למעשה #5: גיין אין קאלעדזש

[מצטמק ויפה]

[justify]אה שמואל וואס טוט זיך? שוין לאנג נישט געזעהן, וואס מאכסטו עפעס גוטס? דאס מרה שחורה אויף מיין חבר'ס פנים האט מיר שוין אלעס פארציילט איך האב שוין פון איהם גארנישט געדארפט הערן. וואס איז? פשוט נישטא קיין געלט, די ווייב מאנט, די לענלארד שרייט, די חדר פארפירט, די גראסערי וויינט, אבער הילד איננו. נו, פרעג איך איהם, פארוואס זעהסטו נישט עפעס צו טוען אריינצוברענגן א מקור הפרנסה אין שטוב? זאגט ער מיר, יא, ער האט שוין מחליט געווען צו גיין ארבייטן און ער האט שוין אפילו אויפגעגעבן נאכמיטאג כולל אבער ער האט נאך גארנישט געטראפן גארנישט לייטיש און צום זאך, און אזוי ביני לביני האב איך געטראפן צוויי קרעדיט קארדס פון 0% APR און אזוי שטופט מען דורך חודש נאך חודש.

ידידים יקרים, דאס איז נישט נאר מיין חבר נאר אזוי זענען דא צענדליגע און הונדערטע אינגעלייט וואס האבן פשוט נישט וואס אין מויל אריין צו נעמען, פשוט ווייל זיי קענען נישט אויפקומען מיט עפעס א לייטישע דזשאב. טייל דרייען זיך ארום ממש אן גארנישט אזוי ווי מיין אויבערדערמאנטן חבר, אדער איז דא וואס יעדן טאג טרעפן זיי זיך מיט א נייע בעל הבית פארנדיג אויף א רוילערקויסטער פון דזשאב צו דזשאב, מ'פאנגט אן מיט סעיל'ס נאכדעם מיט קאר סערוויס וכדו' און מ'מוטשעט זיך אן וואך נאך וואך זוכענדיג עפעס א מקום מנוחה.

און נאכדעם איז דא די אינגעלייט וואס מען רופט זיי סיזענ'על אינגעלייט, דהיינו יעדע סיזען ארבייטן זיי אויף וואס עס פעלט זיך אויס אין יענע זמן; פסח ביים מצה בעקעריי, שבועות אין שיך געשעפט, זומער אלס מדריך, סוכות אתרוגים, און אזוי פארט א גלגל החוזר. אבער דאס איז ווייט פון א נארמאלע מהלך החיים פאר א טאטע מיט א שטוב מיט קינדער.

די ווייטאגליכע מציאות איז אז רוב פון די אינגעלייט זענען באמת א בא בטענה, ווייל די האנדל'ס וועלט האט זיך געגעבן גאר א שטארקע דריי די לעצטע פאר יאר, און די אויסוואלן פאר א לייטישע דזשאב זענען באמת זייער קליין, און אפילו די וואס זענען שוין יא דא, צאלט מען פאר דעם זייער ווייניג אז עס לוינט פשוט נישט.

איז וואס יא? וואס איז די ריכטיגע מהלך און אזא עפאכע וואס מיר לעבן און עס וואלגערן זיך נישט קיין דזשאב'ס אין די גאס?

די ענטפער אויף דעם גאר פארווייטאגטע פראגע איז: "קאלעדזש". וואס?! יא, קאלעדזש. וואס הייסט? איך בין עפעס א גאסן יונג אדער וואס? וואס וועט מיין טאטע, שווער, ווייב, באבע, זאגן אויף דעם? איז קודם לאמיר אייך אויפמערקזאם מאכן אז מיר לעבן שוין נישט אין די זעכציגער יארן, נאר מיר לעבן ברוך השם אין א אכשיר דרא'דיגע דור ווי אלעס איז צוגשטעלט צוגעפאסט פארן היימישן ציבור, און יא, קאלעדזש איז אויך צוגעשטעלט פאר היימישן ציבור אויפן שענסטן פארנעם, געאייגנט פאר היימישע אינגעלייט אפגעטיילט בלויז פאר מענער, מיט פראפעסער'ס וואס זענען על פי רוב שומרי תורה ומצוות און פארשטייען אונזערע געברויכן. און ווען מיר זאגן היימיש מיינען מיר היימיש היימיש פון די שענסטע און די בעסטע וואס כלל ישראל פארמאגט. א שטייגער פון אזא קאלעדזש איז: TTI אדער Cope וואס די ביידע איז ממש געאייגנעט פארן היימישן ציבור מיט אלע זייערע געברויכן.

פיין! אבער לאמיר זעהן וואס איז דאס קאלעדזש, וואס טוט מען דארט, און אויף וואס קען מען זיך אלס לערנען, און אויף וואס זאל מען זיך לערנען, און וואז נעמט מען דערפון ארויס למעשה?

איז אזוי בעצם יעדע מין זאך קען געלערנט ווערן אין קאלעדזש, אבער זייער אסאך זאכן קענסטו טרעפן א דזשאב אן דעם דעגרי אויך, ממילא איז א שאד די מיה און פלאג זיך צו לערנען דערפאר ווען דאס גייט גארנישט ברענגען. איז למעשה די זאכן וואס דער היימישער עולם לערנט זיך איז על פי רוב: אוקאנטינג, גרעפיקס, בוקקיפינג, ספעשיל עדזשוקעישן, ספיעטש טערעפּי, עפפ דוועלאפינג (לעצטערע געדאנק), און נאך וואס איך געדענק נישט אויפן מינוט.

אלע פון די זענען באמת פיין און קענען ברענגען די ריכטיגע רעזולטאטן פארן ריכטיגן מענטש, אבער מיר וועלן ארום רעדן פון "ספעשל עדזושקעישן". די סיבה פארוואס מיר האבן דאס אויסגעקליבן איז ווי פאלגנד:

די שטאט ניו יארק טוט די לעצטע פאר יאר טיילן אוצרות מיט געלט פאר עדזשוקעישן אויף א אומ-נארמאלע פארנעם.
די פארלאנג פאר דעם איז זייער גרויס, צוליב די קליינע צאהל אינגעלייט וואס האבן א דעגרי.

די פרויען וואס האבן זיך דערצו צוגעכאפט בעת וואס עס איז געווען ביי זיי א גרויסע פארלאנג האבן זייער שטארק מצליח געווען. און זייענדיג לעצטענס ביי א מיטינג אין דעם פעלד, האט זיך אנגעזעהן דעם ריזן חילוק אז בעת דארט זענען געזיצן הונדערטער היימישע פרויען האב איך געקענט ציילן מיט די פינגער די היימישע מענער, מיר זענען ניטאמאל געווען פינף פראצענט.

אפילו פאר'ן ענדיגן דעם גאנצען דעגרי קענסטו שוין אנהייבן טוען געוויסע זאכן, ווי למשל Title 1 און נאך שפעטער P3 וואס דאס אלעס צאהלט זיך זייער גוט, און איז א גרויסע מעלה נישט דארפנדיג ווארטן די צוויי דריי יאר צו זעהן די פירות פון דיין ארבייט.

איז לאמיר עס אביסל צולייגן און זעהן וואס דאס איז. יעדע דעגרי וואס מען וויל נאר נעמען, נישט קיין חילוק אויף וועלכע פאך, איז איינגעטיילט אין צוויי: פאזע איינס און פאזע צוויי. פאזע איינס רופט זיך א בעדזשלור'ס דעגרי וואס דאס נעמט בערך פון א יאר ביז דריי יאר געוואנדן אין וועלכע קאלעדזש דו גייסט, פאזע צוויי איז א מעסטער'ס דעגרי וואס די צייט דערפון איז שוין געוואנדן אויף וועלכע פאך דו נעמסט דעם דעגרי.

די BA (בעדזשלור'ס) דעגרי האט בעצם נישט קיין שייכות מיט די פאך וואס דו גייסט זיך לערנען, עס איז נאר אזויפיהל אז די שטאט פארלאנגט אז יעדע געלערנטער מענטש זאל האבן א שטיקל ידיעה און וועלטליכע חכמה, ווי ענגליש, מאטעמאטיק, בייעלאגיע, וכו'. אבער דאס האט נישט קיין שייכות מיט דעם ספעציפישן פאך וואס דו גייסט זיך לערנען. קומט אויס אז בעצם בשעת'ן נעמען די BA דארפט איר אפילו נישט וויסן וואו איר פלאנט זיך למעשה צו ווענדן, אבער נאך אלץ איז בעסער אז יא, ווייל אזוי קען מען שוין אריינשטופן אינעם BA די ידיעות וואס גייט דיר דארפן צוניצקומען.

כדי צו באקומען א BA דארף מען האבן 120 קרעדיט'ס, דאס באקומט מען דורך נעמען א טעסט. א געווענליכע טעסט איז 3 קרעדיטס, ס'דא וואס זענען זעקס, אזוי אויך איז דא וואס זענען 16 קרעדיט'ס. אין די קרעדיט'ס אליין איז דא העכערע לעוועל קרעדיט'ס מיט נידריגע לעוועל קרעדיט'ס, געוואנדן לויט די שוועריגקייט פונעם טעסט. א געוויסע חלק פון די קרעדיט'ס מוז פארשטייט זיך זיין פון די הויכע לעוועל קרעדיט'ס, ווי אויך דארף די קרעדיטס זיין איינגעטיילט אין געוויסע ספעציפישע ידיעות.

ווי ערווענט, קען די 120 קרעדיט'ס זיין אין סיי וועלכע וועלטליכע וויסענשאפט, דאס נעמט אויך אריין אידישע וויסענשאפט ווי חומש, גמרא, הלכה, אידיש שפראך און אידישע היסטאריע. דער פאקט פארגרינגערט זייער שטארק פאר היימישע אינגעלייט צו עררייכן גאר שנעל די 120 קרעדיטס, ווייל קודם קען מען באקומען כמעט 40 קרעדיט'ס פון די ישיבה וואו מען האט געלערנט (אויב האט מען גענומען פראגראמען), און ווי אויך איז שוין היינט צוגעשטעלט JSE טעסטס וואס זענען געמאכט אויף גמרא, חומש, חפץ חיים וכדו'. פארשטייט זיך אבער אז צו דעם אלעם דארף מען נאך אלס האבן געוויסע קרעדיט'ס פון ענגליש, מאטעמאטיק, בייאלאגיע וכדו'.

איינמאהל איר האט עררייכט אייער 120 קרעדיטס קענט איר שוין אריינגיין אין פעלד פון עדזשיקעישן מיט'ן טוען Title 1, דאס איז א שטאטישע פראגראם ארויסצוהעלפן שוואכערע קינדער וואס דארפן טיפול מיוחד, מען נעמט זיי ארויס פון קלאס און מען לערנט מיט זיי פאר 45 מינוט און מען צאלט פאר דעם צווישען 50 ביז 60 דאללער א שעה (געוואנדן אונטער וועלכע עדזשענסי דו ארבייטסט). כמעט אלע היימישע מוסדות האבן שוין היינט דעם פראגראם, און דער פארלאנג פאר היימישע אינגעלייט איז זייער גרויס.

דערנאך איז דא די מעסטערס דעגרי וואס איז געווידמעט אויף דעם ספעציפישן פאך וואס דו גייסט זיך לערנען, און איינמאל דו דערגרייכסט די פולע דעגרי קענסטו שוין טוען ספעשיל עד וואס צאלט זיך צווישען 60 ביז 90 דאללער א שעה.

אפילו נאך פארן ענדיגן די גאנצע דעגרי קענסטו נאך אכט וואכן אריין אינעם דעגרי טוען P3, וואס כאטש מען צאהלט פאר דעם ויויניגער פון וואס מען צאלט פאר Title 1, איז דאס אבער דורכן גאנצן טאג, בעת וואס Title 1 איז ספעציפיש נאר אויף די נאכמיטאג שעות.

ווי געברענגט אויבן, האבן מיר נאר אויסגעשמועסט איין זאך אויף וואס מען קען זיך לערנען, אבער די פעלד פון קאלעדזש איז זייער גרויס, און וואו איר זעהט, צאלט מען פאר איינעם מיט א דעגרי זייער זייער שיין.

צום סיום לאמיר קלארשטעלן אז מיר באציען זיך נישט דא אויף דעם קליינעם פראצענט אינגעלייט וואס זענען געבוירן געווארן אויף צו זיין בעלי בתים פון פארצווייגטע געשעפטן, און וועלן טוען כל טצדקי צו מצליח זיין אין ביזנעס. זיי זאלן טאקע זעהן צו ארבייטן אליין און וועלן מצליח זיין שענער אן א דעגרי וואס דאן זענען זיי געבינדן צו דעם ספעציפישן ארבייט אויף וואס זיי האבן א דעגרי, ווי אן א דעגרי. אבער רובא דרובא וואס זענען נישט געמאכט אויף צו האסלען זאלן אוודאי נעמען די מיה און זיך גיין לערנען עפעס א פאך וואס וועט זיי ברענגען פרנסה ברווח בעזר השם.[/justify]

[אפטעמיסט]

עטליכע הערות:

איינמאהל איר האט עררייכט אייער 120 קרעדיטס קענט איר שוין אריינגיין אין פעלד פון עדזשיקעישן מיט'ן טוען Title 1, דאס איז א שטאטישע פראגראם ארויס צו העלפן שוואכערע קינדער וואס דארפן טיפול מיוחד, מען נעמט זיי ארויס פון קלאס און מען לערנט מיט זיי פאר 45 מינוט און מען צאלט פאר דעם ציווישען 50 ביז 60 דאללער א שעה (געוואנדען אינטער וועלכע עדזשענסי דו ארבייטסט.) כמעט אלע היימישע מוסדות האבן שוין היינט דעם פראגראם און די פארלאנג איף היימישע אינגעלייט איז זייער גרויס.

די רעגירונג האט דאס יאר אנגעהויבן אנערקענען ישיבה דעגריס, און מ'קען טון title 1 אויב מען האט א first Talmudic degree (א יעדע אפיציעלע ישיבה אדער כולל קען עס אייך געבן, הגם זיי מאכן פראבלעמען אויב האט איר נישט גענומען college program . ס'איז לעצטענס עדווערטייזט אין די היימישע מארגן צעטליך אז מ'זוכט אינגעלייט דאס צו טון און זיי צאלן, ווי געשריבן, $60 פאר די ערשטע session און $50 פון די אנדערע. רופט 718-419-6237 פאר מער אינפארמאציע.

נאך א וויכטיגע הערה:

אויסער cope און TTI איז דא קורסעס פאר מענער ביינאכט אין Bramson Ort College וואו מען קען באקומען א BA אין א היימישע סביבה. (דער קאלעדזש איז געגרינדעד געווארן דורך אידן און איז ספעציעל געמאכט פאר immigrants און סטודענטן וואס דארפן הילף).
עפעס האב איך יא געהערט אז לעצטענס איז נישט געווען קיין קלאסן מפני סיבות שונות — בכ"א, פאר מער פרטים, אין אישי.

[שמעקעדיג]

זייער שיין מצטמק, און ריכטיג.

עס איז וויכטיג צו באטאנען אז אויב איינער פלאנט דאס צו טון (אדער שיקן זיינע קינדער), זאל מען אנהייבן גלייך נאך די חתונה (אדער אפשר נאך אפילו אלס חתן) ווען דער מצב הפרנסה איז נאך נישט טייט, און עס איז נאך דא מער צייט, מען איז נאך נישט פאריאגט און פארפלאגט על המחי' ועל הכלכלה, ויפה שעה אחת קודם, ווי פריער מען לערנט זיך, אלס פריער און שנעלער קען מען אנהייבן שניידן די פירות, און מען דארף נישט אריינפאלן אין חובות.

[פישלע העררינג]

שיין צו זעהן אז דו טוהסט באטראכטן דער קאלעדזש אפציע אומאפהענגיק אין אונזער אלגעמיינע עדיוקעישאן.

#למעשה זאגסט, אז יעדע שמויגער קען פארדינען ביז דריי יאר בערך 60 דאללער א שעה אויב גייט ער זיך לערנען אביסל מאטעמאטיק, נעמט א חפץ חיים טעסט, און האט די באבע אין די אדמה.

דאס איז א שיינע רעיון, ווייל עס לאזט איבער אונזער איינגעקנעטענע סיסטעם פון לערנען אין ישיבה גפ"ת, און אין כולל הלכה וכו', וואס דאס גייט זיך דאך לכאורה נישט טוישן, און דאס איז דאך וואס מיר ווילן אלץ אידן - זיצן און לערנען, נאר דו לערענסט אויס א וועג וויאזוי צו גיין די קומענדיגע טריט אין לעבן.

נ.ב. וואס זענען די קאסטן פון גיין אין קאלעדזש? איך זעה אז דו רירסט עס אהן מיט די באהויפטונג אז נישט געדאגה'ט, די ניו יארקער גאווערנמענט לאזט זיך קאסטן דערויף. איז עס ווירקליך אזוי? זענען דא פראגראמען וואס צאלען דאס אויס גענצליך?

------
אפטע האקט.

[מצטמק ויפה]

עטליכע הערות:



די רעגירונג האט דאס יאר אנגעהויבן אנערקענען ישיבה דעגריס, און מ'קען טון title 1 אויב מען האט א first Talmudic degree (א יעדע אפיציעלע ישיבה אדער כולל קען עס אייך געבן, הגם זיי מאכן פראבלעמען אויב האט איר נישט גענומען college program . ס'איז לעצטענס עדווערטייזט אין די היימישע מארגן צעטליך אז מ'זוכט אינגעלייט דאס צו טון און זיי צאלן, ווי געשריבן, $60 פאר די ערשטע session און $50 פון די אנדערע. רופט 718-419-6237 פאר .

שכח אפטע פארן אנמערקן.

א first talmudic degree איז נישט גענוג מען מוז האבן א BTL וואס נישט יעדע ישיבה קען דאס געבן ווי אויך דארף מען זיין ענרוילד אין א קלעדזש און אפילו אזוי מאכן זיי פראבלעמען.

[מצטמק ויפה]

נ.ב. וואס זענען די קאסטן פון גיין אין קאלעדזש? איך זעה אז דו רירסט עס אהן מיט די באהויפטונג אז נישט געדאגה'ט, די ניו יארקער גאווערנמענט לאזט זיך קאסטן דערויף. איז עס ווירקליך אזוי? זענען דא פראגראמען וואס צאלען דאס אויס גענצליך?

------
אפטע האקט.

די קאסטן פאר די BA איז 10 אלפים וואס דריי דערפון באקומט מען צירוק פון די שטאט. און די מעסטערס איז בערך 17 אלפים וואס מקען דערויף נעמען א סטודענד לאון , און אויב ווערסטו א ספעשיל עד טיטשער פאר פינף יאר ווערט די גאנצע חוב אפגעווישט.

[אפטעמיסט]

א first talmudic degree איז נישט גענוג מען מוז האבן א BTL וואס נישט יעדע ישיבה קען דאס געבן ווי אויך דארף מען זיין ענרוילד אין א קלעדזש און אפילו אזוי מאכן זיי פראבלעמען

איך בין נישט זיכער וואס דו מיינסט צו זאגן, אבער אנגעהויבן פון די יאר איז א first Talmudic degree (כמדומה אפילו אן די transcripts) גענוג אויף צו קענען פרוקצירן title 1. יעדע ישיבה וואס קען נעמען college programs קען דיר דאס געבן.

[קאסטנער]

וואס איז מיט קאמפיאטער לערנען? מען דארף נישט קיין קאלידזש סהאקט נישט אפ פין תורה.
א ריזיגע חלק פין די דזאב מארקעט ווערט אוועק גענימען פין אינז וועגען מער קענען נישט קאמפיטער.
סטאקע דא וואס לערנען אויס אבער עס איז נישט אין די סיסטעם אין קיין איין אינגערמאן גייט זיך נישט לערנען פארן וויסן אז ער וועט האבן א דזאב ווי ער וועט דאס דארפן ניצן, ווייטער ווען ער גייט שוין זיכן א דזאב איז שוין די מצב גענגעט אין ער נעמט וואס איז דא, אזעלכע וואס זענען מסכים צי [שרייב נישט קיין אומאיידעלע ווערטער. מנהל] נייע ארבעטערס פין אלף זענען דא זייער ווייניג.

פאר די פרויען לערנט מען גרינטליך אויס קאמפיטער,הייסט מען זיי גרעפצן קינדער ביז זיי סטאפן ארבעטען, מענער ווייטער לערנט מען נישט אויס אין צום סוף דארף ער ברענגען פרנסה??

#עולם הפוך ראיתי.

[ארבעס]

איך פארשטיי אז tap צאהלט פאר college? אדער מאך איך א טעות

[מצטמק ויפה]

איך פארשטיי אז tap צאהלט פאר college? אדער מאך איך א טעות

יא דאס איז א חלק פון די דריי אלפים אויבן דערמאנט.

[אליצפן]

איך פארשטיי אז tap צאהלט פאר college? אדער מאך איך א טעות

טעפ צאלט נאר אויב גייסטו אין א געהעריגע קאלעדזש פאר פיר יאר. טאמער ווילסטו נעמען דער היימישער שארטקאט פון א יאר-18 חדשים, און עס טון עפי"ר דורך נעמען טעסטס אויף אידישע נושאים, וועט עס דיר אפקאסטן א שיינער פאר טויזענט דאלאר.

[פישלע העררינג]

יעצט געליינט אין בלומבערג ביזנעס וויק, אז זיי האבן געמאכט א גאר ריזיגע אנקעטע לעצטענס, און עס שטעלט זיך ארויס דאס 46! פראצענט גראדואירטע האבן א פרנסה וואס פארלאנגט בכלל נישט זייער דוגרי אדער סערטיפעקאט!

[מצטמק ויפה]

יעצט געליינט אין בלומבערג ביזנעס וויק, אז זיי האבן געמאכט א גאר ריזיגע אנקעטע לעצטענס, און עס שטעלט זיך ארויס דאס 46! פראצענט גראדואירטע האבן א פרנסה וואס פארלאנגט בכלל נישט זייער דוגרי אדער סערטיפעקאט!

די אנקעטע איז לכאורה נאר גילטיג ביי די גוים וואס רוב נארמאלע גוים גייען אין קאלעדזש, און אוטעמאטיש קומט אויס אז אסאך צילן נישט געהעריג אויף א דזאב נאר אבי זיין א געלערנטער מאן און טוען וואס איז נארמאל. משא"כ ביי אונז דער וואס גייט אין קאלעדזש ווייסט וואס ער וויל און וועט זיך אריינלייגן דייקא אין די פעלד וואס ער האפט אנצוקומען.

[ארבעס]

קודם כל איז דא פעדעראל עיד. Fafsa.gov
שנית די מחלוקה בנוגע שטודירין פאר א דיגרי איז א אלטע. טראמפ אין זיין ריאלעטי שאוי the apprentice האט איין סיזאן וואס ער לייגט אקעגן street smart vs book smart. למעשה האבען די book smart געוואנען.
בנוגע לענינינן. יעדער פאזיציע (חוץ גאר היימישע ) פארלאנגען א דיגרי. סימפעל. על פי רוב קענען אינז ניט אפילו שרייבען ענגליש. א דאנק אינזער חינוך. קוים ביז זיביטע קלאס.
א דיגרי וועט דיר געבן וויסענשאפט אין language finance business admin.
עס זענען אלעמאל דא מענטשען וואס קענען זיין מצליח בלי זה.
טראמפ האט נישט קיין בעטשלערז אבער ער איז געוועהן שטיק צייט אין west point צי מושטירען אלס א סאלדאט. אין צי ברענגען א ראיה פין יחידי סגולה איז נישט ריכטיג.
איך כשלעצמי איז שוין צי שפעט אבער מיין קינדער וועל איך אריינגעבן תשיקה פאר העכערע עדויקעשען

[MickyMouse]

יעצט געליינט אין בלומבערג ביזנעס וויק, אז זיי האבן געמאכט א גאר ריזיגע אנקעטע לעצטענס, און עס שטעלט זיך ארויס דאס 46! פראצענט גראדואירטע האבן א פרנסה וואס פארלאנגט בכלל נישט זייער דוגרי אדער סערטיפעקאט!

א גרויסע חלק פון ארבעט׳ס געבער זענען וויליג צי לערנען א קוואליפיצירטע מענטש. האבן א דעגרי, אויף עניטינג, ווייזט אז דאס איז א מענטש מיט וועם מען קען גיין צום טיש און אז ער איז א ריספאנסיבל פערזאן, ווייל באקומען א דעגרי ווייזט אויף א שטארקע קאמיטמענט.

אין די היימישע עולם איז זייער שטארק די טענה אז מ׳זעט גרויסע מיליאנערן וואס זענען קיינמאל נישט געגאנגען זיך לערנען, ווי אויך זעט מען זייער אסאך וואס האבן זיך געלערנט אבער מיטשענען זיך אוועק.
למעשה איז די פעלד מער אפען פאר ווער עס האט א דעגרי, און די אפערטוניטי צי זיין מער ווי א ווערהויז מענעדזער אדער דעטע ענטרי איז אסאך בעסער.
נאך איין (וויכטיגע?) פאוינט, מען קען טאקע ניצן די ישיבה היי סקול דיפלאמע, אבער מען האט פאקטיש נישט די בעסיק סקילס וואס מען מיז האבן אנציהייבן קאלעדזש. איך קען עטליכע וואס האבן נישט געקענט מיטהאלטן וועגן דעים.
איך האלט אז עס איז א וויכטיגע ערשטע סטעפ, צו נעמען א GED. (איך האב אויך אזוי געטון).

[פליקער]

זייער א וויכטיגע ענין און א ווייטיגליכער נושא, אבער דער גרעסטער שטער איז לכאורה היינט אז מענער האבן נישט די מינאמאלע סקול קרעדיט'ס אנציהויבן קאלעדש ווידערים די לדים האבן יא זיי האבן אלע דיפלאמע'ס, אפילו לאמיר זאגן איינער האט יא א דיפלאמע וואס ער האט איינגעהאנדעלט פון א שווארצע פאסטעך, גיבט מען אים די ערשטע טעסט פון זעקסטע גרעיד ספעלינג און אריטמעטיק, און מען דערגייט באשיינפערלעך אז ער קען ליידער נישט ספעלן די נומערען פון איינס ביז צעין,

פארוואס זאלן מיר נישט זעין קיין איין איד א יו פי עס אדער פעדעקס דרייווער
פארוואס ארבייט נישט קיין איין איד פאר קאן עדיסאן און ווערייזאן
קען א אינגערמאן נישט דרייון א סיטי באס, נאר אויב עס איז א געילע וואס האט אויסגעקריצט רץ כצבי לתלמיד תורה
אויף אלע אלגעמיינע קאנסטראקשן סייטס, זעיט מען נאר אויב ער איז דער בעל בוס אדער פארמאן איז א אנ"ש
און קיין שום אפיציעלע אפיס זעיט מען נישט קיין היימישער, אלע פארדינען שיין נאך א קארצע צייט
איך זעי אויף קאנסטראקשן סייטס פיל מיט אראבער'ס מיט שפיצלעך און בערד ווי רב אדה בר אהבה, פארדינען מסתם העפטיג
זענען מיר עפעס נישט אזוי גערוטען ווי די מאקדאנעלד פרעסענדער גוי
לעצטענס האבן מיר זיך גריידע יא ציגעכאפט צי קאר סערוויס, זעיט זיך אויס אז דער אינגערמאן קלערט אז מען וועט מיינען אז ער איז א חסד מעמבער
פארוואס נישט א יעלא טעקסי מען מיז נישט הייסן מכמוד, דעיס איז נאר א לעיגענדע
וואס איז שלעכט צי זיין א איינגעשטעלטע און א שפיטאל מיט סיי וואספארא נאמען עס פעילט אויס, מען ברויך נישט קיין קאלעדש דעגרי נאר אביסל סקול,
וויפיל וואלטן די אינגעלייט געקענט אויפטיען ווען זיי וואלטן נאר ג'ענדיגט סקול צי קענען געהעריג רעכענען און שרייבן, עס איז א שאנד און א בושה

[שמעקעדיג]

וואס איז שלעכט צי זיין א איינגעשטעלטע און א שפיטאל מיט סיי וואספארא נאמען עס פעילט אויס, מען ברויך נישט קיין קאלעדש דעגרי נאר אביסל סקול

אויב מיינסטו צו בעזימען דעם האלוועי ביסטו גערעכט; אבער צו טון ארבעט מיט פאציענטן פאדערט זיכער לכה"פ א שטיקל דעגרי, וע"ז ידוו הדווים, מען וואלט געקענט אסאך שיין געלט פארדינען מיט ארבעטן אין שפיטאל (אדער סיי וועלכע מעדיקל קליניק).

[פליקער]

איך פארשטיי אז צי זיין א ראדיאליגיסט אדער פאטאלאגיסט ברויך מען זיין אין סקול, אבער צו זיין זייער אסיסטענט ברויך מען נישט, עס זענען דא ים'ם מיט ארבייטער'ס סעקראטערי'ס טריאדש פערזאנען, קאמפיוטער טעקנישן'ס איי טי ועוד

איך רעד דייקי נישט פון ברומעטאלעדזשי

[אפטעמיסט]

דער גרעסטער שטער איז לכאורה היינט אז מענער האבן נישט די מינאמאלע סקול קרעדיט'ס אנציהויבן קאלעדזש

אין געוויסע קאלעדזשעס קען מען באקומען א GED בשעת מען ארבעט אויף די BA און אלס וואס מ'דארף האבן צו ווערן אנגענומען איז נעמען א קליינטשיקע school exam וואס אפילו דאס העלפט מען דיך זיך צוגרייטען.

[מצטמק ויפה]

וואס איז מיט TOURO COLLEGE וואס איז אינגאנצען נישט דערמאנט דא?

איך מיין עס איז נישט אפגעטיילט מענער און פרויען

[מבקר]

נאך אן אפשען וואס איז נישט צוגערורט געווארן איז די אלע קאלעדזע"ס וואס מ'קען לערנען אונליין, אזוי איז נישטא די פראבלעמען פון מיקסד

אגב איך האב געליינט לעצטענס א גוטע ביכל וואס לערנט אויס ביזנעס בעסער ווי די אלע MBA'ס אין קאלעד"ז די ביכל הייסט The Personal MBA: Master the Art of Business

[ודי למבין]

מצטמק האט שיין צונומען די נושא פון קאלידזשעס אבער ער איז אביסל צו בייעסד פאר TTI. איך קען גוט די גאנצע TTI סטעף און זיי זענען נישט דא צו העלפן זייערע קלייענטן.

די בעסטע וועג פאר קאלידזש איז צו גיין מיט SUNY. פאר ניו יארקער איינוואוינער איז דאס חנם אין כסף, פארקערט, מ'גייט נאך ארויס מיט אפאר דאלער אין טאש. עס איז אן אנליין קאלידזש, זיי רעכענען א שיין ביסל קרעדיטס פאר דזשאודעיק סטודיס (איך געדענק נישט פונקטליך די נומבער וויפיל), און זיי האבן אויך א "פרייער נאלידזש" פאונקשען, וואס דאס ערמעגליעט אז אויב דו האסט עקספיריענס אין א פיעלד, למשל, דו קענסט גוט מוזיק טיעראי, ווועט דיך דיין אינסטראקטער הייסן שרייבן אן עססעי איבער מוזיק טיעראי און דאס וועט זיין ווערט 3 קרעדיטס לכה"פ. ביי זיי קענסטו אויך נעמען די 15-קרעדיט יודיש עקזעם.

עס נעמט בערך א יאר אויב דו ארבעטסט פלייסיג. אויב דו ארבעטסט גאר פלייסיג קען עס נעמען שנעלער אויכעט.

און, אנדערש ווי די TTI קלעסעס קומט מען ארויס מיט עפעס - מ'לערענט זיך אויס זאכן, און די דעגרי איז ווערט און אנדערע קאלידזשעס.

[berlbalaguleh]

וואס איז מיט TOURO COLLEGE וואס איז אינגאנצען נישט דערמאנט דא?

איך מיין עס איז נישט אפגעטיילט מענער און פרויען

לפי ידיעתי איז דא באזונדערע קלאסן פאר מענער און פאר פרויען...!