דאס הייסט אזוי, קען זיין אז איך מאך א גרויסן גראבן גרייז, אבער ווי איך פארשטיי טוט היינט דער חסידישער עולם הייראטן אביסעלע שפעטער ווי אמאל, ד.ה. מער אזוי ביי די 21. איז פארוואס זאל מען אין דעם צייט (פון די 18 ביז די 21) זיצן אינעם echo chamber וואס רופט זיך ישיבה וואו מ'טוט ראדיקאליזירט ווערן און מ'לערנט זיך נישט גארנישט אויס אויפ'ן לעבן און שפעטער גייט מען קיין ארץ ישראל וואו מ'ווערט פארכאפט אין ציונות און אנדערע שטותים, ווער רעדט נאך פון די ממון ודמים וואס דאס קאסט אפ פאר די עלטערן. און וואס טוען די מיידלעך אין דעם תקופה אין לעבן? מ'זיצט אין אפיסעס רח"ל, מ'ווערט צו נאנט מיט די פרענדס און דערנאך וויל מען ליידער נישט הערן פון הייראטן רח"ל. מ'קען דאך צו דער זעלבער צייט שיקן די קינדער אין קאלעדש וואו אנשטאט אריינזומען אין עפעס אן אירעלעוואנטע ניעש ווי תכלת אדער שיטת ר' גדליה נאדעל אדער ר' יואלי ראטה וועלן זיי באקומען א ברייטערן בליק אויפ'ן וועלט פון די ארט קלאסן און לערנען עפעס תכלית'יג אויפ'ן לעבן פון ביזנעס און STEM קלאסן. האבענדיג נאך אפציעס וועלן די מיידלעך זיך שוין נישט אזוי אנקלעבן מיט זייערע "פרענדס", זיי וועלן זיך אפלערנען פון די אראבקעס א זאך אדער צוויי איבער צניעות, און די בחורים וועלן זיך פון זיי אפלערנען זיך אביסעלע צוצופלייסן און נישט סתם זיצן ארומקוליצן און פארברענגען די צייט אויף נארישקייטן און אנדערע הארבע עבירות.
און נאכאמאל, איך רעד נישט פון סטוטשינע חסידים אדער אנדערע עקסטרעמע גרופעס, איך רעד פון אזעלכע וואס האלטן יא פון ארבעטן און עוסק זיין ביישובו של עולם, און זיי וואלטן געשיקט די קינדער אין קאלעדש ווען ס'וואלט פאסיג געוועהן פאר די חרדישע יונגווארג. וואס אלץ האלט איר דארף מען דארט צופאסן און טוישן כדי עס זאל ווערן א פאסיגע מקום פאר חרדים? כשר'ע עסן? מער אידישע לימודים? (גראדע אין מיינע צייטן פלעגט זיין א אידיש קלאס אין ברוקלין קאלעדש, מ'פלעגט דאס נעמען אנצופילן קרעדיטס
) Creationist און flat earth קלאסן? דירעקטע באסעס פון בפ/ווילי? הוקס אויפצוהענגען די היטן? אפגעטיילטע דארמס?
