רעדע: סטעיט אף די יוניאן

[קינד_אן_קייט]

אונזער פרעזידענט ירום הודו, גיבט היינט אפ זיין יערליכע סטעיט אף די יוניאן רעדע, אזא מנהג נאך משנים קדמוניות ווי ער ברויך געבן א רעפארט פאר׳ן פאלק און ווי ער שטעלט פאר זיין אגענדע.

אזוי צוהערנדיג יעצט אויפדערנאכט צו בלויז עטליכע זאצן, קומט עפעס פאר כאילו ווי דער גאנצער שמועס איז פארוואנדלט געווארן אין א פארמאליטעט וואס איז פוסט און קאמיש. מעגליך אז מיין ציניזם אנטענע איז פארהאנקעט און פייפט צו הויעך, אבער די ליידיגע סלאגאנען גריצלן שוין ארויס פון די נאז אזש אז זיי זענען ניטאמאל ווערט צו ווערן אנגערופען אפילו בלויז בשם ׳רעטאריק׳.

אנדערש ווי אין א וואל יאר אדער אין צייטן ווען עס קומען פאר ערנסטע פאליטישע אדער וועלטליכע געראנגעלנישן און די נושאים טראגן כאטש עפעס א געוויכט, באשטייען רוב ווערטער (נישט נאר סטעיטמענטס) פון ליידיגע סלאגאנען און זענען גענצליך נישט איבערצייגנד.

די סאונדטרעק איז אבער נישקשה, אנשטאט לאכעריי קומט דאס באגלייט מיט (פאליטיש באצאלטע) אפלאדירונגען יעדע ניינציג סעקונדעס, אין א פארזוך סיי אנצופילן די צייט און סיי צו פארשאפן א מעגליכקייט ווי די טענער זאלן זיך קענען העכערן (מער פרעזידענטליך).

אפילו דער נאמען גופא איז א חוכא וטלולא, יוניאן? וואס זענען מיר ליימענע גולמים?

איה הטיח אשר טחתם, לא מיניה ולא מקצתיה.