נייע פאטענט - אנצינדן א לעקטער אום שבת בהיתר?

[לעיקוואד]

[tag]מור וקציעה[/tag]
גערעכט, איך האב געשריבען אז אנדערע ווי הרב אלבום לויט דער ווידיאו פון עם וואס זיי האבען האלטן אז עכ"פ להלכה איז עס מותר, רעכענדינג זיך מיט די אופן ווי זיי ברענגען הסכמות פון אנדערע מאכט א פקפוק אויך אין די וואס זאגן קלאר לכאורה להיתרא, ווילאנג איינער שרייבט נישט קלאר א תשובה להלכה וואלט איך נישט געטראסט די סארט צעטלעך וואס זיי האבן. די ליסטע וואס איר מאכט האב איך נישט אזוי דורכגעקוקט ווייל איך האב נישט געהערט פון די אלע רבנים, קען זיין זי זענען גרויסע פוסקים אבער מיר זענען זיי בכלל נישט באקאנט.

[לעיקוואד]

גארנישט קיין סארקאזם, דאס הייסט סירקולאר ריזאנינג. האסט געזאגט אז דוקא א סוויטש הייסט בונה און נישט צומאכן א ארעם באנד, וויבאלד די סוויטש טוט א פעולה וואס מאכט אז ס'זאל "קענען מקבל זיין אן אסור'דיגע זאך", אבער עלעקטריק איז לעולם נאר א "איסור'דיגע זאך" וויבאלד ס'איז בונה. וויאזוי ארבעט דאס?

לעולם זאלסטו וויסן אז יעדע מאל דו רירסט אן סיי וואסערע זאך אום שבת שאפסטו אן עלעקטריקעל סירקוט (סיידן דו טראגסט שיך מיט ראבערנע זוילן), וואס ערמעגליכט עלעקטראנס אריבערצולויפן פון דיין האנט צום אביעקט וואס דו רירסט אן און פארקערט, און די זעלבע מיטן ברעיסלעט אויך. די נ"מ איז נאר וויפיל, ווי שטארק, און וויפיל פרעשור ס'איז דא אין די לויפענדע עלעקטראנס.

נ.ב.:אויב דו ווילסט פארשטיין וויאזוי עלעקטריק'ל דיסטריביושן ארבעט, דארפסטו אדורכלערנען דעם שו"ת ספר פון הגרש"ז אויערבאך זצ"ל ביי הילכות שבת.

סארקאזם?

לכאורה אין הגדרתו בונה ווייל עס מאכט א דבר אסור נאר ווייל עס מאכט א זאך בכלל, דער חילוק פון א ארעם באנד מיט א סירקאט איז אז מיט א סירקוט געשעהט עפעס, דאס מאכט א לייט זאל ארבעטן וכדומה, ממילא האט דער בנין פון דער סירקוט א שם מלאכה, משא"כ סתם צומאכן א באנד, אדער אפילו סתם מאכן א לעקטרישע סירקוט לשם הסירקוט עצמו אין זה מלאכת בונה.

[מור וקציעה]

1)הג''ר אלי' בן-חיים [שכתב בין השאר וז''ל השימוש במתג זה רצוי מאוד מכיוון שיביא לכל בית עונג שבת כך שכל אחד יוכל לכוון במדויק את שעת הדלקה וכבוי האור וגם יביא לחסכון גדול של צריכות חשמל בשבת וכפי הידוע: התורה חסה על ממונם של ישראל ]

2)הג''ר פנחס זביחי [ וז''ל יש בו גם משום עונג שבת כדי שיוכלו כל אחינו בית ישראל די וכל אתר ואתר להשתמש בחשמל על צד הטוב ביותר ללא שום חשש כלל ועיקר ]

3)הג''ר שמעון חי אלוף [שמצטרף ומוסף להנ''ל]

4)הרב אליהו קצביאן [כנ''ל]

5)הרב יוסף ביטון

6)הרב שלמה שוב

7)הרב פרץ שטיינברג

8)הרב אברהם ניסאיון

9)הרב מאניש פרידמן

10)הרב יגאל חימוב

11)הרב ניסים בסליון

ועוד

לפי ידיעתי זענען זענען רבנים אזוי ווי הרב זביחי און הרב בןחיים שטארק אנגענומענע רבנים אין די ספרדישע גאס

איך האב מיך אסאך געדרייט אין א"י און איך בין באקאנט מיט זייערע ספרדישע פוסקים, און איך האב נאך קיין איינמאל געהערט פון איינע פון די אלע רבנים,
וואו זענען זיי רבנים וכו'?

רובם ככולם מכהנים ברבנות בארה''ב ניו ז'ורסי וניו יורק חוץ מהג''ר פנחס זביחי בעל עטרת פז מגדולי התלמידים של מרן רבי עובדיה [שמביאו בספרו הגדול יביע אומר בהערצה וחיבה יתירה] ומבכירי רבני תנועת שס שמתגורר סמוך לבית מדרשו בירושלים

[כוכב]

דער עפיזאד ווי ער פרובירט אריינצושלעפן א שבת גויטע אין זיין בעדרום איז איינס און א גוטס... איך האב אויך געהאט אזא געשיכטע אלס בחור. עס האט מיר גענומען א פאר מינוט צו כאפן ווי awkward איך בין געווען, צו פרובירן אריינרופן א מיידל צו מיר אין שטוב...

[איטשע]

בונה ביים פארענדיגן א קלויזד סירוקט, איז דער צוגאנג פון דער חזון איש.
הרב אויערבאך, האט זיך שטארק געדונגען דערויף. אין מאורי אש, האלט ער אויך אז דער איסור פון בונה פון דער חזו״א איז בלויז ווען מען שפארט צו א סירוקט בידים אין דער רצון איז עס זאל בלייזן געשלאסן לעולם ועד - בלויז דעמאלטס איז עס בונה. ווייל אויב איז די ציל עס אויפצולעהזן דאן איז עס דאך נישט קיין בונה.
לדוגמא, אנצינדען די לייט, איז בונה, ווייל אפילו די לעשט עס אויס איז עס בלויז צו שפארן געלט.
ווידער אנצינדען א פען, איז נישט בונה, ווייל ווען די קילסט דיך אפ לעשטו עס אויס.

לפי זה, רוקן די פלעסטיק איז בפירוש נישט קיין בונה, ווייל די טוסט גארנישט. ביזט ס״ה אפשר ״גורם״ א בונה, אויב עס הייסט גרמא.

למעשה גייען עס די רבנים נישט מתיר זיין, ווייל עס איז נישט שבת׳דיג.
הגם! ווען אינדערהיים זענעם גוים געקומען, גערוקט געצינדען פארלאשן לעכט. דאס איז געווען גאנץ שבת׳דיג.
שבת זייגערס צוינדען זיך אן און לעשן זיך אויס איז גאנץ שבת׳דיג.
גיי פארשטיי - דאס איז די היינטיגע וועלט.

נאכמער רוב רובן פון היינטיגע רבנים, האבן א קנאפע ידיעה אין די ברייטפארצווייגטע פעלד אין עלעקטריק, און אסר׳ן איז דער איזי וועי אויט.

[הבא ללמד]

דער עפיזאד ווי ער פרובירט אריינצושלעפן א שבת גויטע אין זיין בעדרום איז איינס און א גוטס... איך האב אויך געהאט אזא געשיכטע אלס בחור. עס האט מיר גענומען א פאר מינוט צו כאפן ווי awkward איך בין געווען, צו פרובירן אריינרופן א מיידל צו מיר אין שטוב...

@כוכב איך האב געציטערט אלטס בחור נאר צי רעדען צי א מיידעל, ווער רעדט נאך פין אריין ריפען

[געוואלדיג]

נו ונמצא למד...

[שלמה המלך]

WOW מ'קען עסען ראגעלעך פסח, מ'קען אנצידען/אויסלעשען לייטס אום שבת!
איך קען קוים ווארטען אויף די פעטענט וואס מ'גייט מעגען עפעס גאר געוואגט!! אשאד איך בין געבוירען אזוי פרי

שלמה המלך: איך קען דיר אויסרעכענען נאך עטליכע אינטרעסאנטע זאכן וואס וועלן מותר ווערן דורך נייע אינווענשאנס אדער "לופהאולס" אין הלכה. נאר דאס באלאנגט אין מאחורי הפרגוד...

נו???? ווילאנגט זאל איך ווארטען אויף דיר דארט?

[berlbalaguleh]

איטשע: דאס איז טאקע דער חילוק פון הרב אויערבאך ביז די מערסטע פון די היינטיגע רבנים, וועלכע ווילן זיין "פאליטיקלי קארעקט" און אכשר דרא'דיג. אבער זענען זיך נישט מעמיק צו פארשטיין די טעכנישע חלקים פון א שאלה אין הילכות שבת אדער אנדערע הלכות פון די ד' חלקי שולחן ערוך. משא"כ הרב אויערבאך זצ"ל האט זיך אייביג אדורכגערעדט מיט אינזשענירן און דאקטוירים איידער ער האט געפסק'נט א קאמפליצירטע טעכנישט אדער מעדיצינישע שאלה...!

[עדיאל]

אחרי ככלות הכל, פוסקים, בונה, סערקוט, פולסן, וואס ס'איז נוגע למעשה איז אז היימישע רבנים האבן דא מתיר געווען די שבת סוויטש לצורך חולה שאין בו סכנה, און דאס גייט פונדאמענטאל טוישן אונזער שבת.
אנדערש ווי א שבת עלעוועטער, וואס איז נאר דא אין שפיטאל און ביי נישט היימישע רעזידענצן, גייט דער שבת סוויטש אריינקומען אין די שענסטע היימען, לצורך דער עלטער זיידע וועלכער ברויך דאס און ער איז דאך א חשאב"ס. איינמאל ס'איז שוין דא, און מ'פליקט שוין ארויף און אראפ, ווערט עס שוין א לכתחילה.
נאכמער, שטייינדיג נאך די ששון טראגעדיע, און איינזענדיג די סכנה פון א האט-טרעי, וואלט אפשר געווען כדאי אז מ'זאל לכתחילה אויסלעשן די האט-טרעי פאר מ'גייט שלאפן. א סכנת מוות איז נאך אזוי הארב ווי א חשאב"ס. איי מ'קען דאך היינט אויך לייגן א שבת זייגער צו פארלעשן, וועם אינטערעסירט א שבת זייגער ווען ס'איז דא א שבת סוויטש.
מיר זענען אויפגעוואקסן אז שבת טאר מען נישט אנצידן קיין לייט. דאס גייט זיך ענדיגן. די קומנדיגן דור גייט מעגן אנצידן א לייט, אויסלעשן עירקאנדישן, און רעטשארדשן טעלעפאנען.
די מכשולות וואס גיין ארויסקומען דערפון זענען זלזול אין שבת קודש און א פריצת גדר וואס קען צוברענגען צו מלאכות. אז מ'גייט באבערן מיטן האט-טרעי ארויף און אראפ גייט מען צוקומען צו בישול, בלי ספק. מ'קען זיך פארשטעלן איינער שטעקט אריין א וועקיום קליענער אין א שבת אוטלעט און וועקיומט. איך ווייס נישט וואס די מלאכה פון וועקימען איז, אבער ס'שפירט זיך זייער וואכנדיג.
די טעם פאר וואס מ'האט גוזר געווען מוקצה איז צו מרחק זיין א מענטש פון די וואכנדיגע עניינים. די שבת סוויטש טוט אויף דאס פארקערטע.
טעכנאלאגיע איז א גוטע זאך, אבער אויב דאס גייט גורם זיין אין א זלזול אין שב"ק האט זיך עס נישט געלוינט.

[[NAMELESS]]

בנוגע א האט פלעיט דארף מען שוין דן זיין וועגן דיני חזרה.

[נופת צופים]

WOW מ'קען עסען ראגעלעך פסח, מ'קען אנצידען/אויסלעשען לייטס אום שבת!
איך קען קוים ווארטען אויף די פעטענט וואס מ'גייט מעגען עפעס גאר געוואגט!! אשאד איך בין געבוירען אזוי פרי

שלמה המלך: איך קען דיר אויסרעכענען נאך עטליכע אינטרעסאנטע זאכן וואס וועלן מותר ווערן דורך נייע אינווענשאנס אדער "לופהאולס" אין הלכה. נאר דאס באלאנגט אין מאחורי הפרגוד... [emoji38]

@בערל: אפשר מאחורי עניינים גייען ווערן מותר אבער איין איסור גייט אייביג בלייבן בתקופה און דאס איז ציונות, ניין? קענסט דיר פארשטעלן אמאל צו זעהן אמת'ע ערליכע אידן אשער לוא קאראי לאבאאל ביים כותל ח"ו היו לא תהי'

[ישמעאל הכהן]

IMG-20150420-WA0062.jpg

[שמעקעדיג]

מ'קען זיך פארשטעלן איינער שטעקט אריין א וועקיום קליענער אין א שבת אוטלעט און וועקיומט. איך ווייס נישט וואס די מלאכה פון וועקימען איז, אבער ס'שפירט זיך זייער וואכנדיג.

עס איז פאראן א ענין פון עובדא דחול וואס איז אסור.
פונקט ווי דו זאלסט אנצינדן א וועקיום דורך א שבת זייגער.

[[NAMELESS]]

א וועקיום קלינער אפילו דורך א שבת זייגער איז לכאורה אסור אלץ השמעת קול.

[נהורא נפישא]

שוין געווען וואס האבן זיך געפרייט מיט הרב הארפענעס, שטעלט זיך ארויס אז ער איז גאר מחמיר מער פון אנדערע, אז א חולה דארף משתדל זיין דאס איינצושאפן מכח דעם דין פון הקל קל תחילה.

[לעיקוואד]

דער קל הקל תחלה איז סתם עמארצות ואינו ענין לכאן כלל. ומעולם לא שמענו שיש להעדיף לעשות מלאכות בגרמא לחולים. די גאנצע מעשה מיט די פשעטל אז די סארט זאכן זאל מען נוצען פאר חולים איז אז הרב רוזן מיט הלפרין דארפן וואס צו טוהן מיט זייערע פאטענטן נאכדעם וואס רוב רבנים האבן מכריע געווען אז עס איז נישט מתיר דער איסור נו וואס וועט זיין מיט די גאנצע ביזנעס זענען זיי געקומען מיט דער איינפאל פון חולים.

[נהורא נפישא]

הרב הארפענעס געוויס איז מודה אז מצד מלאכת שבת איז דאס מותר לגמרי, ער באציעט זיך בעצם אינעם ערשטן בריוו אויך לגבי חולים און פון אנשים רגילים רעדט ער נישט לכאן ולכאן, ס"ה די ריזענינג וואס ער גיט אן לגבי חולים איז גילטיג פאר יעדען איינעם, למעשה איז ער זיך מסביר אז ער האט טאקע נישט מתיר געווען בסתמא, וועגן זילותא דשבתא וכדומה, נאר וואסזשע דעם ער האלט אז עס איז אכשר דרא אז מ'קען צושטעלן מתחלה פאר א חולה אז די מלאכות זאלן געטוען ווערן באופן המותר, פארוואס עמהארצות? ער האלט אז מען זאל מהדר זיין לויט די דעה אז שבת איז הודחה און נישט הותרה אצל חולים וואס דאן איז מען מקפיד באופן שאין בו דיחוי צו רעדיצירן ווי ווייט מ'קען חילול שבת

[שמערל]

נאכדעם וואס רוב רבנים האבן מכריע געווען אז עס איז נישט מתיר דער איסור נו וואס וועט זיין מיט די גאנצע ביזנעס זענען זיי געקומען מיט דער איינפאל פון חולים.

כנהורא ועוד, איז דען דא א רב וואס האט שוין אפגעשריבן א נארמעלע תשובה פארוואס די פאטענט איז בפועל "אסור"? אדער זייער כח עס נישט מתיר צו זיין שטאמט אפשר פונעם זעלבן כח וואס זיי האבן נישט מתיר צו זיין ב"ק?

[ליטוואק פון בודאפעסט]

דער עולם דערמאנט דער סברא פונ'ם חזו"א וועגען בונה, נישט ברענגענדיג דער זאך בשלימותה. ער בויעט נישט קיין סברא פון זיך אליינס אז דאס זעט איהם אויס ענדליך צו בונה, און כיפערדיג דער גאנצע הלכה'דיגע פראצעס, קומט אויס מיט א פולקאמער איסור. ער בויעט עס קודם אויף ראשונים מיט א סברא פון מיטה של טרסיים. דער יסוד פון בונה לויט איהם איז: צוזאמשטעלען צוויי זאכען וואס מאכט א נייע זאך א נייע השתמשות. קוקסט אין דער בוך פון בנימין בראון – החזון איש הפוסק, המאמין ומנהיג המהפכה החרדית פון עמ' 569 און ווייטער ווי ער באשרייבט עס שיין.
דער ברענגען א 'מחלוקת חזו"א און הגרשז"א' איז אביסל נישט אין פלאץ. ס'איז א דור גערוקט, און הגרשז"א איז אזוי משועבד צום חזו"א ווי אונז זע'מיר. אויב ס'איז שטארק נוטה לחלוק עליו מעג און דארף ער חולק זיין. אבער צו אונז וואס ווייסען נישט איז דאס ניטאמאל א מחלוקת.
דער איסור דרבנן האט מיר אלס געשטערט. אויב ס'איז נישט דאורייתא, ט'ווי ווערט עס א דרבנן? ווען האבען דער רבנן עס גע'אסר'ט? ווי הייסען די רבנן? טאמער איינער קען מיר צושטעלען א מראה מקום דערצו, וואלט איך געווען דאנקבאר.
מ'זעט אויך כמה גדולים דברי חכמים. דער חזו"א האט געזאגט פאר איינער 'מ'מיינט דער איסור פון עלעטריק שבת שטייט און מ'דארף יעצט זוכען התירים. ניין, ס'איז בכלל נישט באשטעטיגט. מ'דארף נאך זוכען דער איסור'. נארמאל לייגט זיך נישט אויפ'ן שכל אזא זאך. יעדער קינד ווייסט אז מ'טאר נישט אנצינדען א לעכט שבת. נאר יעצט זעט מען אז למעשה ביים עולם הערשט א רייץ דאס אונטערצוברענגען, נישט ווי אלע אנדערע איסורים. מ'האלט נישט אין איין זוכען וועגען צו קענען קאכען שבת צו וואס, נאר פאר עלעקטריק. און ער איז מסביר ווייל ס'איז נישט איינגעבאקען ביים עולם. (אויך ביי די שקצים אין וומסב"ג זוכט מען אונטערצוברענגען דער מלאכה גרועה פון טראגען אין גאס, אבער דאס איז אן אנדערע שמועס און מ'איז מקיים דער חובת מחאה ע"י שלוחא דרבנן וואס שרייען אן דער וואס מ'דארף)
לגבי די אלע רבנים וואס זענען מתיר. נארמאל פארשטייט מען אז א דבר התלוי בסברא, און בפרט האקעלע סברות וואס זענען נישט מפורש, זאלען נישט בלייבען אין די הענט פון סתם רבנים וואס קענען טעפעל לעפעל און אפילו די וואס קענען אפילו דרייען אביסל מיט'ן גראבען פינגער. דאס איז פאר אנגעזע'ענער רבנים וואס קענען שו"ע בעיון און האבען א יד ואחיזה אין א סברת הפוסקים. דאס קומט נישט מיט'ן סמיכה און נישט מיט'ן ירושה. פאר דעם דארף מען הארעווען און פלאגען יארען לאנג ולא יניח שינה בעיניו ותנומה לעפעפיו וכו' ווי דער לשון הרמב"ם גייט. ס'איז נאך דא אזעלכע אבער ביז מ'ווייסט נישט אויף איינער אז ער איז אזוי, זאגט רוב און חזקה אז ער איז נאך נישט דארט.

[געפילטע פיש]

דיין סברא אויף ווער ס'מעג פסק'נען 'האקעלע' הלכות שבת דארף א מקור. די סברא זאגט אז יעדע מענטש וואס קען די הלכות און ווייסט וויאזוי נאכצוקוקן די מקורות זאל קענען אפמאכן וואס הלכה זאגט.

[ליטוואק פון בודאפעסט]

וכי מפני שאנו מדמין נעשה מעשה? סברות האבען א גרעניץ, און דער וואס האט עס נישט געלערנט פונ'ם באהאלטענער חלק פון פסק, קען עס נישט. פונקט ווי דער למדן וואס קען נישט די סוגיא קלאר, מעג. נישט פסקנ'ען מסברא, אזוי אויך דער קענער וואס פארשטייט נישט קען נישט מדמה זיין נער מכח דער קענשאפט. און פונקט ווי איינער אן אויגען קען נישט זען.

[לעיקוואד]

נהורא, שמעריל, יא עס איז דא. איך וועל נאכקוקען א משהו שפעטער. דער עיקר שמועס דריייט זיך אויב די פאטענט מאכט עס בכלל פאר א גרמא און אויב דאס רעכנט זיך בכלל פאר א היתר להלכה. אמת לויט די אוסרים - שכן מסתבר ואכמ- קומט אויס עס העלפט נישט קיין חולה אויך נישט, פאר דעם קלער איך אז למעשה אדער איז מען נאר מתיר צו געבן איבעריגע ביזנעס פאר מכון צומת אהגם עס איז נאר מותר במקום שמותר לחלל שבת אדער טאקע הטלט מען בעצם איז מותר. עס איז טאקע אומקלאר א משהו צריך לברר. לדידי זעהט דער גאנצער היתר פון גרמא דא גאר רחוק מן השכל וכן שמעתי וראיתי מכמה פוסקים חשובים.