ארטסקרול האט אנגעהויבן א נייע פראיעקט אין לשון הקדוש: משניות מיט ביאורים אין לשה"ק. דער ערשטער באנד סדר זרעים כרך א - מסכת ברכות איז שוין אין די געשעפטן (נישט ממש די ערשטע, פאר אפאר יאר צוריק האט ארטסקרול ארויסגעגעבן אויף מס' שביעית, אבער זיי האבן פריש דיזיינד די דעקל, און די תוכן איז אויך היבש מער אויסגעארבעט). די פראיעקט ווערט געספאנסערט דורך הרב צבי רייזמאן פון לאס אנדזשעלעס און ווערט פאררופן על שמו "מהדורת רייזמן".
די מענטשן וואס שרייבן די פירושים זענען די זעלבע ווי די עורכים פון די וועלט-בארימטע ביאור אויף ש"ס, מהודרת שוטנשטין. די משניות באשטייט פון פיר חלקים אחוץ די משניות גופא און פירוש הרע"ב. עס פארמאגט אויבן א ביאור קל, ענליך צו די ביאורים אויף תלמוד און מהודרת שוטנשטין. די הערות ווערן צוטיילט אין צוויי. איינס הייסט "ביאור" ווי חלקים פון די משנה ווערן אויסגעשמועסט מיט א ברייטקייט און אויף די ביאור זענען דא הערות וואס רופן זיך "עיונים". ביי די ענדע פון א יעדע פרק איז דא א מדור וואס הייסט "המשנה בהלכה", א ליקוט פון די הלכות וואס לערנען זיך ארויס דירעקט פון די משניות. די פרקים קומען מיט די קלאסישע הקדמות מיט וועלכע ארטסקרול איז באקאנט, און קאמפליצירטע משניות האבן א הקדמה קצרה אין די פירוש קצר אפטיילונג, און - ווען ס'פעלט זיך אויס - א מער דעטאלירטע הקדמה אין די "ביאור" אפטיילונג. אויבן אויף זעט די ערשטע באנד אויס ווי א הערליכע ארבעט, און די מהדורה פארשפרעכט צו זיין נאך א רינגעלע אין די קייט פון ארטסקרול'ס לייסטונגען פאר לימוד התורה ארום די וועלט.
איך האב נאר איין קריטיק, און דאס גייט אויף די "המשנה בהלכה" אפטיילונג, לדעתי פעלט דאס נישט אויס אין די משניות, עס איז נישט גוט פאר חזרה ווייל עס איז צו אריענטירט צו הלכה למעשה, און עס איז נישט גוט פאר הלכה למעשה ווייל עס איז צו בקיצור אין אויבערפלעכליך (עס קאווערט נישט חידושים פון גמרא). כ'האב א שפיר אז דאס איז נאכגעמאכט פון מתיבתא שע"י עוז והדר, וועלכע האבן א טענדאנציע צוצולייגן מדורים עד אין סוף אין זייערע גמרות. (זיי האבן אנגעהויבן מיט דריי אדער פיר מדורים און היינט האלט עס שוין ביי אכט אדער ניין).
איין טעות וואס כ'האב געטראפן, איז אז אין די הקדמה פון הרבנים שערמאן און זלאטאוויץ רופן זיי די "עיונים" אפטיילונג בשם "הערות", ווי עס זעט אויס איז קודם געווען די פלאן עס צו רופן הערות אבער זיי האבן באשלאסן אז הערות איז שוין פארנוצט אין זייער ש"ס מהדורה און מ'דארף א נייע נאמען. טאקע נאר א טעכנישע טעות אבער פאר פערפעקציאניסטן ווי ארטסקרול פאסט דאס נישט.
איך בין אויך נייגעריג צו זען וואס פאר א השפעה דאס וועט האבן אויף משניות סייעתא דשמיא וואס איז ביז היינט געווען פון די מערסטע פאפולערע פירוש אויף משניות.
