די שטורם וואס האט זיך אנגעהויבן אנטוויקלען אין די לעצטע פיר און צוואנציג - זעקס און דרייסיג שעה האט זיך פארשטארקט אין די לעצטע עטליכע שעה צו א שנעלקייט פון איבער 200 מייל א שעה מיט ווינד גאסטס פון 248 מייל א שעה, די שטערקסטע האריקעין וואס איז סיי ווען געמאסטן געווארן.
די נאציאנאלע האריקעין צענטער וואס איז געשטעלט נאכצופאלגן האריקעינ'ס אין די אטלאנטיק און מזרח פאציפישן אקעאנען האט באצייכנט די האריקעין אלס פאטענציעל קאטאסטראפיש און 'אומגלויבליך'.
די שטורם גייט אין ריכטונג פון מערב מעקסיקא מיט א שנעלקייט פון ניין מייל א שעה. מעטעאראלאגן דרוקן אויס זארג און שרעק איבער דריי מעקסיקאנער שטאטן כאַליסקאָ, קאָלימאַ און נאַיאַריט און די 400,000 וואס וואוינען אין דעם דירעקטן וועג פונעם האריקעין.
אין די לעצטע אנדערהאלבן טאג איז די לופט דרוק אין צענטער פונעם האריקעין (וואס העכערט די ווינט שנעלקייט) געפאלן 115 מיליבארס, פון 994 צו 880, מעגליך די שנעלסטע פארשטארקערונג אין היסטאריע. פון 100 מייל א שעה צו איבער 200 מייל א שעה אין ווייניגער ווי פיר און צוואנציג שעה. גלייך נאכדעם וואס די פליגעצייג וואס מעסט אזעלכע שטורעמעס האט פארלאזט די אויג פונעם שטורם האט א סעטעלייט וואס פאלגט נאך די האריקעין געמאסטן פעטרישע'ס שטארקייט ביי 8.3 ברעכענדיג די דוואראק וואג וואס גייט נאר ביז 8.0!
- די האריקעין ווערט געמאסטן ביי א שטארקייט פון 8.3 אויף א וואג פון 8.0!
פעטרישע שטייט יעצט ביים טעארעטישן גרעניץ פארן שטערקסטן טראפישן שטורם אויף פלאנעט ערד.
די איינציגסטע גוטע נייעס איז אז די שטערקסטע און שעדליכסטע ווינטן וואס זענען קאנצענטרירט אין די מיטל פונקט פון די שטורם, איז בלויז בערך פופצן מייל ברייט.