רעגירונג אין ישראל נעמט אנטייל אין דעם "למעשה" פראיעקט

[יואב]

די רעגירונג אין ישראל האט זעט אויס אנערקענט אז בלויז דורך ארויסברענגען דעם נעגעטיוון חלק פון אחינו בני פאראזיטן וועט הלכה למעשה ברענגען נוצן פאר קיינעם וקיינעם בכלל. דער אלגעמיינער המון טוט נאכאנאנד שימפן און שעלטן איבער דעם זינלאזן הפקירות וואס שפרודלט מיט סוקסעס אונטער דעם נאמען פון תורה און שלאגט מיט אן עזות פרישע גרעניצן אויף א פארנעם וואס האט פשוט נישט קיין זין ס'זאל מעגן פארדינען פולקאמע טאלעראנץ אונטער די פרינציפן פון דעמאקראטיע. 

די קדשי קדשים פון דער בריאה מאידך גיסא, די חרדים וועלכע האבן שוין עקספערמאנטירט אויף דער אייגענער האנט אלצדינג וואס בטלן די צייט איז ביכולת צו ברענגען פאר זיך, פאר דעם לאנד און פאר גאנץ כלל ישראל, בעפארצוגען ווייטער צו זיצן אין זייערע געצוימטע ד' אמות  אנטשלאסן מיט א פרימיטיוו-איגנאראנטער אומבויגזאמקייט צו איגנארירן באגודה אדער דוקא נישט "באגודה" אחת דאס פיינפולע מציאות וואס פראסקעט מיט א ציפעדיגער קראפט אזש אין זייער אייגענעם עקשנות-באגאסענעם פרצוף. מערערע פריוון פון דער רעגירונג איינצושטעלן זאכליכע חוקים אנגעבליך צו קענען העלפן צו אינפארסירן די פליכטן פון יעדן בירגער און פארזיכערן א סטאביל לעבן פאר מענטשן וואס פראבירן צו אפהאלטן דעם עבר פון אנטלויפן, ווערן אין בעסטן פאל געזען ווי ביטערע גזירות צו וואס קאנטער-רעאקציעס קענען מאנכעמאל זיך ענדיגן זייער אגרעסיוו צו זאגאר פאטאל. והצד השווה שבהן אז יעדער אין דער מדינה, איש איש תחת דגלו ולבית אבותם בלייבט גערעכט מיט פראצענטן אבער ביטערליך צו שוידערליך באקאקט.

דער דערציאונג-מיניסטעריום טוט איצט פארשטעלן אן עדוקעישאן-פראגראם דעזיגנירט הויפטזעכליך פאר דער אלטרא-ארטעדאקסישער יוגנט, און ווי אויך וועלן קענען געניסן דערפון סתם יחידים וועלכע האבן פארפעלט צו באקומען דעם דורכשניטליכן קאריקולום וואס ווערט געלערנט אין די אלגעמיינע ישראלישע חינוך-אנשטאלטן. די צוויי יעריגע פראגראם וועט צוגעשטעלט ווערן פאר יוגנטליכע אינעם יארגאנג פון 17 ביז 20, און דאס וועט זיי האפנטליך ערמעגליכן צו נעמען מאטורע עקזאמען, גיין אין קאלעדש ואחרון חביב זיך אריינדרייען אין דער ארבעטס וועלט.

קלאסן פאר דער דאזיגער פראגראם וועט ווערן אפגעהאלטן דריי מאל דורכאויס דער וואך, און בכדי נישט צו שטערן די לימודי קודש וועט דאס פארקומען דוקא אין די שפעטערע נאכמיטאג שעות. חרדים אין דער דאזיגער פראגראם וועלן דערלויבט ווערן צו לערנען לימודים וועלכע אנבאלאנגט אידישקייט ווי איידער דאס שטודירן ליטעראטור, און די פארלאנגען וועלכע זיי וועלן דארפן נאכקומען וועט מיט פארשטענדעניש זיין אויף א מער-לייכטערן סטאנדארט ווי פון דאס וואס ווערט  אויפגעפאדערט אין די ארטיגע אלגעמיינע שולעס.

די פראגראם וועלכע וועט זיין גענצליך בחינם וועט זיך אנהייבן דעם קומענדיגן מערץ בשעה טובה ומוצלחת מיט אזויפיל ווי פינף הונדערט תלמידים וועלכע זענען שטארק מאטאוויזירט צו לערנען, און ווילן ווייטער אנגיין מיט זייערע למודי קודש אבער אונטער א מער פארמאלן חינוך. ס'וועט זיך אין לויף פון א קורצער צייט אויסברייטערן סיי אין מספר, ווי אזוי אויך פאר אפילו אזאנע מעשרים ולמעלה אויב וועט זיין א פארלאנג ועידוד הרבנים דערפאר.

קעגענער פון דעם פלאן ארגומענטירן אז דאס וועט ברענגען מענטשן צו קלערן אז צוויי יאר לערנען בקיאות איז אין אומשטאנד צו ערזעצן צוועלף יאר לערנען בעיון רב. למעשה טענה'ן שטיצער פון דעם געדאנק אז אין הכי נמי, און ווי געזאגט שוין אויבן זענען אויך ענק פון צווישן די וועלכע זענען "גערעכט." אבער וואס אין דעם גיהנום זאל מען נישט טאן צו זען דעם עם נבון וחכם די חרדים לדבר ה' אין דער עולם העבודה איינמאל פאר אלעמאל.

דער מיניסטעריום פארשפרעכט אז די מלמדים וועלן זיך אומגיין באזונדער סענסיטיוו צו דער לעבנסשטייגער און געברויכן פון די חרדים.

די דאזיגע פראגראם איז בלויז נאך אן איניצאטיוו פון צווישן א רייע אונטערנעמונגען פון דעם דערציאונג-מיניסטעריום דעזיגנירט צו קענען לינדערן דאס חשכות פון דעם איצטיגן מצב הפרנסה בתוך היהדות החרדית, וילמדו תועים בינה ובשם ה' נעשה ונצליח. 

[קאסטנער]

די קול קורא'ס שלענגלען זיך איצטערט ארויס פינעם קאפי מאשין די פראטעסטן האלטן זיך שוין אינמיטן פארמירן,
אויף די פלאקאטן ליינט זיך צווישן אנדערע מיט עוג מלך הבשן אותיות "נאך א מיטל אריינצישלעפן חרידישע אידן אינעם שמעלץ טאפ"- ליין : נאך א מיטל אינז צי אביסל אין פלאץ שטעלען..

[איש את רעהו]

אינטערסאנט אז זיי זאלן זיך פלוצלינג אזוי שטארק אריינטון מיט אלע זייערע כוחות צו העלפן די חרדישע אידן
זענען זיי געווארן חוזרים בתשובה? אדער זיכען זיי צו פארגרעסערן די צאל חוזרים בשאלה?

[יואב]

אינטערסאנט אז זיי זאלן זיך פלוצלינג אזוי שטארק אריינטון מיט אלע זייערע כוחות צו העלפן די חרדישע אידן
זענען זיי געווארן חוזרים בתשובה? אדער זיכען זיי צו פארגרעסערן די צאל חוזרים בשאלה?

נומער איינס ווילן זיי מקיים זיין דעם "איש את רעהו יעזרו". נומער צוויי: פארוואס קענסטו דאס נישט זען ווי אן איניצאטיוו פון א פאר'ייאוש'טער רעגירונג עטוואס צו נארמאליזירן א פאלק פון אומציווילעזירטע באשעפענישן וועלכע מאכן נאר צרות פאר דעם כלל? זיי זענען בירגער דארט, און אנשטאט זיין פארנומען מיט כפרות, מציצה בפה צו אינגאנצן ארויפצווינגען א סעקולערן קאריקולום, געזעצן און דעבאטעס אין וואס פילע לענדער איבער דער גארער וועלט זענען שוין כהיום פארמישט, איז די מדינה מיט א לפנים משורת הדינ'דיגן פארשטענדעניש און זעלטן-איינגעהאלטנקייט אויפגעקומען מיט א שטארק-זאכליכן "למעשה" פראיעקט וויאזוי צו העלפן אידן יראים ושלמים לייזן אפאר גרייצער מיגיע כפם וזה הוא. ווילדע דעמאניסטראציעס עדיין במקומם עומדים, ערד גראבונגען וועט זיך ווייטער טרעפן מיט אן עד כדי להמית'דיגער אפאזיציע, פראגראמען וועט ווייטער זיין און די מדינה וועט ווייטער דארפן זיך ספראווען מיט אירע פראבלעמען.

דאס זעט אויס איז אבער פאר אזא חכם ווי אייך א מיטל פון דעם ס"מ אריינצוציען שלומי אמוני ישראל אין נעץ פון שמד. גוד לאק פאר דיין געשליפן מוח'ל, און אנטשולדיגט פאר'ן זיך וויסענדיג מאכן פון דיין נארישער קאפ-אין-וואנט באמערקונג.

דיסקלעימער: כ'האב יעצט געמאכט אן אויסנאם, ס'מיינט אבער נישט אז מיין צייט היינט וועט ווערן געווידמעט דיך צו קענען שענקן אויפמערקזאמקייט. סליחה.

[מאטי]

זייער אינטערסאנט און באגריסנווערד. זיי האבן אבער פארגעסן צו אדרעסירן דעם פראבלעם פון נישט קענן ארבייטן איידער מ'גייט אין צה"ל.

[מאטי]

פארוואס פסק'סטע אפ "זיי גלייבן נישט בה' ובתורתו" ס'איז יש ויש. און רוב גלייבן יא.

[מאטי]

נו, אויף דעם זאגט דאך שוין חז"ל "אין חבוש מתיר עצמו..." אין ניו יארק איז מען דען יא אזוי מקפיד אז די וואס גיבן הילף פאר היימישע אידן זאלן זיין מאמינים בה'?

[איש את רעהו]

זיי האבן אבער פארגעסן צו אדרעסירן דעם פראבלעם פון נישט קענן ארבייטן איידער מ'גייט אין צה"ל.

זיי האבן בכלל נישט פארגעסן

ווען זיי ווילען טאקע אונז בעסער מאכן און נאכגעבן פאר די חרדים, לאזן זיי יעדעם נעמען ארבעט בעפאר גיין אין צה''ל, וזהו
ביז אהין קען @יואב קיין פארקויפען לאקשען פאר אנדערע

[יואב]

זיי האבן אבער פארגעסן צו אדרעסירן דעם פראבלעם פון נישט קענן ארבייטן איידער מ'גייט אין צה"ל.

זיי האבן בכלל נישט פארגעסן

ווען זיי ווילען טאקע אונז בעסער מאכן און נאכגעבן פאר די חרדים, לאזן זיי יעדעם נעמען ארבעט בעפאר גיין אין צה''ל, וזהו
ביז אהין קען @יואב קיין פארקויפען לאקשען פאר אנדערע

פרייע קענען יא קריגן ארבעט אפילו אויב זיי גייען נישט אין מיליטער?