עס מוז זיין אז ג-ט זעלבסט האט דא פארארבייט מעשים!

[קאך_לעפל]

[justify]אנגעהויבן האט זיך אלעס אינעם זיבעטן טאג. נאך דעם וואס דאס פאלק פון פרס און מדי האבן געהוליעט פאר גאנצע דריי מאנאטן נאכאנאנד אן קיין אפשטעל, האט דער קעניג אחשוורוש אפגעראכטן א קלענערע, און א מער אינטימישע מאלצייט, אצינד בלויז מיט די איינוואוינער פון די הויפט שטאט שושן. טאג זיבן פונעם מאלצייט, ווען דער קעניג איז שוין געווען גוט געלוינט פון די פעסער וויין וואס ער האט זיך אריינגעגאסן אין מאגן, האט דער קעניג אחשוורוש פארארדענט די זיבן סריסים וואס זענען שטענדיג געשטאנען גרייט צו זיין באפעל, אז זיי זאלן ברענגן די קעניגן ושתי פאר אים, אנגעקליידעט מיט איר קעניגליכער קרוין. צו צייגן פאר די נאציאנען און די הארן איר שיינקייט, ווארום זי איז ווירקליך געווען א שיין געשטאלט.

די קעניגן ושתי האט אבער נישט געהאלטן ביים קומען, ווי עס האט געלויטעט דאס באפעל פונעם קעניג דורך די סריסים, זי האט נישט אויסגעפאלגט די באפעל פון די סריסים זיך צושטעלן פארן קעניג. דער קעניג האט נישט בלויז אויסערליך געצארנט, נאר אויך אינערליך האט ער געפלאקערט און געזידט ווי א הייסער קעסל אויפן פריפעטשיק.

דער קעניג האט זיך געוואנדן צו די געלערענטע לייט, צו די אסטראנאמער, און היסטאריקער, ווארום דאס איז געווען די קעניגליכער פראצעדור ווען ס'האט זיך געהאנדלט אין יוסטיץ. ווי אויך זענען אנוועזען געווען די העכסטע אדוואקאטן און געזעץ-געבער פון פרס און מדי, וועלכע זענען גרינטליך באהאווענט אין די פערסישע קאנסטאטוציע. און זיי זענען געווען די נאנסטע צום קעניג, די מיניסטארן כרשנא, שתר, אדמתא, תרשיש, מרס, מרסנא, און ממוכן, די העכסטע מיניסטארן פון פרס און מדי וועלכע פארמאגן שטענדיגע און אומבאגרעניצטע צוטריט צום קעניג.

די אנקלאגע:
ושתי, האט נישט אויסגעפאלגט די באפעל פון די סריסים, נאכדערצי ווען ס'איז געקומען פון זיין מייעסטעט דער קעניג זעלבסט.

פּראָקוראָר ממוכן:
די פארברעך איז נאך פיל טיפער און ברייטער ווי דער מוח קען זיך בלויז פארשטעלן. נישט בלויז זיין מייעסטעט דער קעניג האט ושתי דא אזוי גוט מסדר געווען, נאר אלע הארן און אלע נאציאנען פון די גאנצע מעכטיגע אימפעריע פון אחשוורוש דער העלד זענען אצינד אין א געפערליכער פעקל. פארוואס? ווייל אצינד גייען אלע פרויען אין לאנד זיך האלטן אויף די זעלבע סאציאלע שטאנד ווי זייער מענער. די מענער וועלן זיין אראפגעקוקט און דערנידערט אין די אויגן פון זייער אייגענע ווייבער. די ווייבער וועלן ארגומענטירן קעגן זייערע מענער: נעמליך,דער קעניג אחשוורוש האט געלאזט רופן זיין ווייב ושתי, און זי האבן אים געוויזן א גרויסער זאפטיגער פייג. און אז די קעניגן זעלבסט פייפט זיך אריין אין איר מאן, אפגעזען פונעם פאקט אז ער איז א גרויסער מעכטיגער קעניג, דאן פארוואס זאל איך פאלגן מיין מאן דער שוסטער? מיט וואס איז ער מער ווי מיר? פילייכט זאל ער מיר פאלגן. ממוכן האט ארגומענטירט און מיט רעכט, אז מיט אזא סארט סאציאלע ארדענונג וועט דאס גאנצע אימפעריע אונטערגיין איבער נאכט, בלויז פון די גראנדיעזע שלום בית קאטאסטראפעס זעלבסט. און דאס דאזיגער טאג וועט אנזאגן אז בלויז הארענטעס פון פרס און מדי עקזיסטירן, ווען די רייד פון די קעניגן וועט געהערט ווערן איברן לאנד, און עס וועט מער נישט עקזיסטירן אזא באגריף ווי הארן פון פרס און מדי. די ביז איצטיגע שטאנדהאפטיגע מענער-דאמינאציע וואס איז שוין אין קראפט זינט ג-ט זעלבסט האט דעקלערט פאר חוה: והוא ימשל בך, וועט גענצליך אראפגעווישט ווערן פון די מאפע, און דאס וועט ארויסרופן שאנדע און צארן ביי די מענערישע באפעלקערונג אין לאנד. דאס איז אן אויסשליסליכער נאציאנאלע נויט-פאל, האט פּראָקוראָר ממוכן דעקלערט פאר די באזארגטע אנוועזענעדע מיט אנגסט.

דאס לעזונג:

ערשטע שטאפל:
אז ס'וועט דעם קעניג געפעלן: ווי באלד ס'הערשט אצינד אן אויסנאמס-צושטאנד אין לאנד, זאל דער קעניג זיך דערווארבן דאס אויסשליסליכע מאכט. די מיינונגען פון די קאנגרעס און סענאט זענען פון אצינד אן אנגעהויבן מער נישט מאסגעבנד. פון היינט איז דער קעניג דאס אויסשליסליכסטער אויטריטעט אין לאנד און ער קען טאן וואס אימער זיין הארץ באגערט. ער איז שוין מער נישט אנגעוויזן אויף חכמים, יודעי העתים, יודעי דת ודין, גאנישט! און דאס זאל פראטאקאלירט ווערן אין די געזעץ ביכער פון פרס און מדי, אזוי אז דאס זאל אויף קיין שום פאל נישט קענען גענדערט ווערן. און ס'זאל גלייכצייטיג דייטליך ארויס שטיין דער אורזאך פארוואס, ווייל ושתי האט נישט געהארכט דעם קעניג, דאס האט געזאלט אנדייטן אז דער קעניג דער מאן, איז העכער אין אויטריטעט פון די קעניגן די פרוי.

צווייטע שטאפל:
ושתי מוז זאפארט ווערן אויס קעניגן, זי מוז פארוואנדלט ווערן צו א אלגעמיינע ציווילע בירגערין. און איר מייעסטעט זאל טראנספארמירט ווערן צו א צווייטע קעניגן, וואס ווייסט עטוואס בעסער ווי ושתי.

דריטע שטאפל:
איינמאל ושתי איז שוין א ציווילע בירגערין, איז זי דאך א מורד במלכות, אויף וואס די שטראף איז הענגן!

די רעזולטאטן וועלן זיין:
אז די באפעלקערונג וועט הערן וואס ס'האט זיך אויסגעלאזט מיט די חצופה ושתי, וועלן די פרויען איינמאכן אין זויערן, און אלע פון גרויס ביז קליין וועלן רעספעקטירן זייער מענער, אויב זיי ווייסן וואס ס'איז ווירקליך גוט פאר זיי, און די פעמעניסטישע באוועגונג וואס ושתי האט בייזוויליג געוואלט איינשטעלן אין פרס און מדי, וועט פארשוואונדן ווערן פונעם האריזאנט פאר שטענדיג.
פאר די אנוועזנדע הארן און רעגירונגס באמטע איז דאס זייער געפאלן, נעמליך, ווער וויל דען נישט זיין פולשטענדיג בעלעבאס ביי זיך אין שטוב? דאס געזעץ איז עמטליך אריין אין קראפט!
ס'איז ארויסגעשיקט געווארן דעקרעטן איבער אלע לענדער פון די אימפעריע, יעדע לאנד און נאציאן אויף איר איינגארטיגער שפראך: יעדער מאן איז בעלעבאס ביי זיך און שטוב. און צו פארזיכערן אז די פרויען קאנספערירן נישט אונטער די רוקן פון זייער מענער, און רעדן שלעכטס אויף זייער מענער צו זייער פריינדינס אונטער די ביימער אין די קאנטרי אויף אונגאריש, האט דאס געזעץ גלויטעט אז די פרויען מעגן בלויז רעדן אין די שפראך פונעם מאן. און דאס סאציאליע ארדענונג אין לאנד איז צוריק געשטעלט געווארן אין פלאטץ ווי בעפאר.

דאס פאקט אז אחשוורוש איז דעקלערט געווארן אלס דאס אויסשליסליכסטער אויטריטעט אין פרס און מדי, און אז ער איז מער נישט געווען אנגעוויזן אויף די קאנגרעס און סענאט פון פרס און מדי, האט געשפילט א שטארקע ראלע אין די שפעטערע געשענענישן.

אויפן איניציאטיוו פון פרעימער מיניסטער המן, גיבט אחשוורוש ארויס א דעקרעט אויסצופירן א ברוטאלער האלאקאסט אויף א גאנצער אומשולדיגער נאציאן, מענער, פרויען, און קליינע קינדער. וואו זענען די חכמים, די יודעי העתים, די יודעי דת ודין? זיי זענען נישט צום האבן!

זיין נייעם קעניגען אסתר באשולדיגט דעם פרעימער מיניסטער המן, מיט הארבע פארברעכן קעגן די מענטשהייט, מיט קאנספיראציע אויסצומארדן א גאנצער נאציאן צוליב נידערטרעכטיגע ראסיסטישע אורזאכן. דער קעניג ווערט בייז ווי א ווילדער טערק, און נעמט זיך שרייען מיט באנומענע קולות: הענגט דעם הונט! איין מינוט, פאוואליע, וואו זענען די חכמים, די יודעי העתים, די יודעי דת ודין? זיי זענען נישט צום האבן!

דער קעניג קאנפיסקערט דאס פאלאץ פון זיין פרעימער מיניסטער המן, און שענקט דאס אוועק פאר מרדכי און אסתר. וואו זענען די חכמים, די יודעי העתים, די יודעי דת ודין? זיי זענען נישט צום האבן!

דער קעניג באשטומט דעם פארהאסטן זשיד מרדכי אלס זיין נייער פרעימער מיניסטער! וואו זענען די חכמים, די יודעי העתים, די יודעי דת ודין? זיי זענען נישט צום האבן!

דער קעניג ערלויבט פאר די אידן דורכצופירן א ברוטאלער פּאָגראָם אויף די פערסישע באפעלקערונג, פינף הונדרעט אומשולדיגע מענטשן פארלירן זייער לעבן אין בלויז איין טאג! וואו זענען די חכמים, די יודעי העתים, די יודעי דת ודין? זיי זענען נישט צום האבן!

די צען בענאקעס פון המדתאזאהן ווערן ארויפגעצויגן אויפן שאנד סלופ אין צענטער פון שושן מיט שאנדע, וואו זענען די חכמים, די יודעי העתים, די יודעי דת ודין? זיי זענען נישט צום האבן!

עס מוז זיין אז ג-ט זעלבסט האט דא פארארבייט מעשים ווי אזוי זאכן זאלן פאלן אין פלאטץ![/justify]

[תרמב]

יעדעס ווארט קען מען צאמקושן, אזוי גוט אראפצולייגן די פאלטיק פון דעמאלטס!

[קאך_לעפל]

[justify]ווען מ'באזוכט היינט איראן אדער סיריא, באגעגנט מען זיך מיר אן דערשיינונג וואס איר וועט נישט געפונען אין קיין אלגעמיינע ציוויליזירטע לענדער. עס עקזעסטירט דארט א ספעציעלע אגענטור צו איפארסירן שאַריאַ געזעץ! ספעציעלע פאליציי איינהייטן פאטרולירן די גאסן און פארזיכערן אז די באפעלקערונג האלט זיך צו די שטרענגע איסלאמישע געזעצן, און די דאזיגע וואס פארלעצן דאס געזעץ זענען אויסגעשטעלט צו הארבע שטראפן דורך די איסלאמישן שטאַט געריכט.

פאר א סאך יארן צוריק, נאך איידער ג-ט האט זיך באוויזן צו מוחמד און אים פארשוואנגערט מיט די שאַריאַ קרעפליך, האט אין פערסיע עקזעסטירט א ענדליכער סארט אגענטור.
נאכן שענדליכער הינריכטונג פון קעניגן ושתי, איז געגרינדעט געווארן אין שושן א ספעציעלע אגענטור, וואס האט זיך גערופן די ווייבער אגענטור. זייער אויסשליסליכסטער מיסיע איז געווען צו פארכאפן מיט די געוואלד ווייבער און מיידליך פון אונטער די אויפזיכט פון זייער מענער און עלטערן! די פארכאפטע זענען דאן אפגעפירט געווארן צו ספעציעלע האלטונג צענטערן, וואו זיי זענען געהאלטן געווארן אונטער די אויפזיכט פון די ווייבער מיניסטעריום אין שושן, וואס איז געשטאנען אונטער די קאמאנדא פון מיניסטער הגי, דער ווייבער מיניסטער!

עס האט געדויערט א גאנצער יאר ביז די פרויען זענען געווארן פולקאם גרייט זיך צו לייגן מיט אחשוורוש אין בעט אריין! זעקס מאנאטן זענען זיי באהאנדלט געווארן מיט בלויז איין סארט באלזאם, וואס האט זיך גערופן שמן המור, און נאך זעקס מאנאטן מיט אנדערע סארט פּערפומען. און בלויז נאך די דאזיגע לאנגע אינטענסיווע באהאנדלונג האבן די פרויען זיך געקענט ווייזן דאס געזיכט פאר זיין הויכגעשעצטער מייעסטעט.

ווען ס'איז אנגעקומען די גרויסע נאכט, איז דאס פרוי אדער דאס מיידל געברענגט געווארן צום פאלאץ פון אחשוורוש. און נאכדעם אין די בעגינען איז זי אריבערגעפירט געווארן צו א צווייטע אויפהאלטונג צענטער, וועלכע איז געשטאנען אונטער די אויפזיכט פון מיניסטער שַׁעֲשְׁגַז. דער שַׁעֲשְׁגַז האט אויפגעפאסט אויף אלע מעטרעסיזן פונעם קעניג! די פרוי אדער מיידל האט זיך קיינמאל מער נישט געקענט שטעלן פארן קעניג, סיידן דער קעניג האט איר גערופן ביים נאמען.

באלד נאך די הינריכטונג פון ושתי איז די אידישע פרינצעסן אסתר דראמאטיש פארכאפט געווארן פון איר שוועסטערס קינדס הויז, מרדכי, דורך ספעציעלע איינהייטן פון די ווייבער אגענטור. זי האט באלד גאר שטארק אויסגענומען ביים ווייבער מיניסטער הגי. ער האט צוגעאיילט אירע באהאנדלונגן און אירע עסן פארציעס, און ער האט געשטעלט צו איר פארפיגונג זיבן מוידן איר צו באדינען. אצינד האט שוין אסתר אויך אויסגענומען ליבשאפט ביי אלע וואס האבן געהאט מיט איר פארקער.

מרדכי האט איר איר געהאט אנגעזאגט אז זי זאל אויף קיין פאל נישט פארעפענטליכן קיין דעטאלן איבער איר אפשטאם. מרדכי האט זיך ווארשיינליך געזארגט אז אויב די פרויען מיניסטעריום וועט זיך דערוויסן אז זי שטאמט פון א קעניגליכע דינאַסטיע, וועלן זיי זען צו דעם אז זי זאל אויסגעקליבן ווערן צו זיין די נאכפאלגערין פון קעניגן ושתי. און מרדכי האט באשיינפערליך נישט געוואלט אז זיין שוועסטערס קינדס זאל דינען אלס די קעניגן פון אזא אומסטאבילער מאן וועמען מ'קען אויף קיין פאל נישט פאראויס אויסרעכענען. די נאכאנאנדע קוריאזן און קאפריזן פון קעניג אחשוורוש האבן שוין דאן געקלינגן איבער די גאנצע וועלט! מרדכי האט יעדען אייציגער טאג בייזוכט ביי אסתר, זיכער צו מאכן אז זי געפונט זיך אין א גוטע ארדענונג צושטאנד, און אז זי האלט זיך דאס מויל הערמעטיש פארשלאסן. ס'האט אים אבער קיין סאך נישט געהאלפן. פיר יאר נאכן הינריכטונג פון קעניגן ושתי, אינעם טאג עשרה בטבת, איז אסתר געשטעלט געווארן פארן קעניג אחשוורוש!

ווי נאר דער קעניג האט איר געזען האט ער באלד געוויסט א דאס איז עס! איר שיינקייט און עלעגאנטע באנעמונג האט אים ממש פארבלופט! דער קעניג איז ממש געווען שפראכלאז אין די אנוועזנהייט פון די שיינע אסתר! אסתר איז באשטומט געווארן אלס די נייע קעניגן פון פרס און מדי! מזל טוב! גרויסע מאלצייטן זענען געפראוועט געווארן איבער די גאנצע אימפעריע צו פייערן די קרוינונג פון אסתר, און ווי אויך האט די רעגירונג פראקאלאמירט א שטייער-שניט אין די עהערע פון אסתר.

מיט דעם האט דער באשעפער באזארגט איז די אידן זאלן האבן אן אנ''ש אינעם קעניגליכער הויז, על כל צרה שלא תבוא![/justify]

[[NAMELESS]]

אשאד אז מען קען נישט לייקן א זאך מער ווי איינמאל, סאיז באמת א הערליכע שיינע ארבעט

[גיב א שמייכעל]

איינער האט מיר אריינגעשיקט א גוט ווארט:
בשלמא אחשורוש האט געמאכט די סעודה בחצר גינת ביתן און נישט אינעווייניג וועגן קאראנא, אבער ושתי וויאזוי האט זי געמאכט אין בית המלכות אשר למלך אחשורוש מען טאר דאך נישט מאכען אינעווייניג???
אלא מאי' מוז זיין, אז זי האט שוין געהאט גענומען די וואקסין!
וויאזוי ווייסט מען אז זי האט גענומען די וואקסין??
ווייל עס איז איר געוואקסען א וויידעל....