאל קומען מיט מיין גאנצער פאמיליע. אין מיין בערזל האב איך געטראפן איין ליידיגער טשעק, און כ'האב פראבירט צו פועל'ן אז ער זאל אננעמען איין טשעק פאר דער גאנצער סך הכל, $420, אבער ער האט פון גארנישט געוואלט הערן. ער דארף דריי באזונדערע טשעקס פאר יעדער פאספארט אפליקאציע. קרעדיט קארד? ניין, נישט מעגליך. קעש? נאופ.

מיין ווייב איז דערווייל געשטאנען אין דער זייט און פארברענגט מיט די קינדער. דא האט זי באמערקט אז עפעס גייט פאר. כ'האב מיך געשעמט איר צו דערציילן מיין שלימזלות אז כ'האב פארגעסן די טשעקס, און אז מארגן וועט די גאנצע פאמיליע זיך נאכאמאל דארפן אריבערשלעפן צום פאספארט אפיס. אבער ווי זי האט געהערט וואס עס גייט פאר, איז זי אויפגעשפרינגען. פונקט יענעם טאג האט א שוועסטער אירע איר געבעטן צו קויפן עטליכע זאכן פאר איר, און נישט וויסנדיג וויפיל עס וועט קאסטן האט זי איר געגעבן א ליידיגן טשעק. עטליכע מינוט נאכ'ן איר געבן דעם טשעק, האט מיין שוועגערין געזאגט פאר מיין ווייב, ווייסטו וואס, נעם דיר נאך א טשעק, אויב דו דארפסט קויפן עטליכע זאכן אין איין געשעפט און עטליכע אין אן אנדערן געשעפט...

אזוי שלעפט מיין ווייב ארויס צוויי ליידיגע טשעקס פון איר טאשקע, און צוזאמען מיט דעם ליידיגן טשעק וואס איך האב פונקט געהאט אין מיין בערזל האב איך געהאט די נויטיגע דריי טשעקס פאר די דריי פאספארט אפליקאציעס!