פאראדאקס: חרדי'שע לעבנסשטייגער און איר קעגנערשאפט צו סענדערס

[הוגה]

[justify]איך בין פאר א רגע ארויפגעגאנגן אויף אייוועלט און ערשטוינט געווארן צו זעהן וויאזוי מען רעדט דארט פון בערני סענדערס, און די פאקט אז ער האט שטארקע שאנסן צו זיין דער נעקסטע אמעריקאנער פרעזידענט. עס איז נאר doom and gloom איין תגובה נאכן אנדערע. עס קען זיך דאכטן אז מען רעדט דארט פון עפעס א גזירת גירוש אדער פון די נעקסטע היטלער ה"י. מענטשן קענען נישט פארשטיין וואס איז געשעהן מיט האלב אמעריקא, ווען זענען זיי אזוי משוגע געווארן אז זיי זענען גרייט ח"ו אויפצונעמען א "סאציאליסט" אלץ פרעזידענט היל"ת. די שרעק און פחד שוועבט דארט אין די לופטן.

דער אמת איז אז אייוועלט שפיגלט ס"ה אפ וואס טוט זיך אין ביהמ"ד. רוב היימישע עולם רעדט פון בערני ווי פון "יענע מחלה" רח"ל. אויב פרובירט איינער אים צו פארטיידיגן אביסל כאפט ער קאלטס און ווארעמס פון אלע זייטן. "זיי נישט אזא אויבער-חכם! דו ווילסט טאקע א סאציאליסט אלץ פרעזידענט? נאר דאס פעלט אונז אויס. עס וועט צוריקנעמען אמעריקא צו די מיטלאלטער וכו' וכו'."

איך גיי נישט אריינגיין אין די נושא פון בערני'ס פאליסיס צי עס איז גוט פארן לאנד אדער נישט. איך גיי אויך נישט אריינגיין אין די נושא אויב בערני וועט בכלל קענען אדורכפירן סאציאליסטישע רעפארמאציעס אלץ פרעזידענט. איך וויל אדרעסירן דער נושא פון א ריין חרדי'שע פערספעקטיוו. וואס איז גוט פאר אונז היימישע אידן? וויאזוי דארף א היימישע איד צוגיין צו די דאזיגע וואלן? וואס האלטן נידערמאן, גלאנץ, נאווימינסקער רבי וכדומה? כדי דאס צו טון דארף מען אבער קודם אדורך טון אן עטוואס ווייטאגליכע נושא וואס בעצם השתיקה יפה לה, אבער עס קען נישט שאטן צו זיין אביסל אויפריכטיג אמאל א יובל און רעדן מיט אן honesty און אויפריכטיגקייט.

עס איז נישט קיין סוד פאר קיינעם אז א גרויסע טייל פונעם היימישן עולם איז אנגעוויזן אויף רעגירונג'ס פראגראמען. מען קען אפילו זאגן אז רוב רובו פונעם עולם האט עפעס א גאווערמענט פראגראם. אין קרית יואל אליין איז באריכטעט אז העכער ניינציג פראצענט פון די ארטיגע איינוואוינער זענען אנגעוויזן אויף מעדיקעיד. עס איז אויך נישט קיין סוד פאר קיינעם אז טייל מאל ווערט דער אמת אביסל אויסגעצויגן אויף רעכטס און לינקס כדי מען זאל קענען קוואליפיצירן פאר די דאזיגע פראגראמען.

ליידער האבן אסאך שונאי ישראל שוין פרובירט אנצודרייען א שטינק און אנצייגן אז אסאך נעמען די פראגראמען שלא ביושר. זיי האבן אנגעצייגט אז דער לעבנסשטייגער פון היימישע אידן, נייע קאר ליעס יעדע דריי יאר, הייזער פאר 400-800 טויזנט דאלער, פריוואטע סקולס, צען קינדער וכו', מוז קאסטן אסאך מער ווי די נישטיגע סכום וואס מען גיבט אריין כדי מען זאל קענען קוואליפיצירן פאר די פראגראמען. באמת איז טאקע שווער, איז דען ריכטיג צו שווינדלען און אויסנארן די רעגירונג? וואס איז מיט כח הפועל בנפעל? וואס איז מיט אמונה ובטחון? דאס זענען אלץ גוטע קשיות וואס מיר וועלן לאזן די צדיקי ומנהיגי דורינו זיך ספראווען דערמיט און פארענטפערן.

למעשה, וואס פארשטייט א גוי צו די צרכים פון א אידישע משפחה? קען דען א אידישע משפחה מיט אכט אדער צען קינדער לעבן אויף פערציג-פופציג טויזנט דאלער א יאר? טראכט אריין פאר איין רגע, רענט אדער מארטגעזש פאר א 5 בעדרום דירה צוזאמען מיט יוטיליטיס און הויז אינשורענס אליינס איז שוין העכער פערציג טויזנט דאלער. ווער רעדט נאך פון עסן און קליידער פאר אזא קינדער-געבענטשטע משפחה? און וואס טוט זיך מיט שכר לימוד פאר ישיבה און סעמינאר? די הוצאות שבת ויו"ט? חתונה מאכן?

א יעדער איינער ווייסט אז 35 יעריגע היימישע איד א בעל משפחה וואס מאכט הונדערט פופציג טויזנט דאלער דעקט קוים דעם חודש. און דאס איז נאך פארן אנהייבן טראכטן פון אוועקלייגן א דאלער אויף חתונה מאכן די קינדער. ממילא איז דער איינציגסטע וועג צו סורווייווען דורכן נעמען פון די רעגירונג. אנדערש איז פשוט אוממעגליך.

א חבר מיינער איז א מלמד און א טיטשער, ער מאכט פופציג טויזנט דאלער א יאר. זיין ווייב האט א פארט-טיים דזשאב און זי מאכט נאך צוועלף טויזנט. זיין זוממער דזשאב גיבט אים נאך צען טויזנט דאלער א יאר. ביידע זענען גאר פלייסיגע ארבייטער, זיי נוצן אויס א יעדע מינוט אין טאג. וויאזוי דארף ער צו קענען אויסהאלטן א משפחה מיט ניין קינדער אויף א יערליכע געהאלט פון צוויי און זיבעציג טויזנט דאלער? ספעציעל ווען לכה"פ צען פראצענט גייט אראפ פאר טעקס! בלית ברירה מוז מען ארבייטען שווארץ, אזוי שפארט מען זיך די טעקסעס און אינאיינוועגס באקומט מען רעגירונג'ס פראגראמען. טעקס ריטורן איז דרייצן טויזנט. פוד סטעמפס און וויק איז פופצן טויזנט. וואוטשערס און דעי קעיר שפארט אים איין צוואנציג טויזנט. מעדיקעיד שפארט אים איין פופצן טויזנט. דאס גיבט אים א סך הכל פון הונדערט פינף און דרייסיג טויזנט דאלער, פונקט גענוג צו קענען ערפילן זיין שפארזאמע לעבנ'ס געברויכן.

דאס איז נישט נאר מיין חבר'ס געשיכטע, דאס איז דער נחלת הכלל. דא איז נישט דער פלאץ אריינצוקריכן אין די סיבות פארוואס דער מצב איז אזוי, נאר צו זעהן אז אזוי איז דער מצב. עס גייט שוין אזוי פאר לאנגע יארן און עס זעהט נישט אויס אז עפעס וועט זיך טוישן אין דער נאנטע צוקונפט. עס איז סימפלי נישט דא קיין אנדערע וועג. צוליב דעם זענען דא מערערע ארגעניזאציעס אין א יעדע היימישע געגנט (ווי אויך אין די ארימע געגענטער פון א יעדע סארט געמיינדע איבער אמעריקא) צו העלפן מענטשן וואס דארף הילף אז זיי זאלן זיך אוועקשטעלן אויף אן אופן אז זיי זאלן קוואליפיצירן פאר די הילף וואס דער מלכות של חסד וויל זיי געבן. פאר דעם זענען דא איינגעשטעלטע אין יעדע איינציגסטע היימישע מוסד וואס זייער דזשאב איז צו מאכן זיכער אז ווי מער פונעם עולם קוואליפיצירט פאר וואוטשערס, לאנטש פראגראם, עפטער סקול פראגראם, פרי קעי, דעי קעיר, טייטל וואן, טעפ, פעל וכדומה.

עס איז נישט בא'טעמ'ט אז מיר לעבן אין אזא ביטערע מצב, אבער דאס איז דער מציאות.

קומט אן עפעס א משוגענער פון ווערמאנט און טענה'ט אז ער וויל ווערן פרעזידענט, און ווען ער וועט זיין פרעזידענט וועט ער איינפירן נייע געזעצן וואס וועלן צושטעלן די אלע פראגראמען פאר דעם היימישן ציבור אן דעם וואס מען זאל דארפן זאגן ליגנט אדער שווינדלען. מען וועט מער נישט דארפן שטיין אין ליין אין די רעגן פאר לאנגע שעות אין מאנטיסעלאו כדי צו באקומען סעקשאן אכט. איר וועט מער נישט דארפן זיך מאכן ווי איר גייט דארט וואוינען ווען בעצם וואוינט איר און איר פלאנט לכתחילה צו וואוינען אין וויליאמסבורג אדער בארא פארק. סענדערס פלאנט אייך צו דעליווערן סעקשאן אכט גראד קיין ראדני און הופפער.

סענדערס זאגט אז ער גייט איינפירן אז איר קענט מאכן אלע אייערע געלטער ווייס אויף די ביכער, איר דארפט מער נישט באהאלטן איירערע געלט אין גמחים וואס קענען אנזעצן אייער גאנצע פארמעגן, נאר איר וועט עס קענען האלטן ווייטער אין די באנק. איר וועט מער נישט דארפן זיין אויף ביינאכט אין פחד אז מען וועט אייך ארעסטירן פארן נישט באצאלן טעקס אדער נעמען פראגראמען אומלעגאל. סענדערס זאגט אז ער פארשטייט אז מען קען נישט לעבן אויף א געהאלט פון זיבעציג טויזנט דאלער. סענדערס זאגט אז איר וועט קענען מאכן די זיבעציג טויזנט אן באצאלן טעקסעס און איר וועט ווייטער באקומען מעדיקעיד און פוד סטעמפס.

בקיצור, דער משוגענער זאגט אז איר וועט קענען טון אלעס וואס איר טוט ביז היינט, נאר פון היינט און ווייטער וועט עס זיין לעגאל און נארמאל! און דער משוגענער האט גראדע א גאר שטארקע שאנס צו געווינען! עס וואלט געווען ערווארטעט אז מיר זאלן זיין די גרעסטע סענדערס שטיצער. נידערמאן וואלט געזאלט זיין אפיציעלע ליעזאן. בעני פאלעטשעק וואלט געדארפט האקן ארטיקלען אויף זיין בלאג טאג און נאכט. ק"ש און א"וו וואלטן געדארפט זיין די גרעסטע ריקרוטינג צענטערן פאר סענדערס וואלונטירן.

דערווייל עולם הפוך ראיתי. דער עולם גייט ארום פארכמורערט און פארזויערט. "דער אייבישטער זאל שומר ומציל זיין אויב דער סענדערס געווינט חס ושלום" זאגט איינער. "סענדערס וויל אז רוב עולם זאל זיין אנגעוויזן אויף גאווערנמענט הענדאוטס" זאגט דער צווייטער. "איך גיי וואוטען פאר קלינטאן אין די פריימעריס כאטש איך האב איר פיינט אבער אלץ בעסער ווי סענדערס חלילה".

וואט דע העק??? רוב עולם איז אנגעוויזן אין גאווערנמענט הענדאוטס!!! סענדערס וויל גארנישט טוישן. סענדערס פארשטייט פשוט וואס מיר פרומע אידן פארשטייען שוין פאר דרייסיג יאר, אז דאס איז די איינציגסטע וועג צו סורווייווען. איז דא עפעס א מסורה איז מיר מוזן גנב'נען? האלב אמעריקא איז משוגע? גאנץ חרדי'סטאן איז צידראדעלט! אנשטאט זיך צוכאפן צו דעם קאנדידאט וואס וועט זיין די בעסטע פאר דעם היימישן עולם, בארעדט מען אים נאך ווי כאילו ער וואלט געווען דער וואס בא'גנב'ט די רעגירונג. וואו איז אגודת ישראל? פארוואס שטייען זיי נישט מיט סענדערס? זיי זענען דאך די וואס זיצן אין אלבאני און וואשינגטאן און שתדל'ן פאר פראגראמען פאר דעם היימישן ציבור. דא האט איר איינער וואס איז פיינעלי גרייט צו געבן, שטופט איר אים אוועק?

וועט א חכם זיך אנרופען אז אמעריקא וועט גיין באנקראט אויב וועט סענדערס איינפירן זיינע פראגראמען. איך וויל נישט אריינגיין אין דער נושא דא און אוויפווייזן וואס פאר א נארישע טענה דאס איז, אבער פארוואס מיינט איר אז אמעריקא וועט גיין ווייניגער באנקראט אויב מען נעמט די אלע פראגראמען בגניבה ווי ווען מען באקומט עס אפיציעל? ווען דו קעשסט איין דיין חודש'ליכע סעקשאן אכט, וואוטשער, פוד סטעמפס אדער טעקס ריטורן טראכסטו נישט איבער די אכצן טריליאן דאלערדיגע דעפיצעט. אבער ווען עס קומט איינער און וויל עס געבן אפיציעל, דעמאלטס פלוצלינג הייבט איר זיך אן צו זארגן? דאס מאכט עפעס סענס?

מורי ורבותי. הריני מוסר מודעה לפניכם אז דורכאויס מיין לעבן האבן איך פרובירט צו לעבן מיט בטחון און נישט נעמען געלט וואס קומט מיר נישט. איך האב כמעט נישט נהנה געווען פון די רעגירונג אפילו אין צייטן ווען עס איז מיר געווען שווער. איך זאג דאס כדי איר זאלט וויסן אז דאס איז נישט קיין פערזענליכע נגיעה נאר עס איז מיין נגיעה לטובת כלל הציבור. אויב גייט דער יעצטיגע מצב אנגיין ווייטער ווי ביז יעצט וועט אטאסוויל קענען בויען אן עקסטרע בנין נאר פאר היימישע אידן. עס איז נישט שווער פאר די עף בי איי אויסצוגעפינען וואס עס גייט דא פאר. מען רעדט דא פון ביליאנען דאלארן, נישט קיין קלייניגקייטן. ווער ווייסט ווען דער שרעקעדיגער טאג וועט קומען. וואס וועט מען דעמאלטס טון?

מיר האבן יעצט א געלעגנהייט צו פאררעכטן דעם פראבלעם. אויב סענדערס קען געווינען דער פרעזידענטשאפט איז דא א שטיקל טשאנס אז אפשר וועט ער קענען לעגיטימיזירן דאס וואס עס קומט זיך אונז עניוועי. ער וועט זיכער אויסשטיין שווערע אפעזיציע אין די קאנגרעס און סענאט, אבער ער פארשטייט אונז כאטש. ער וויל אונז העלפן. עס ליגט א חוב אויף א יעדע איינציגסטע מענטש וואס קימערט זיך מיט די צוקונפט פון די היימישע געמיינדע, מיט א יעדע מענטש וואס האט א געפיל פאר פדיון שבויים, ביקור חולים, עזר למזון, קופת העיר, עזר לשכר לימוד, קופת חתנים וכו' וכו' צו טון וואס מען קען צו העלפן סענדערס געווינען. איינער וואס האקט אויף סענדערס זאל וויסן אז ער נעמט ארויס דאס ביסן ברויט פון צענדליגע טויזנטער אידישע קינדערלעך און עס וועט מעגליך ליגן אויף זיין האנט דאס בלוט פון הונדערטער אידישע ארעסטאנטן.



.[/justify]

[שמעקעדיג]

לעיקוואד האט געלייקט!!

[הוגה]

[tag]שמעקעדיג[/tag], ביזט עפעס נישט מסכים מיט דברי הנ"ל?

[שמעקעדיג]

לענינינו, בדרך אפשר. דער עולם האט מורא אז עס איז נאר א שפיצל. סענדערס וועט מאכן אלעס לעגאל, יעדער וועט עפענען זיינע פינאנצן, און שפעטער וועט מען ערוועלן א רעפובליקאנע פרעזידענט וואס וועט צוריקדרייען דעם זייגער, און מען וועט בלייבן לעקיש, קרח מכאן ומכאן...

[הוגה]

נו, וועט מען דעמאלטס צוריק ווערן עניים איבערנאכט. דאס איז נישט קיין פראבלעם.

איך פארשטיי אז דו האסט עס געזאגט האלב ווערטלדיג. סיריעסלי, וואס זאגסטו צו מיינע קשיות? דאס איז דאך א נושא וואס דו האסט געשריבן דערויף מערערע מאל. איך וויל הערן דיין אמת'ע מיינונג.


.

[שמעקעדיג]

נו, וועט מען דעמאלטס צוריק ווערן עניים איבערנאכט. דאס איז נישט קיין פראבלעם.

יע יע, צוריק גייט א קאזע..

ערנסט גערעדט, עס ליגט אסאך אמת אין דיינע ווערטער, ולא אאריך במקום שאמרו לקצר.

[[NAMELESS]]

מיר האבן יעצט א געלעגנהייט צו פאררעכטן דער פראבלעם....ס ליגט א חוב אויף א יעדער איינציגסטע מענטש וואס קימערט זיך מיט די צוקונפט פון די היימישע געמיינדע.....צו
טון וואס מען קען צו העלפן סענדערס געווינען.

וואס קענען מיר טוהן? מאכן מיר דען אויס אין די פריימעריס?

[הוגה]

גערעכט. אין נו יארק קען מען כמעט גארנישט אויפטון ביים וואוטען אין פרעזידענטליכע עלעקשאנס. אבער מען קען מנדב זיין ח"י דאללער צום קאמפיין. און נאך מער, בעיקר פאר די גרויסע מויל מאכער אין די געמיינדע, זיי וואלטן געקענט העלפן סענדערס דורכן אים אפיציעל שטיצן. דער ארטיקל איז אבער בעיקר געצילט צו ארויסברענגן די נקודה שבו.

[יאיר]

קודם כל, אונז גלייבן נישט אין סאנדערס ווייל ער האקט אויף די שיטה הקדושה. ביי אונז ווי מיר ווייסן דאך איז רבי זעכרוינעלעווראכע מכבד עשירים. זיי זענען אונזערע פאן טרעגער און וועג ווייזער. דער דאלאר איז אונזער פוסק אחרון. ווי נעמט זיך דער סאנדערס, א זקן ממרא שלא שנה ולא שימש, די העזה צו גיין קעגן אלע גדולי דורינו?
והשנית, אויב יעדער וועט קריגן סעקשאן אכט וועט דאך נישט זיין פון וואו צו נעמען. איינער מוז דאך אויסהאלטן די וויליאמסבורגער לייף סטייל, פארוואס זאל עס נישט זיין טאקע דער גוי אין דער מידוועסט וואס פארדינט פערציג אלפים א יאר און האט ניטאמאל פאר וועמען עס צו שפענדן? סאיז דאך פשוט אז גאט האט אים אראפגעשיקט אויסצוצאלן דעם טשאנדאליאר פאר אונזערע דיינינג רומס. און דער סאנדערס וויל קומען משנה זיין סדרי בראשית.
ער וועט אייננעמען א מיתה משונה, זאל דער סקוליענער צדיק זיך האבן אויסגעדרוקט אויף סאנדערס'ן.

[ליטוואק פון בודאפעסט]

יאיר, פארלאז זיך נישט אויף זיין קללות, זיין טרע"ק רעקאר"ד איז גאנץ שוואך, עי' ערך אביגדור יעקאבטוויטש ועוד.
לדעתי, איז דער סבה ווייל אונזער עולם לעבט נאך אין דער דמיון א ז זיי ווערען באלד גרויסע גבירים און מאגנאט'ן. ווארט נאר צו א פאר וואכען און מ'עט זען...... דעריבער רעדט מען זיך אפ וועגען גביריש'ע פראבלעמען און דעריבער אויך טוט מען לעבען אויף אזא הויכע לעבענסשטייגער. היינו טעמא דשופר........

Sent from my HTC Desire 510 using Tapatalk

[[NAMELESS]]

ר' הוגה, זייער שיין און הערליך ארויסגעברענגט. האסט אבער פארזען איין נקודה. דו מאכסט עס אביסל סאונדען כאילו דער עולם דארף צוקומען ביז א געוויסע סכום מ'זאל דורכלעבן און נאכדעם איז אלס פיין און וואול. אבער איר פארגעסט נאר פון אזא מושג תאוות הממון (וי"ג תאוות הגניבה). דאס איז אלס דא, דאס לויפט נישט אוועק. ועבירה גוררת עבירה ומי שיש לו מנה רוצה מאתיים. אויב יעצט לע"ע איז די סכום פון גניבה 50-60 אלפים ווער ווייסט ווי הויעך ס'וועט וואקסן אינטער סאנדערס'ן. און ס'איז ווייטער הודרא קושיא לדוכתה, אפשר וועט ער יא חרוב מאכן ס'לאנד, און איין.באשעפער זאל שומר ומציל זיין אויב די FBI זאל זיך דערמאנען פון אונז וכו'.

אויף די איצטיגע מצב כבר אמרו המושלים ע"ז אז באמת ווייסן די רעגירונג גאנץ גוט פון די גניבה שטיק, נאר זיי ווייסן אז ס'וועט ממילא זיין גניבות אפילו אויב מ'העכערט עס איז כאטש זענען זיי מוותר ביז אהער. והדברים עתיקין...

[הוגה]

א ביטערע געלעכטער, ראובן.

בן אדם, איך קען נישט רעאגירן אויף שפעקולאציעס. קען זיין אז דו ביזט גערגערעכט. איך האף און איך גלייב אז נישט דאס איז דער חשבון פונעם עולם און פון די מנהיגים.


.

[[NAMELESS]]

קוקט אויס ס׳איז דא א גרויס עולם וואס גנב׳עט (געניסט עפ״ל) נישט פון די גאווערמענט פראגראמען. און זיי זענען די וואס זענען נישט מסכים מיט זיידי סאנדערס.

[מאטי]

אונזער קולטור איז א דיכאטאמיע פון "לוזערס קעגן ווינערס" דאס שיילט זיך אויס מיט אלס און אלעמען. קינדער אין מוסדות, משפחה סטאנדארד, שידוכים, ביזנעס, געלט, קארס.

דאס שפיגעלט זיך אפ אויך ביי די נושא. בערני איז די פארטרעטער פון די לוזערס! די אומבאהאלפענע, די אפגעפליקטע נעבס. משא"כ טראמפ רעפרעזענטירט די ווינערס! די חברה'לייט.

[טמיר]

יאיר זאגט גוט. יעדער וויל האבן די אלע קענדיס אבער יעדער פארשטייט אז אויב וועט יעדער באקומען וועט דאס לייגען אמעריקע אין באנקראט, און דעמאלטס וועט קיינער נישט האבן...

[שלום על ישראל]

יאיר זאגט גוט. יעדער וויל האבן די אלע קענדיס אבער יעדער פארשטייט אז אויב וועט יעדער באקומען וועט דאס לייגען אמעריקע אין באנקראט, און דעמאלטס וועט קיינער נישט האבן...

הלוואי מ'האלט שוין דארט... רוב עולם וויל דאמפ (קורץ פאר דאנעלד טראמפ) ווייל "אז ס'גייט עניוועי אין ד'רערד, זאל שוין גיין אלל-דע-וועי" און ענליכע טריקענע נערישקייטן.

[שבת אחים]

זייער שיין באשריבן [tag]הוגה[/tag]. אבער די האסט לכאורה אויסגעלאזט די עיקר נקודה פארוואס טאקע די היימישע עולם איז קעגן סענדארס, נישט ווייל ער איז א סאושליסט, דאס גייט זיי גאנץ ווייניג אן, נאר ווייל ער שטיצט תועבה געזעצן און איז זייער פרא-אבארשאון און ווי אויך איז ער א איד וואס האט חתונה געהאט מיט א קאטליק גויטע רח״ל און ער איז פון די גרעסטע ״גלאובעל ווארמינג״ האקערס און שטיצט אלע לינקע אגענדעס. איז וואס ווילסטו אז נידערמאן זאל טאנצן יעצט קדוש מיט סאנדערס?

ווי קען א פרומער איד שטיצן אזא עוכר ישראל וואס איז קעגן אזוי סאך היימישע פרינציפטן ? איז אנדערש וועלן זיי ווייטער נעמען די געלט בגניבה ווי איידער זיך ביקן צום צלם! סטאטוס קווא איז בעסער פאר זיי אין אזא פאל!

[ליטוואק פון בודאפעסט]

נאר אן אשכול אויף סענדער'ס ברענגט צוריק שבת אחים פון זיין שובבי"ם שלאף

Sent from my HTC Desire 510 using Tapatalk

[יעקב מענטש]

א דאנק @הוגה,

איך אלץ ארבייטס אינגערמאן ארומגענומען מיט ארבעטס חבירים, קען מעיד זיין אז רוב ארבעטס אינגעלייט (לאפוקי די כולל אינגעלייט פארוועם די רעגירונג פראגראמען זענען די איינציגע וועג זיי קענען זיך ערלויבן צו בלייבן לערנען), וואלטן גערן געקענט באשטיין אויפצוגעבן די פראגראמען און לעבן ווי נארמאלע מענטשען וואס רעפארטירן יעדע פעני, ווען נישט וואס דו קאסטן פון העלט קאווערעדזש און טעקס זענען אסטראנאמיש הויעך, און דאס איז נאר א דאנק די סאציאליסטישע פראגראמען וואס די שטאט איז פארנומען צו נעמן פון פארדינער און אריינלייגן צו די ארימע, איך פערזענליך קען עטליכע אינגעלייט וואס האבן נישט קיין פוד סטעמפס און האבן יא מעדיקעיד, פארוואס ? ער קען דאך רואיגערהייט עפפלייען צו די פוד סטעמפ אפיס מיטן זעלבן טעקס רעטוירן וואס ער נוצט אינעם מעידיקעיד אפיס ? נאר, וויבאלד די גאנצע מעשה איז אים נישט צום הארצן, במילא איז ער א בוחר ברע במיעוטו.

אלץ אידן האבן מיר א געפיהל צו ארבעט און זיין א נהנה מיגיעי כפינו, און נישט דארפן צוקומען צו די שטאט, און וועגן דעם זענען מיר נישט צופרידן מיט דעם סאנדערס, ווייל ער שטופט אונז איין טיפער און דעם לאך ווי אונז ווילן נישט זיין,

[קאמפיאטער]

איך קען אבער נישט פארשטיין וויאזוי ער וויל געבן פאר אלע איליגעל אומעגרענטס פרי העלטה קעיר און קאלידזש.

צו קענען צאלן דאס אלעס וועט ער מיזן העכערן טעקסעס, און דאס באדערט.

איינער וואס נעמט עניוועי פראגרעמס באדערט עס נישט אזוי שטארק.

[הוגה]

[justify]יעקב, סאנדערס האלט פונקט ווי דיר. ער האלט אויך אז די אינשורענס קאסטן זענען שרעקליך הויך און אוממעגליך צו באצאלן. ממילא זאגט ער דיר "שמעתי את נאקת בני ישראל" איר וועט מער נישט דארפן דרייען כדי צו באקומען דער זעלבע מעדיקעיד וואס איר נעמט עניוועי. איך גיי עס אייך געבן בדרך כבוד. איי ער וויל דער חלילה וחס אריינשטופן פודסטעמפס אויך אינאיינוועגס? נו, מיזט עס נישט נעמען אויב דו ווילסט נישט.

איך פארשטיי נישט וויאזוי סענדערס שטופט "אונז" טיפער אינעם לאך? דורכ'ן אונז געבן ביושר וואס מיר נעמען סייווי? דורכ'ן צורעקשטעלן די שווארצע מארקעט אויף די ווייסע זייט? עס מאכט פשוט נישט קיין סענס. ועוד, דער מעדיקעיד יונגערמאן צאלט נישט פאר קיינעמ'ס פודסטעמפס.

קאמפיאטער, אזויווי איך האב געשריבן אינעם ארטיקל, דא גייט מען נישט דן זיין אויב עס קען ארבייטען אדער נישט, נאר אויף די עצם פאראדאקס וואס כ'האב ארויסגעברענגט. לאמיר זיך האלטן צו דעם. אויב גלייבסטו אז סאציאליזם איז נישט גוט פאר אמעריקא, דאן איז אומאפיציעלע סאציאליזם בגניבה זיכער נישט גוט.


.[/justify]

[יואב]

לענינינו, בדרך אפשר. דער עולם האט מורא אז עס איז נאר א שפיצל. סענדערס וועט מאכן אלעס לעגאל, יעדער וועט עפענען זיינע פינאנצן, און שפעטער וועט מען ערוועלן א רעפובליקאנע פרעזידענט וואס וועט צוריקדרייען דעם זייגער, און מען וועט בלייבן לעקיש, קרח מכאן ומכאן...

דערפאר וועט ער גיבן פרייע קאלעדש אויך, אזוי אז ווען די רעפאבליקאנער נעמען איבער, וועלן די היימישע פאראזיטן שוין האבן גוט-באצאלטע דשאבס, און דאן טאקע שטימען פאר די רעפאבליקאנער וואס וועלן נישט רייסן פון די היימישע באלאבאטים שטייערן, ובנוסף העלפן פינאנצירן די פריוואטע סקולס וואס וועלן קעמפן קעגן גזירת שמד; די ארימע שווארצע וואס צוליב זייער דירעקטע יוחס צו חם וואס איז פארשקלאפט אונטער דער תורה'ס אוטעריזאציע וועלן נישט מאכן קאלעדש אפילו אונטער בערני'נען, וועלן זיי לאזן הונגערן; די ווייסע אמעריקאנער אנטיסעמיטן וועלן זיי שיקן אויפ'ן מלחמה פראנט, ירשלים וועט ווערן אנערקענט אלס דער הויפט שטאט פון ישראל און די חרדישע אידילאגיע וועט האבן געזיגט אין יעדן פרט.

[מרדכי]

IMG-20160130-WA0005.jpg