זענען די ראזנבערגס (טאקע) שולדיג געווען?

[berlbalaguleh]

נאנט צום סוף פון די צווייטע וועלט מלחמה בערך אין יאר 1945. און די תקופה גלייך נאכדעם האט זיך אפגעשפיעלט אין אמעריקע א שטארקע, און טרויעריגע דראמא.

אזוי ווי ס'איז באוואוסט האט אמעריקע, בחסדי השי"ת מצליח געווען צוזאמצושטעללן די אטאמישע באמבע. וואס דאס האט פאקטיש געראטעוועט שווערע הונדערטער טויזנטער און אפשר מיליאנען לעבנס פון אומשולדיגע ציווילע און מיליטערישע מענטשן. ווייל , ווי באוואוסט זענען די יאפאנער, די שותפים פון די נאציס, ימ"ש געווען זייער ברוטאלע און עקשנות'דיגע קעמפער. זיי האבן נישט געוואלט אויפגעבן דעם קאמף אקעגן אמעריקע און אנדערע לענדער. ביז דער פרעזידענט פון אמעריקע הערי ס. טרומאן האט זיי געווארנט אז אמעריקע וועט ווארפן אויף זיי די נייע, גאר געפערליכע אטאמישע באמבע. אין אנפאנג האבן זיי זיך אויסגעלאכט. נאר ווען אמעריקע איז געווארן אנטשלאסן צו נוצן דעם נייעם, געפערליכן וואפן. און נאך באמבארדירן 2 גרויסע אינדוסטריעלע שטעט אין יאפאן האבן זיי זיך געבראכן און אויפגעגעבן דעם קאמף. וואס מיליטערישע עקספערטן האבן געשאצט אז דאס וואלט געקאסט די לעבנס פון נאך (לכה"פ) א מיליאן אמעריקאנער סאלדאטן. ווען די מלחמה האט זיך געענדיגט האבן אמעריקע מיט ענגלאנד, אנגעפיהרט דורך ווינסטאן טשוירטשיל געארבעט בשותפות אויף די אטאם באמבע און זיי האבן געטיילט די סודות פון איהר פראדוקציע.

סאוויעט רוסלאנד. אנגעפיהרט דורך דעם מאסן מערדער יאזעף סטאלין, האט אויך זייער שטארק געוואלט ווערן א שותף צו די סודות פון אטאם פראדוקציע. נאר די פיהרערס פון ביידע לענדער. אמעריקע און בריטאניע האבן נישט געהאט קיין צוטרוי צו די פארדארבענע קאמוניסטישע רעזשים. די רוסן האבן אבער געארבעט אויף אלע כוחות צו דערווישן די סודות פון אטאם פראדוקציע. איינס פון די זאכן וואס זיי האבן געהאט איז א פארצווייגטע נעטווארק פון שפיאנען סיי אין אמעריקע און סיי אין ענגלאנד.

איך וויל (בכונה) נישט שרייבן קיין דאטומס פון די געשעענישן ווייל דאס וועט נאר מאכן די גאנצע פרשה מער קאמפליצירט. און מ'וויל עס מאכן בקיצור נמרץ.

איין טאג האט זיך די וועלט אויפגעוועקט צו דעם (שרעקליכן) פאקט אז רוסלאנד האט געטעסט אן אטאמישע באמבע. דאס האט אריינגעווארפן די פרייע וועלט אין א שאק. און א שרעקליכע זארג איבער וואס די קאמוניסטן וועלן טון מיט די באמבע. אין אמעריקע איז דער אויפברויז אז שפיאנען האבן איבערגעגעבן די סודות פאר רוסלאנד געווען שרעקליך. די רעגירונג האט פרובירט צו דערגיין ווער ס'האט זיי איבערגעגעבן דעם צוזאמשטעל פון די אטאם באמבע.

דא קומען אריין די (אידישע) קאפל דזשוליוס און עטל ראזנבערג אין שפיעל. זיי זענען ביידע געווען פייער'דיגע קאמוניסטן. אויך שטארקע סימפאטיזירער מיט די רעגירונג פון סטאלין. דער שוואגער פון דזשוליוס (עטל'ס ברודער) איז אויך געווען איינער פון די ארבעטערס אין די אטאמישע לאבאראטאריע אין לאס אלאמאס, ניו מעקסיקא.

כדי זיך ריינצוואשן. האט עטל'ס ברודער, דעיוויד גרינגלאס געזאגט פאר די רעגירונגס באאמטע וועלכע האבן געווארפן א חשד אויף איהם אז ער האט ארויסגעשמוגלט די סודות פונ'ם אטאמישן באמבע צוזאמשטעל און עס איבערגעגעבן פאר זיין שוואגער און שוועסטער. און זיי האבן עס דורך די קאמוניסטישע נעטווארק פון שפיאנען איבערגעגעבן פאר רוסלאנד.

ביי א געוויסן פונקט האט מען זיי ביידע (דזשוליוס און עטל) ארעסטירט און מ'האט זיי געשטעלט צו א משפט. איין זאך האט די אמעריקאנער רעגירונג געמאכט זיכער. כדי מ'זאלל זיי נישט חושד זיין אין אנטיסעמיטיזם האבן זיי געמאכט זיכער אז אלע הויפט רעגירונגס באאמטערס וועלכע האבן זיי געמשפט' זענען געווען פון אידישן אפשטאם.סיי דער דזשאדזש אוירווינג קאופמאן. און דער הויפט פראסעקיוטאר און זיין אסיסטענט זענען געווען אידן. נאר פייער'דיגע אנטי-קאמוניסטן.

וויאזוי דער גאנצער טרייעל איז צוגעגאנגען איז געווען זייער שטארק איינזייטיג. אקעגן די ראזנבערגס. און די רעגירונג פון איהר זייט האט נישט געברענגט קיין איין עכטן דאקומענט אדער אנדערע עווידענס אז די ראזנבערגס האבן געהאט אין זייער באזיץ און איבערגעגעבן די סודות פאר די רוסישע שפיאנען. דער גאנצער משפט איז געווען באזירט בלויז אויף די עדות'שאפט פון דעיוויד גרינגלאס. וועלכער האט געטענה'ט אז ער האט אויפגעצייכנט עטליכע פאפירן מיט די סודות פון די אטאם באמבע און דאס איבערגעגעבן פאר זיין שוואגער און זיין שוועסטער האט עס אפגעטייפט און ווייטער געגעבן פאר די שפיאנען. נאר דאס אמעריקאנער פאלק איז, ווי פריער געשמועסט געווען זייער שטארק אויפגעברויזט איבער דעם פאקט אז די רוסן האבן דערווישט די אטאם באמבע. האבן זיי געזוכט א קרבן. דער אמעריקאנער פרעזידענט אייזנהאוער איז אויך געווען אונטער א שטארקן דרוק צו געפינען און באשטראפן די שולדיגע.

פרעזידענט אייזנהאוער האט געאפפערט פאר די ראזנבערגס אז זיי זאללן מודה זיין אין זייער שולד און מ'וועט זיי נישט געבן קיין טויט שטראף. אבער זיי (ביידע) האבן זיך גע'עקשנ'ט אז זיי האבן נישט איבערגעגעבן קיין שום סודות צו די רוסישע שפיאנען. צום סוף האט מען זיי אריינגעלייגט אין עלעקטריק טשעיר...! וחמת אמעריקע שככה...!

איך האב אויסגעלאזט זייער א סאך קלענערע און גרעסערע דיטעילס פון די גאנצע פרשה כדי עס נישט צו מאכן קאמפליצירט. די גאנצע פרשה ווערט באשריבן אין עטליכע ביכער. איינס פון זיי איז מיט'ן נאמען. .."עטל ראזנבערג. אן אמעריקאנער טראגעדיע"...!

ס'דארף באמערקט ווערן אז דעיוויד גרינגלאס, כאטש ער האט געארבעט אין לאס אלאמאס האט ער נישט געהאט קיין שום טעכנישע פאכמאנשאפט. ס'איז ארויסגעקומען ביי דעם משפט (דורך די ראזנבערגס' לאיערס) אז ער איז אדורכגעפאללן אין א יעדן טעכנישן קורס וואס ער האט נאר גענימען אין זיין לעבן. ממילא, האבן די לויערס געטענה'ט אז דעיוויד גרינגלאס איז נישט געווען ביכולת אפצוצייכענען און אויפשרייבן קיין שום טעכנישע אינפארמאציע וואס וואלט געהאלפן פאר די רוסן צו דערגרייכן די אטאם באמבע. דזשוליוס ראזנבערג איז יא געווען אן עלעקטריקל ענדזשיניר. נאר די רעגירונג האט טראץ דעם פאקט וואס זיי זענען איבערגעפאללן זיין אפארטמענט און קאנפיסקירט פארשידענע פאפירן, נישט אויפגעברענגט קיין איין טעכנישטן אדער ענדזשינירינג פאפיר. וואס אין נארמאלע צייטן וואלטן זיי ארויס אומשולדיג.

די שפעקולאציעס זענען ענדלאז. איבער וויאזוי די קאמוניסטן האבן דערווישט די אטאמישע סודות. איין זאך איז אבער קלאר פעסטגעשטעלט געווארן ביי דעם טרייעל. אז זיי האבן יא געוויסט ווער די עכטע שפיאנען זענען. און זיי האבן נישט געוואלט פארציילן.

ס'איז אויך מעגליך אז די קאמוניסטן האבן באקומען די אטאמישע סודות דורך זייערע שפיאנען אין ענגלאנד. זיי האבן געהאט איינעם (פון א גרופ) מיט'ן נאמען קים פילבי. ער האט געארבעט אין די בריטישע מיליטערישע אינטעלידזשענס. און געווען א הויכער רעגירונגס באאמטער. און ער איז געווען א פייער'דיגער, אידעאלאגישער (נישט בלויז פאר געלט) קאמוניסט. און סימפאטיזירער פון דעם סטאלין רעזשים.

[שערי יושר]

שכח זיידי פארן ארויפברענגען די ווייטאגליכע פרשה. היינט איז שוין פעסגעשטעלט אז די שפיאן איז געווען קלאוס פוקס. שמעון ראלניצקי האט געשריבן זייער א שיינע ארטיקל דערפון אין דער שטערן

[berlbalaguleh]

שערי יושר: ייש"כ. ס'איז אינטרעסאנט צו באמערקן אז קלאוס פוקס איז געווען אפשר דער איינציגסטער אדער פון די גאר ווייניג צווישן די קאמוניסטישע סימפאטיזירער וועלכער איז נישט געווען קיין איד. ליידער. די איבערוויגנדע מערהייט פון די קאמוניסטן אין אמעריקע זענען געווען פון אידישן אפשטאם. דאס האט געגעבן א פתחון פה פאר די אנטיסעמיטן צו פארשפרייטן זייער שנאה צו אידן.

ס'האט נישט געפעהלט קיין אנטיסעמיטן אין אמעריקע. אזוי ווי טשארלס לינדבערג, ימ"ש. און דער גרויסער און העלדישער אמעריקאנער גענעראל דזשארדזש פעטטאן איז אויך געווען א וויסטער אנטיסעמיט. ביז גענעראל אייזנהאוער, וועלכער איז באמת געווען אן אוהב ישראל, האט איהם ערלעדיגט. מיט די הילף פון א אידישן אפיציר אין די אינטעללידזשענס סערוויס. אויף וואס איך פלאן אי"ה אויפצומאכן אן אשכול.

[שערי יושר]

מען האט געארבעט פאר א פארדאן פאר די ראזענבערגס, עפעס איז געווארן דערפון?

[berlbalaguleh]

יא: נישט נאר אין אמעריקע נאר איבער פארשידענע לענדער פון די וועלט. ספעציעל אין פראנקרייך. וואו די קאמוניסטשיע פארטיי איז געווען זייער שטארק.

נאר דער אמעריקאנער פרעזידענט דווייט אייזנהאוער זכר צדיק לברכה האט זייער קלאר פעסטגעשטעלט אז אויב זיי (די ראזנבערגס) וועללן מודה זיין אין זייער שולד און פארציילן ווער די שפיאנען זענען געווען, וועט ער זיי שענקען דאס לעבן. נאר זיי זענען געווען פארעקשנ'ט נישט מודה צו זיין. דער פרעיזדענט האט אויפגעמאכט א ספעציעלע האט ליין וואס איז געווען גרייט אין זייער תפיסה צעל אין סינג-סינג. און ער האט געווארט אויף זייער ענטפער. אנדערש האט ער נישט געקענט האנדלען ווייל דאס אמעריקאנער פאלק איז געווען זייער שטארק אויפגערעגט איבער דעם פאקט אז רוסלאנד די מלכות הרשעה האט זיך ערווארבן די אטאם באמבע. וואס אלע עקספערטן האבן געהאלטן אז די רוסישע טעכנאלאגיע איז נאך אזוי ווייט צוריקגעשטאנען אז ביז צען יאר וועללן זיי נישט קענען פראדוצירן די אטאם באמבע. און פלוצלינג האבן זיי דאס געהאט. און זיי האבן אנגעזייט שרעקליכע חורבנות מיט דעם (נייעם) כח וואס דאס האט זיי געגעבן. די מיליטערישע און פאליטישע עקספערטן האבן געהאלטן אז די פראבלעמען וואס רוסלאנד צוזאמען מיט טשיינע האבן אנגעמאכט פאר אמעריקע און פאר די וועלט אין קארעא איז געווען אלס רעזולטאט וואס זיי האבן זיך געשפירט געניג שטארק אקעגן אמעריקע...!

[שערי יושר]

די זאגסט אז אייזענהאור האט געוויסט אז זיי זענען אימשילדיג?

[berlbalaguleh]

שערי יושר: איך האב דאס קיינמאל נישט געזאגט. אייזנהאוער האט געוואוסט אז זיי ווייסן ווער די אמת'ע שפיאנען זענען. און וויאזוי די אטאמישע סודות זענען אנגעקומען צו דעם רוסישן מיליטער.

ווע ער וואלט געוואוסט אז זיי זענען 100% אומשולדיג און ער וואלט דאך רעקאמענדירט טויט שטראף פאר זיי וואלט ער אליין אויך געווען שולדיג אין רציחה. פאר הרג'נען אומשולדיגע מענטשן. צוליעב מעגליכע פאליטישע דרוק.

נאר אויב זיי האבן יא געוויסט די פאקטן און זיי האבן עס צוריקגעהאלטן ווען אמעריקע איז געווען אין א קריגס צושטאנד מיט רוסלאנד, איז זיך זיי געקומען טויט שטראף אלס פאררעטערס פון זייער לאנד בשעת מלחמה.

להבדיל אין די תורה איז אויך פארהאן אזא קאנסעפט. אזוי ווי ס'שטייט אין פסוק..."ואם לא יגיד, ונשא את עונו"...!