ס׳איז אבער א גרויסער פראבלעם פאר די וואס עומדים בראש, ווייל ווי איז דען מעגליך כסדר ארויסצוקומען מיט פרישע חידושים? בלית ברירה, האבן זיי אנגענומען צוויי מהלכים:
- א׳ - איבערצופרישן אלטע מאדעס און דאס אהערצושטעלן כאילו ״ס׳קומט צוריק״,
ב׳ - מאכן נייע עקסטרעמע דעזיינס, וואס איז ע״פ רוב א געמישעניש פון הודו און כוש און ווייט נישט שוה לכל נפש אבער גענוג כדי צו בלאזן פרישע ווינטן.
חסידישע אידן האבן זיך שוין צוגעוואוינט צום פאקט אז די דרויסענדיגע וועלט האט אן אבסעסיע צום חסידיש׳ן פאלק און איר שטייגער, ע״פ רוב לרע, אבער אויך לטוב אדער בתמימות. ווען ס׳קומט צו קליידונג זענען חסידישע מלבושים גאנץ אפט אויפ׳ן פעשאן ראנוועי און פילמאל פאראורזאכט דאס קאנטראווארסיעס.
יעצט איז אפילו דער עקסטרעם איבערגעגאנגען דאס גרעניץ פון משוגעת אדער חוזק, און ס׳איז געווארן נאענטער צו אנטיסעמיטזם, אזוי אז ס׳אפעקטירט לאו דוקא חסידישע אידן נאר יעדן איד אשר בשם ישראל יקרא.
ס׳קאכט זיך די לעצטע פאר טעג איבער די קאמפאני Zara וואס האט ארויסגעשטעלט א קינדערישער נאכט קלייד וואס דארף לכאורה צו הייסן אז ס׳איז נאכגעמאכט נאך א ״שעריף״ אנצוג, אבער ס׳ענדלט שטארק צו די געשטרייפטע קליידונג מיט׳ן לאטע וואס אונזערע עלטער׳ן זענען געווען געצווינגען צו טראגן אין די לאגערן ביי די נאציס ימ״ש.
למעשה, האבן זיי עס שוין שנעל ארויס׳גע׳פטר׳ט פון די געשעפטן און טענה׳נן אז ס׳איז געווען אן אומשולדיגער פארזעעהניש.
דער אינצידענט שטעלט פאר אן אינטערעסאנטער דילעמע, ס׳קומען אונטער פרישע דורות, און וואס א טאג גייט אלץ פארביי איז דא ווייניגער מענטשן וואס קימערען זיך איבער וואס האט פאסירט 70 יאר צוריק, בפרט צום אידישן פאלק. מיר אידן ווידער, זענען ווי פארשטענדליך געפערליך סענסעטיוו צום נושא פונעם האלאקאוסט און מיר פארלאנגען נאטורליכערהייט אז די וועלט מיט אירע ביליאנען איינצעלנע מענטשן זאלן זיך רעכענען מיט אונזערע געפילן.
פארשטייט זיך אז מיר זענען בארעכטיגט דערצו, אבער אין א פאל ווען ס׳איז לכאורה נישט באמת אנטיסעמיטזם אדער א פארזוך אפצושפעטן נאר ענדערש א מענטשליכער טעות, דארף מען זיך אליין פרעגן צו ס׳איז כדאי, אדער ריכטיג, צו מאכן פון דעם א גאנצן עסק.
