רבי ישעיה'לעס כולל עפענט אירע טויערן

[אונטער חכם]

געהערט פון א שמש אז עס איז שוין אריינגעקומען דריי טויזנט דאלער פאר די ג אייר פרעסערייען און ער האפט אויף נאך אפאר טויזנט ביז דעמאלטס.

[ליטוואק פון בודאפעסט]

דאס מיינט נישט אז דער עסען קאסט מער ווי 500. דער שמש דארף דאך אויך לעבען. ווען איינער קען אויסטרעפען נאך א פאר אזעלככ חגאות, וועט דער שמש פארבאנד זיין שטארק דאנקבאר.

Sent from my LG-K373 using Tapatalk

[[NAMELESS]]

מצאתי נוסח ישן נושן בפנקסי קהילת באדראג קערעסטיר:

מלאו את בטניכם בשני לחודש בערב, וכי בשני באייר מתמלאים? והלא בשלשה באייר מתמלאים? אלא לומר לך: כל האוכל ושותה כבר בשני בערב - מעלה עליו הכתוב כאילו אכל בר' ישעיה'לעס יארצייט אליינס

והוא סתימין דכל סתימין

[ליטוואק פון בודאפעסט]

באקומען אויף וואטסעפפ

אט דערנענטערט זיך דעם יום הגדול והנורא פון וואס די טונא אין לאקס פישן אין וואסער ציטערן, דער טאג וואס האלט אינמיטן טרענספארמירט ווערן אלץ איינע פון די גרעסטע און הייליגסטע טעג ביי כלל ישראל, די קינדער וואס זענען יעצט אכט יאר אלט גייען שוין געדענקן אז פון אייביג אן מאז היתה ישראל לגוי איז געוועהן א ענין אין דער טאג צו עסן און געבן עסן, ס'גייט זיין עפעס אזא ערב יום כיפור סיטואציע ס'גייט ווערן אנגענימען אז סאיז א מצוה צו עסן וכל המרבה הרי זה משובח. 

איך זעה פאר אז אין געציילטע יאר גייט שוין יעדער גרעסערע גראסערי וואס האט א פסח סעקשאן אויך האבן א באזונדערע 'קערעסטיר סעקשאן' ווי מ'גייט קענען קויפן גרויסע בייגלעך מיט קערעסטירע קוגלעך און רבי ישעי'לעס קוקאש קעיק וכד'. האלב 13TH ave גייט זיין באלקירט מיט קאנטעינערס צו ערפולען דעם געברויך מיט כל מיני מאכלים, פון ארץ ישראל גייט מען קומען שנארן פאר ג' אייר חלוקות דורך עונג שבת ויו"ט, אסאך ארגענעזאציעס גייען זיך נאך עפענען לכבוד האי יומא דקא גרים און אסאך טאשן שניידער'ס גייען נאך נתעשר ווערן בזכות דעם צדיק, וועט נאך ארויסקומען ספעציעלע ספרים מיט מנהגים בחצרות הק׳, א קיצור ס'גייט ווערן לעבעדיג אין שטאט אויפן חשבון פון האי צדיק וקדוש. 

אלעס האט זיך אנגעהויבן נאכדעם וואס אפאר הונגעריגע אידן האבן געהערט עפעס א מעשה פון עפעס א מלוה מלכה אין קערעסטיר און זייענדיג הוגעריג האבן זיי זיך צוגעכאפט דערצו ווי צו ווארעם'ס און זיך גענומען חלומ'ן פון דעם צדיק ווי דער הונגעריגער חלומ'ט תשעה באב נאכמיטאג פונעם אויספאסטן צוביסלעך איז ארויסגעקומען א ספר החלומות געהערט פון ערשט האנטיגע בעלי חזיונות באזירט אויף דמיונות, זיי האבן איבערגעלאזט הונגער פלעקן אויף רוב פון די סיפרים דארט, על פי חשבונם איז די גאנצע תבואה פון רומעניא פוילן רוסלאנד געקומען מיט שיפן קיין קערעסטיר צו די דריי אידן מיט צוויי גוים וואס האבן געוואינט דארט. צו קאכן די זופ האט מען אויסגעטרוקענט דעם דונא טייך אזש אז ס'איז אנטפלעקט געווארן די אידן וואס זענען געהרגעט געווארן דארטן על קידוש ה'.

שוין געווארן אזוי אז אונזער בליק אויף רבי ישעי'לע איז נישט מער און נישט ווייניגער ווי א אלטער ברייטער איד מיט א מעסער אין די האנט שטייט און שנייט גרויסע ראפאגאש בארכעס מיט קוקאש קעיק, דערנאך גייט ער מיט אימפעט צום גרויסן טעפל טשולנט און מישט בשעת וואס זיינע ליפן מורמלען 'לשובע ולא לרזון', מוצש"ק שטייט דער צדיק מיטן קאפטן און קנעט איין ריזיגע שטיקער טייג און שיילט צוויקעל מיט פאטעיטאס און דער עולם זיצט ארום דער טיש און קנאקט. און עפעס אזוי האט זיך געדרייט כל ימיו פון דער צדיק.

די לעצטע פאר יאר פארן פולע ערעפלאנען אנגעפאשעטע אמעריקאנע אידן וואס לעבן דא מיט כל טוב וטוב ווייסן נישט קיין דאגות האבן נישט קיין השגה דאס איידלקייט און באשיידנקייט פונעם קערעסטירער צדיק די חברה פארן אהין האקן קוגל מיט טשולענט וואס ווערט אהערגעשטעלט דורך ריזיגע ד׳ אמות קעכער׳ס, און קומען צוריק פארציילן אז דאס איז ממש ווי ווען דער צדיק האט געלעבט, כאילו פון דעם באשטייט דער גאנצער קערעסטיר. 

כ'האב געזען ערגעץ איינער פון די שרייבער שרייבט דאס פאלגנדע: 

_עס איז איבעריג צו זאגן וואס עס טוט זיך אין קיטשען אין קערעסטיר ערב שבת יארצייט, ריזיגע טעפ אנגעפולט מיטן גאנצן מה ידידות, פרויען פון איין זייט, בחורים פון צווייטן זייט, שטייען און קאכן באקן שיילן מישן, און יעדעס מינוט וואשט מען פריש אויס די כלים און מען הייבט אן נייע רעצעפטן, טעצער קעיקס און קוקיס פארן ארויס יעדע עטליכע מינוט, וואס זאל איך אייך זאגן.. נוסח קערעסטיר!_

סארא גערעדאכץ דאס, מ'עסט פרעסט און ענדיגט צו נוסח קערעסטיר...

נקודת הענין; היות איך זעה אז ס׳ווערט נשתכח אז דער טאג איז א פלענער נארמאלער טאג, במילא וויל איך אצינד ג' אייר תשע"ח אויסרופן און אראפלייגן א יסוד פאר יעדער חוקר מנהגים פון דער קומענדער דור, הערט גוט וואס איך זאג אייך:
ס'איז נישטא קיין שום ענין צו עסן טונא פיש מיט בייגעל'ס אדער קנאקן גע׳חריינ׳טע געפילטע פיש מיט צימעס אין דעם טאג פון רבי ישעי'לעס יארצייט, ווי אויך אויב איר זענט די אייגענטומער פון א רעסטוראנט אדער סיי וועלעכער עסן קרעמל איז נישט חל אויף אייך קיין שום חיוב צו פארטיילן עסן בחינם' שרייבט נישט אויף רבי ישעי׳לעס קאנטע ווייל ער גייט דאס נישט צאלן.

אצינד ווען די שורות ווערן געשריבן ווערט ערווארטעט א גרויסע ליפערונג פון בייגעל'ס מיט פוטער אין אלע היימישע בתי מדרשים, ווי אויך עטליכע גרויסע גראבע טאטעס מיט שיסלען אין די האנט צו פרעגל'ן אייער, ביים טיש זיצענדיג וועט איר טרעפן דאס געשמאקן איד'ל וואס האט זיך שוין א וואך צייט אנגעגרייט מעשיות און דמיונות פונעם בעל הילולא, ער האט דורך געטוהן עטליכע ביכער וואס בעלי חלומות האבן געשריבן זייענדיג הונגעריג, אצינד גיסט ער עובדות ווי א כל בו און אזוי ווי נישט ווי כאפט ער אריין א גאנץ לעפל שפאזע און ס'שפייעט אויס ווי פון זיך אליין א: זכותו יגן עלינו. 

[שמעקעדיג]

דער וואס האט דאס געשריבן, מוז זיין גאר אן איידעלער, דארער איד, מיט די עכטע אמאליגע קערעסטירע נוסח. ער עסט ווארשיינליך נישט מער ווי איין קרעפל יעדן שבועות. ער קוקט אויך אויס צו זיין נעבעך אין א טיפע מרה שחורה, ה"י.

[berlbalaguleh]

שמעקעדיג: ייש"כ. אויך איז ער א קנאפער מאמין בכח הצדיקים לפעול ישועות לכלל ישראל...!

איך האב איין ווארט צו דעם טייערן איד...דו ווילסט נישט עסן, עס נישט. קיינער צווינגט דיך נישט. אבער פארגין פאר א צווייטן. לכאורה כאפסטו נישט די גאנצע נקודה. דער צדיק ר' ישעי'לה מ'קערעסטיר האט מהדר געווען אין די מידה פון אברהם אבינו. הכנסת אורחים. דארט האט מען נישט געפרעגט וואספארא הויעכן שטריימל מ'גייט. אדער וואס פארא דיקע גארטל מ'בינדט זיך ארום ביים דאווענען. ס'איז געווען א בחינה פן כל דכפין ייתי ויכול. מ'האט נישט ח"ו געפרעסן און געזויפט. נאר דער צדיק האט איינגעפיהרט אז א יעדער איינער האט געקענט קומען און מ'האט געמאכט סעודות ברבים. ממילא אויב א איד איז באמת געווען הונגעריג, האט ער זיך נישט געשעהמט אז נאר ער עסט נעבעך אין די פרעמד...!

דער טאשער רבי זצוק"ל האט געהאט דעם זעלבן דרך. נאך אין מאנטריאל, פאר'ן שטעטל טאש, איז געווען ביי איהם אן אפענע טיר. די רעבעצין האט געקאכט גרויסע טעפ מיט עסן. און א יעדער איינער, אורחי פורחי אדער עושר האט געקענט קומען און עסן דארט רואיג...!

אויך הצדיק הק' ר' איציקל מ'פשעווארסק האטציך געפיהרט אויף דעם זעלבן דרך...ביי איהם איז געווען אן אפענע טיר 24 שעה אין מעת לעת. און זיינע קינדער האבן ממשיך געווען אין דעם זעלבן דרך...!

[berlbalaguleh]

אינטרעסאנט אז קיינער (דא אויף קאווע שטיבל) רעדט נישט פון די שיינע מידה פון די רעסטוראנט זום ביים עקסאן געז סטעישן טיילט היינט אום ג' אייר, די יומא דהילולא פון הרה"ק ר' ישעי' בן משה מ'קערעסטיר זצוק"ל אן אומזינסטן פרישטאג פאר א יעדן איינעם וואס קומט דארט אריין. כל דכפין ייתי ויכול...!

לויט ווי איך בין אינפארמירט (איך בין נישט געווען דארט) איז געווען א גרויסער עולם. זיי האבן עס שוין געטון איינמאל דאס יאר. פאר פורים. האבן די רעסטאראנט געגעבן אומזיסט טונא סענדוויטשעס פאר א יעדן הונגעריגן איד...!

זכות הצדיק בעל ההילולא יעמוד להם. ויתברכו מן השמים בכל טוב...!

[ליטוואק פון בודאפעסט]

קוק עס פון די אנדערע זייט.
יענקל גביר איז, אחוץ א גרויסען עושר, א פייערדיגע חסידישע איד. יעדער ענין וואס חסידישע אידען פייערען, איז זיינס. ער האט א גראבען סידור געוויקעלט מיט ברוינע פאפיער, און ער טרינקט זיין קאווע צוזאמען מיט פתח אליהו פאר׳ן דאווענען, וואס ער וועט בשום פנים ואופן נישט אנהייבען צוזאמען מיט דער בעל תפלה, כמנהג חסידישע אידען. נאכ׳ן דאווענען, און אויסזאגען דער יום אין חק און י"ג זכירות\אני מאמין׳ס, טוט ער זיך אויס די רבינו תם תפילין, און ער לייגט צוזאם די טלית, ווען ער גיבט זיך א דערמאן ׳ג׳ אייר איז דאך היינט׳. ער גייט אין פאליש און טרעפט זיך א פלאץ אויפ׳ן באנק צו עסען בייגעלס, קיכעל, קריעם טשיז, לאקס, העררינג פון קאצק ראפשיץ און וואלאזין (נאך איינער האט באמערקט די נייע רעקלאמעס פון פלאומ׳ס העררינג?), קאקאש קעיק מיט ראגעלעך, קעיז דעלקעלעך, סתם קעיז, עשרת........ פארשטייט זיך מיט מאראנצען זאפט און בראנפען (סקאטש, נישט אלד וויליאמסבורג). אלס באפעפערט מיט א זאג ׳אדער לייגט ער אדער בייגט ער׳ און א זכיתאוי יוגייען עולייעני צום סוף. ווייל דאס טוהן חסידישע אידען אין מזרח אמעריקא אין די לעצטע צען יאר.

פארוואס האט ער זיך איינגערעדט אז דאס זיך צוזעצען צו א מאלצייט אום א גרינע מיטוואך איז א חסידישע זאך צו טוהן? וויאזוי האט מען דאס אריינגעשטופט אין די געוויסען אין אזא שפעטען דאטום ווי 2010? די קשיא איז נישט אויף דער וואס גיבט, ער איז גרייט צו געבען פאר יעדעם, אבי אן עכטע ארימאן זאל קענען געניסען. אבער דער עיקר איז דאך דער עכטע ארימאן. און ווען אזוי, פארוואס נישט געבען פאר תומכי שבת צו עפעס וואס איז כל כולו געווידמעט צו ארימעלייט? פארוואס מוז ער זיך פאטשקען אויפ׳ן וועג מיט׳ן צולייגען וואג פאר דער וואס דארף עס ווי א לאך אין קאפ?

Sent from my LG-K373 using Tapatalk

[[NAMELESS]]

"ר' ישעיה'לע איז געווארן פון א עקסטערמענעיטער א קעכער" כככככ.... דערלאנגטס א הויפן גרינע

"ס'איז סוף זמן אכילת ר' ישעיה'לע" חאחאחא האבן זיך די רויבער צולאכט, ברענגטס א פרישע שיסל גרינע

א פרישע מעסידזש אויפן טעלעפאון בליצט אריין, וואס א גוטס קומט יעצט? "כאפטס אריין צו עסן ס'איז סוף זמן" ככככככ.... העי קיינער לאכט שוין נישט. די גרינע סמייליס זענען דא איי געסס די רויבער צו לאכן זענען שוין נישט צום געפונען....

גענוג איז גענוג! פון דער נעקסטער חבר איך באקום דעי דזשאוקס וואס וועפט ווי בינגאו סעלטצער שיק איך אפ קיין סיביר און זיין קאפ צום מערת המכפלה...

היינט ביי שחרית האב איך געזען אין שול א אידל -האלט זיך פון די גרייז גרויע חיים מענדיל פארערער- וויצלט זיך דעי בליציגע וויצן. זיין גרויסע הענגעדיגע באקן האט שיעור אונטערגעבראכן פון זיין שמייכל וואס האט זיך געהויבן אלץ העכער און העכער.

[אונטער חכם]

איך האב אינגאנצן נישט קיין רחמנות אויף דיר, קיינער האט דיר נישט געהייסן שרייבן דעם ארטיקל דא פאראיאר.

[איסר האטלקי]

איינער זאגט מיר אז אויב ביי ר' ישעילע'ס יארצייט עסט מען ווייל ער האט געטיילט אסאך עסן, קען ער קוים ווארטן פאר בערלאנד'ס יארצייט......

[ליפא]

20180419_125105.jpg

יעה ר' ישעיהלע ראללט זיך אין קבר...

[רביה''ק זי''ע]

.

[אונטער חכם]

נמחק

[רביה''ק זי''ע]

זאגט די הייליגע גמרא אין מסכת סוטה דף ט:
ת"ר שמשון בעיניו מרד שנאמר ויאמר שמשון אל אביו אותה קח לי כי היא ישרה בעיני. לפיכך נקרו פלשתים את עיניו שנאמר ויאחזוהו פלשתים וינקרו את עיניו. איני והכתיב ואביו ואמו לא ידעו כי מה' הוא, כי אזל מיהא בתר ישרותיה אזל.
תניא רבי אומר תחילת קלקולו בעזה לפיכך לקה בעזה. תחילת קלקולו בעזה דכתיב וילך שמשון עזתה וירא שם אשה זונה וגו'. לפיכך לקה בעזה דכתיב ויורידו אותו עזתה . והכתיב וירד שמשון תמנתה, תחלת קלקולו מיהא בעזה היה.
ויהי אחרי כן ויאהב אשה בנחל שורק ושמה דלילה. תניא רבי אומר אילמלא נקרא שמה דלילה ראויה היתה שתקרא דלילה דילדלה את כחו דילדלה את לבו דילדלה את מעשיו. דילדלה את כחו דכתיב ויסר כחו מעליו, דילדלה את לבו דכתיב ותרא דלילה כי הגיד לה את כל לבו, דילדלה את מעשיו דאיסתלק שכינה מיניה דכתיב והוא לא ידע כי ה' סר מעליו.
ויגדל הנער ויברכהו ה', במה ברכו, אמר רב יהודה אמר רב שברכו באמתו אמתו כבני אדם וזרעו כנחל שוטף. למה שנתאווה נתברך.

אתמר אמר ר' געוואלדיג, ועכשיו דאכשר דרא לא גרסינן ליה. מתקיף לה רבינו הקדוש, והקמאי קראי קדרשי. אמר ליה והכתיב ויהיו מלעיבים במלאכי האלהים. אמר ליה משום דקשו קראי אהדדי אנן ניזל ונסמי מדעתן? שבוק לקראי דאיהו דחיק ומוקמי אנפשייהו.

[berlbalaguleh]

רביה"ק זי"ע: ס'איז ידוע אז ס'פעלן גמרות פון מסכתות אין ש"ס. אפשר ביסטו משלים די גמרות. דו וואלסט געווען א וואונדערליכער פלאגיאריזירער. כמעט אזוי גוט ווי ר' משה די ליאון...!(לויט ר' יעקב מ'עמדין)...!

[ליטוואק פון בודאפעסט]

האסטו געמיינט אז די כולל איז בבחינת בר בי רב דחד יומא?

דאס קען דאך נישט זיין. אז עס מאכט געלט, מוז זיין אנדערע טיג. און אז נישט, פארמאכט זיך עס גלייך.

קלינגט דער טלפון היינט נאכמיטאג, טאקע אין די צייט פון בין הסדרים אין דער עולם הכוללים, און א וויכטיגע מעסעדזש הערט זיך הויך און קלאא. דאס איז א מעסעדזש פאר אלע נשים צדקניות, די וואס מאסען פון זיי זענען ערווארטעט פאר עפעס אין דער איד, אז זיי זאלען וויסען אז היינט איז די יארצייט פון מחברתו הטהורה פון ר׳ ישעיה׳לע, דער וואס האט אמת׳דיג געקאכט פאר די געסט.

הערסט א מעשה? נישט גענוג ר׳ ישעיה׳לע אליינס קומט ציר צוריק נעמען וואס ער האט מיר געגעבען, נאר יעצט קומט איינער א ראטטענבערג פון א"י בשם זיין ווייב אז מיר דארפען אלע צושטעלען. א ברודער איז זיי נישט גענוג געווען, יעצט איז מען אריבער צו די ווייב.

Sent from my LG-K373 using Tapatalk

[berlbalaguleh]

ליטוואק פון בודאפעסט: געדענק אז די אלע פריער'דיגע צדיקים זכותם יגן עלינו האבן געהאט רעבעצינס. און ווען נישט, האבן זיי געהאט טעכטער גרויסע און וועלט בארימטע רעבעצינס. און מ'דארף האלטן זייערע יארצייטן אויך...!

לאמיר אנהייבן מיט א גרויסע רעבעצין שתליט"א וועלכע לעבט און זאלל לעבן לאורך ימים ונשים. די בעלזא/וויזשניצער רעבעצין. זי לאזט איבער איהר מאן דעם רב מיט זיינע בעיבי סיטערס. זי גרייט אן געניג עסן אין פריזער/מייקרא וועיוו. און זי פארט זיך ארום איבער די וועלט פראווען רבי'סטווא ביי איהרע חסידים וחסידיות...!

[ליטוואק פון בודאפעסט]

זייער שיין פון דער בעלז\וויזניצער רביצין. אבי זי קלינגט מיר נישט דערוועגען.

Sent from my LG-K373 using Tapatalk

[טאמבל סאס]

מיין ברודער איז א מלמד אין א חדר. זענען געווען אסאך מייזן אין זיין כיתה. האט ער אויפגעהאנגען א ר' שייעלע בילד. די נעקסטע צופרי זענען די קינדער געקומען אין חדר האבן זיי געזעהן די מייזעלעך האבן אינגאנצן צעפרעסן דעם בילד. כמיין ס'איז געווען אויף זיין יארצייט..

[קאך_לעפל]

ג' אייר צייכנט זיך אפ, אלס דער אונטערנאציאנאלער אידישער פרעס טאג.

מ'בייסט אריין אינעם הייסן זענפט רינעדיגער פאסטאראמע זעמל, אונטערגעשלאגן מיטן קראך פונעם פיקל. און הארט איידערן מעלה גרה זיין, שרייט מען אויס מיט פארגלייזטע אויגן שייע בן רעב משה.... סארא שאנדע.
ווי פאסיג זענען די ווערטער פון רבי בחיי דיין אין חובת הלבבות שער הפרישות: עושים בטנם אלוהיהם ותורתם מלבושיהם. מ'לייגט אריין ג-ט אינעם פרעסעריי, מ'נעמט אן אלטן אונגארישער צדיק און מ'פרעסט אויף זיין רעכענונג.

[ערליכער איד]

ווען די שעמסט דיך ווען נישט וואלסטו געשריבן אויף אברהם אבינו אויכעט מיט זיין צינג פלייש און דווקא מיט חרדל פרעסעריי....

[קאך_לעפל]

די גמרא זאגט אין מסכת יומא: כל האוכל ושותה בתשיעי – מעלה עליו הכתוב כאילו התענה תשיעי ועשירי...
פראגע: פארוואס זעט מען נישט די די מאסיווע פרעסעריי ערב יום הקדוש, ווען די תורה הק באפעלט צו עסן?
פארוואס האט מען פונקט אויסגעקליבן ג' אייר אלס דער אונטערנאציאנאלע פרעס טאג, און עס אין פרעצעדענטלאזע שריט אנגעשמירט אויפן הייליגן צדיק רבי ישעי'לע זי''ע?