הצלה שרייט "וואלף"

[[NAMELESS]]

בארא פארק רודערט, די תושבי העיר גרייטן זיך מיט גרויס עקסטאז צום גרויסארטיגן מעמד "סטאפ, דראפ ענד ראן" פאר דער הייליגער "הצלה" אראגאניזאציע. די ערווארטונגען זענען אויף די העכסטע אקטאוועס. א קלייניגקייט? באותו מעמד ובאותו מקום וועט מען קענען געווינען נישט מער און נישט ווייניגער ווי א נייעם שייטל אדער אנדערע סבלונות וקישוטין, פאר די וואס וועלן זיך אנטיילנעמען אין געהויבענער הגרלה המכונה טשייניז אוקשען.

כמים הפנים לפנים, צו אנטקעגנקומען די ערווארטונגען פונעם ברייטן ציבור איז א קאסטבארן קאמפיין געלאזט געווארן אין גאנג. פילייכט דער טייערסטער מארקעטינג קאמפיין וועלכע סיי וואס פאר אן ארגאניזאציע טוט אנפירן אין דער שטאט דורכאויס'ן קיילעכיגן יאר. די קריעטיווע טיעם פון גי-סי-ענ-וויי איז איינגעשפאנט געווארן צו דער מלאכה. א קלארן אנזאג איז געקומען פון די העכסטע פענסטער, אז קאסטן וואס זאל קאסטן, ווען מ'רעדט פון הצלת נפשות קוקט מען נישט אויף קיין געלט.

יעדע באס סטאפ אין שטאט איז רעזערווירט געווארן פאר הצלה; קיין ליידיגע בילבארדס איז שוין נישט צום באקומען לענגאויס גאנץ דרייצנטע עוועניו, נאך משלשים יום קודם החג; כל-ערליי פלאקאטן וועלן באצירן די לעקטער שטאנגען; און א חידוש, די דראון טעכנאלאגיע איז געשטעלט געווארן אין באנוץ. דראון העליקאפטער זאלן פליען און כאפן מאיעסטעטישע בילדער פאר'ן טשייניז אוקשען ביכל, אבער א קאמפיין זאל זיין איינס אין דער וועלט.

מיר בארא פארקער איינוואוינער האבן שוין א לאנגיעריגע חזקה, אז ווען עס קומט צו דער הייליגער אראגאניזאציע הצלה פארמאכן מיר די אויגן. מיר קוקן נישט וויפיל עס ווערט געשפענדעט פאר מארקעטינג און אנדערע שטותים און אין דער צייט פון יאר לייגן מיר אוועק אלע נארישע חשבונות רבות אין א זייט. מיר וועלן אפילו נישט פרעגן פארוואס די נייע הצלה גאראזש שטייט פארלאזט ווי א קיילעכיג יתומ'ל, טראץ די שווערע מיליאנען דאלארן וואס דער ציבור האט דערין אריינגעגאסן, אלעס צוליב א קינדערישן קאץ-און-מויז שפיל פון מי בראש. ווייל גארנישט מעג נישט געשטעלט ווערן אין וועג ווען עס קומט צו שטיצן הצלה; ניטאמאל ארט אונז אז "מיימאנעדיס", די טרויעריג בארימטע בית הקברות-שפיטאל האט די אויסשליסליכע רעכטן אויף אלע בארא פארקער חולים, וואו יעדער פאציענט ווערט טראנספארטירט באונס אדער ברצון, אן קיין אויסנאמען. כי בנפשינו הדבר, זיי זענען דאך אונזערע לעבנסרעטער, ווי דערוואגן מיר זיך צו קריטיקירן אדער צווייפלען אין הצלה, און אז מיר האבן נישט די זכי' אליין צו זיין הצלה מעמבער, מיר קענען זיך נישט ערלויבן צו צאלן די גרויסע סומעס לא-יחרץ-געלט עס קאסט אפ צו ווערן א הצלה וואלונטיר, זאלן מיר כאטש טון די מינימום, מיט'ן ביישטייערן א פאר צענט צום יערליכן אפיל.

עס איז דעריבער נישט דא קיין איין בארא פארקער איד וואס ווילן נישט קומען צום דינער און געניסן פון די שיינע יערליכע אן-טיים פרעזענטאציע. אבער, דא קומט אריין א ריזיגן אבער, וויפיל דאס הארץ ברענט פאר הצלה, איז דא א ריזיגע שטרויכלונג וואס שטייט אין וועג פון הצלה שטיצער צו קענען ערפילן זייער הייסטער באגער.

יעדער קען די געשיכטע וואס האט אונז דראמאטיזירט אלס קינד און געמאכט דרוקן דעם רעוויינד קנעפל אויפן טעיפ רעקארדער איינמאל און נאכאמאל, מיט דעם אומפאראנטווארטליכן פאסטוך וואס האט געשריגן "וואלף!" איינמאל, נאכאמאל און א דריטן מאל. ביז דער ביטערער טאג איז ליידער אנגעקומען, און א וואלף האט פארציקט זיין גאנצע סטאדע שאף, בשעת וואס קיינער האט זיך נישט צוטון געמאכט פון זיינע יללות, האבנדיג די חזקה פון א ליגנער און באטריגער. אקוראט די מעשה איז אצינד אקטועל.

דער וועג וויאזוי דער דינער איז געלאפן די לעצטע עטליכע יאר זינט די "מלוה מלכה" איז אין קראפט, איז פשוט חוזק געמאכט פון דאס מענטשהייט. ערגער פון דעם, אז ניטאמאל זעט אויס ווי איינער זאל זיך בכלל קימערן, נאר דער זעלבער נארישער וויץ ווערט איבערגע'חזר'ט יאר יערליך.

די גאנצע שטאט ווערט צוזאמגעשלעפט און אריינגעשטעלט אין א שטיקיגן, הייס און דומפיגן קעלער, נישטא וואו צו זיצן, נישטא וואו צו שטיין, אן דאס מינדעסטע כבוד הבריות. טאמער ביזטו נישט ממש פון די עשרה ראשונים בלייבסטו הונגערן אן א לעק וואסער אין מויל צו נעמען. דערצו קומט מיט אן אנלויפעניש פון "טויזנטער" בחורים וואס שטראמען מיטהאלטן דעם יערליכן צירקוס, וואס ברענגט ממש א שאנדע און א בושה פאר א רעכטדענקיגן מענטש דארט אנטייל צו נעמען.

הייליגער בורא עולם, וואס זוכט א בחור ביי אזא אוונט? וויפיל טוען זיי באשטייערן צו די קאסטן פונעם דינער אז עס זאל זיך לוינען צו שפייזן אלע ישיבה קטנות אין שטאט מיט א נארהאפטיגער מלוה מלכה? אפגערעדט אז דער סקעזשועל פון א פראגראם אין א שפעטע זומערדיגע מוצאי שבת וואס ציעט זיך ביז פארטאגס האט נישט קיין שום פשט.

נאך אלע וויצן איז יעדער מודה אז הצלה איז א חשוב'ע אראגאניזאציע, אבער עס איז צייט זיי זאלן אויפהערן שרייען "וואלף". אן אוונט לטובת הצלה איז א שטאטישע זאך, א רבימ'דיגער אוונט, נישט קיין פרט'ישע יחידישע נאכט, און זיי זוכן טאקע און זענען אנגעוויזן אין דער שטיצע פונעם ציבור, איז דא די מינימום כבוד הבריות מיט וואס א ציבור'ישע ארגון דארף זיך רעכענען.

ס'טוט וויי צו זען וויפיל געלט ווערט אויסגעגאסן פאר מארקעטינג, וואס אינעם מענער-שול איז עס לדעתי א גאר שוואכער קאמפיין עכ''פ רעלאטיוו צום פארדינסט, ווייל זאל א מענטש מאכן א חשבון וויפיל אן אלגעמיינער מאנס-פערזאל לאזט איבער ביי א טשייניז אוקשען פאר מענער? הונדערט דאלאר איז שוין שיין גערעדט! פאר די פשוטע סיבה, ווייל מענער דארפן נישט קיין טשייניז אוקשען.

די דינער נאכט גופא איז מסתמא די טייערסטע דינער נאכט פונעם יאר, א גאר קאסטבארער פראגראם! יעדער ריר שמעקט פון געגאסן אידיש געלט. וואלט זיך עס אבער געענדיגט מיט א רעספעקטפולע דינער נאכט פאר הצלה און מיט באדייטנדער שטיצע, החרשתי! אבער אז די נארישע ליצנות-קנופיא חזר'ט זיך ווייטאגליך איבער יאר יערליך, אז א מענטש מיט מער ווי שתי-שערות ווערט צעשאנד און צושפאט פון זיך דארט באטייליגן, איז עס פשוט א ווייטאג, און ברענגט ארויף בייז בלוט ביי יעדן נארמאלן תושב העיר.

איז עס אלזא די בקשה פאר חברה הצלה, הערטס אויף מיט דעם נארישן שפיל! ס'בלוטיגט צו זען אז אידיש געלט וואס וואלט געקענט אויסגענוצט ווערן פאר אזא הייליג צוועק ווי "חברה הצלה" גייט לטמיון, שטעלטס צו א נארמאלן נאכט, סאיז בכלל נישט קיין דאורייתא אז עס מוז פארקומען אין דעם דערביטערטן גאליציאנער אולם ליפשיץ; נעמטס א נארמאלן פלאץ, מאכטס א זאכליכע פראגראם; טרייבטס ארויס אלע בחורים וואס געבן נישט קיין געלט, און שטעלטס איין א געזונטע קאמפיין צו בעטן פון יעדן ראש המשפחה מינימום 360$, נישט קיין אפגעריסענע טשייניז אוקשען וואס איז גוט פאר נשים עבדים און קטנים, הערטס אויס די געבעט פון די שטאטישע איינוואוינער, ווייל די וויץ האלט ביים אויסלויפן, און טוט באדראען די שטיצע וואס תושבי העיר זענען אזוי אויסן אייך צו שענקען, און איר זאלט נישט דארפן טראגן דעם פנים פון יענעם שלימזל'דיגן פאסטוך.

מיט פולסטן רעספעקט,
תושבי עירנו

___________________
א חשוב'ע ידיד האט דאס געשריבען און מיך געבעטן ארויפצולייגען

[קאך_לעפל]

די וואס ווייסן ווייסען.... אז א באדייטענעם טייל פינעם קאמפיין-קאסט ווערט געדעקט דירך דעם מארד שפיטאל מיימאנעדיס זעלבסט....וואס טרענקט זיך אין מיליאנען... בבחינת שמור לי ואשמור לך.....

אזא פנים האבן מיר... יעדער מיינט זעך און זעך... אבער דעם חולה זעלבסט מיינט קיינער נישט....

צדיקים זאגן אז ווען מ'טרעט איבער דעם שוועל פון דעם יודישיסטישע- פארווערס מארד - שפיטאל, וואס פארשעמט דעם נאמען פינעם הייליגען רמב''ם יעדע ליאדע סקונדע. דארף מען צוויי מאל גומל בענטשען

1) צילוב חולה ונתרפא.
2) אז מ' איז ארויס לעבעדיג פינעם מארד - שפיטאל

[[NAMELESS]]

לעצטענס האבן זיי עפעס אויך אנגעשלאסן א בונד מיט לוטערן. כ'ווייס נישט צו ס'איז די זעלבע אדער נאך ערגער....

[ליטוואק פון בודאפעסט]

וואו! עטוואס געשאחטען, צו געשטאכען, דער הייליגער קוה. דאס דערמאנען א האלבע ווארט אויף הצלה איז געווענדליך הארבער ווי דער בעלזער וואס גאלט זיך שבת אויפרוף מיט א מאשינקע, ווי א וויזניצער זאל זינגען בלויז זעקס מאל מנוחה ושמחה, ווי דער ליטוואק וואס וואשט זיך נאכ'ן שקיעה צו א נישט ישן שאלעשודעס, ווי א באבובער זאל ארויסנעמען א דאללאר פון טאש, ווי סיי וואס פאר אן אונגארישער אידענע זאל עסען זויער אוגערקעס אין סוכה, ווי גייען אין מיליטער אנשטאט'ס אילת. און דא האט מען שוין אביסל גערעדט.
פארשטייט זיך אז מ'האט גלייך האלבוועגס צוריק געצויגען, אבער א התחלה יא.

לאמיר זען קליפ און קלאר — ווי גייט די געלט? גענוי וויפיל קאסט יעדער זאך? וויפיל גיבט דער רעגירונג? וואס טוט מען ווען איינער טויג נישט? וואס זענען די לעבענס ראטען פון מענטשען וואס פאלען אין זייער הענט? וואס פאר א סיסטעם האט מען ווען א יונגערמאן באנוצט זיין פאזיציע צו טוהן וואס מ'טאר נישט? קענען מיר זען תשובות פון פוסקים וועגען זייער שאלות?

א ציבור מוסד מוז זיין אפען צום ציבור.

Sent from my HTC Desire 510 using Tapatalk

[יואליש]

קאך לעפעל, מיימאנאדיס טרינקט זיך אין מיליאנען? אפשר מיינסטו מיליאנען אין חובות. זיי האבן לעצטענס געמיזט נעמען א הלוואה פון נארט שאר, וועלכע גייט גאנץ באשטימט איר איבערנעמען עט סאם פאוינט.

[וכדומה..]

איך גיי נישט אריין אין די זייטיגע נקודות, אבער די טענה אז זיי שפענדן אויף מארקעטינג ריזיגע סכומים איז זייער נאריש.

קודם כל אפילו אויב זיי פארדינען בלויז 5 פראצענט פראפיט אויף די געלט וואס זיי געבן אויס, איז עס שוין נישט קיין דורכפאל פון א מארקעטינג קעמפעין. און ס'האט זיך אלעס געלוינט.

צווייטנס, צו וועם קומט אן די אלע געלטער? אלעס פליסט צוריק אריין אין די קאמיוניטי, פון עטרת גאלדא ביז איסטערן זילבער פאר די לייכטער, ס'הייבט סאך הכל די עקאנאמי אין די היימישע קאמיוניטי. די געלט ווערט נישט פארשווינדען ערגעץ ווייסעך וואו. מנעמט פון יענקל און מגעט עס צוריק פאר יענקל, און האסט נאך אריינגעכאפט א מצוה פון צדקה אויך.יא צדקה איז עס נאכאלץ, אפילו מנוצט עס פאר עקספענסעס.

איז ווייס איך נישט וואס מ'ברויזט אזוי אויף די אומגעהוירע בודשעט פון די קאמפעין.

[[NAMELESS]]

עם.... עם... עה... איז איינער אפשר דא א הצלה מעמבער?

[ליטוואק פון בודאפעסט]

א מאדנע מעשה! מ'מעג באגנבנען די ציבור ווייל מ'איז א חלק פונ'ם ציבור. ווען יאנקל גיבט געלט פאר יוס'ל, איז עס צוריק אין יאנקל'ס טאש, ווייל יאנקל און יוס'ל טינקען זיך אין די זעלבע מקוה!

Sent from my HTC Desire 510 using Tapatalk

[וכדומה..]

גניבה? ווער גנב'ט? מרעדט נישט הלכה דא, און קיינער צווינגט נישט גארנישט.

די טענה האבערס רעדן מיט א מאראלישע טאן, היתכן מ'פארשווענט אזויפיל אידיש געלט. און דאס האב איך אוועקגעמאכט מיט די טענה הנ"ל. ופשוט הוא.

[גיבור]

אויף די בחורים טענה : די איינציגסטע דינער אין שטאט וואס עס שטייען יונגעלייט און לאזן נישט אריין קיין בחורים איז - הצלה
די בחורים קענען נאר גיין אויבען אבער בשום אופן נישט אונטען אין זאל.
(חוץ ווער זיין טאטע אדער פעטער אדער ....... איז א הצלה וכו')

[[NAMELESS]]

וויאזוי ווייסן זיי ווער איז א בחור און ווער איז א אינגערמאן?

[ליטוואק פון בודאפעסט]

בן אדם טייערע, ביי אונזער חסידישע געשוויסטער איז פארהאנען א פיהראכץ אז נאכ'ן חתונה לייגט מען אום שבת יו"ט פורים חוה"מ און ביי חתונות א סארט הוט געמאכט פון ווידלעך. מוצאי שבת טראגט מען עס ווייטער ביז'ן אנקומען אין טע'אטער אדער ביז'ן זיך לייגען שלאפען.
דערמיט קען מען לייכט דערקענען דער אונטערשייד צווישען א שלומיאל דערנאך זיין באקומען א טאטי טלית - בעג און ווען ער איז נאך אין תפיסה.

Sent from my HTC Desire 510 using Tapatalk

[שמעון וואלף]

וויאזוי ווייסן זיי ווער איז א בחור און ווער איז א אינגערמאן?

מ'נעמט אפיר די מנהלים פון מאחורי און מ'שטעלט די בחורים צום פארהער