וויכטיגקייט, שוועריגקייט און עצות צו בלייבן אנאנים

[אךשמח]

ווען מען מאכט אפ צו שרייבן אויפן נעט, באשאפט מען זיך א ניק וואס איז געווענליך נישט די אייגענע נאמען, ווייל מען רעכנט צו בלייבן אנאנים. ווען די צייט גייט פארביי און מען האט שוין געשריבן א שיין ביסל מאמרים און תגובות, און מען זעט וואס אנדערע שרייבן, הייבט מען זיך אן צו באקענען מיט פרישע ניקים און מען שרייבט זיך צווישן זיך, און צוביסלעך ווערט מען גאר נאנטע פענע פריינט, און שפעטער מאכט מען אפ אז די צייט איז רייף און מען איז גרייט זיך צו באקענען פנים אל פנים.

אין רוב פעלער איז פונקט גענוג אז מען בלייבט גוטע פענע פריינט, ווייל איינמאל מען באקענט זיך האט מען אן אנדער בליק אויפן פריינט, און ווען מען שרייבט ווייטער, וועט מען טראכטן פיל מער ווי אזוי צוריקצושרייבן, ווי בעפאר דעם צוזאמטרעף. בכלל זענען מענטשן אנדערש אין גאס, ווי זיי זעען אויס אונטער זייער פענע נאמען.

איך שרייב דאס נאך יארן עקספיריענס און נאכן זיך באקענען מיט גאר אסאך גוטע פריינט. אין רוב פעלער האב איך גאר שטארק הנאה געהאט פון טרעפן נייע פריינט, וואס געווענליך זענען דאס אזעלכע וואס נאך לענגערע קארעספאנדענץ אויפן וועב און נאכן זען אז דא רעדט זיך פון אחי כלבבי האט זיך געשאפן א רייץ צו טרעפן און זיך צו באקענען אפענערהייט און אויסטון דעם שלייער וואס פארשווערט צו האבן א גוטע פריינטשאפט.

אויב האט מען א ניק וואס שרייבט בלויז נייעס און אנדערע אומשולדיגע ענינים וואס עס גייט נישט אן אויב מען ווייסט ווער עס איז דער שרייבער, א שטייגער ווי אךשמח וואס פארנעמט זיך קיינמאל נישט מיט קיינע קאנטראווערסיעלע ענינים, איז קיין פראבלעם, און מען עפענט זיך אויף שנעלער, אבער אויב האט מען א מיינונג אין טיפערע ענינים וואס מען וויל נישט אז די שטאט זאל דערפון וויסן, איז בעסער אז מען זאל פרובירן מיט אלע מיטלען זיך אפצוהאלטן פון ארויסגעבן דעם ניק פאר אנדערע, און דאס איז א פארשטענדליכע זאך.

אין די פארגאנגענהייט האב איך שוין עטליכע מאל חרטה געהאט ווען א ניק וואס איך האב זיך דערמיט באקענט מיט אנדערע אידן איז געגאנגען ווייטער ווי איך האב אמאל געקלערט אז עס וועט גיין, און דעריבער האב איך דעם ניק געמוזט פארשפארן און צו עפענען א פרישע ניק וואס זאל ממשיך זיין מיט די ענינים וואס יענער האט פארשפרייט, איז שוין פון די שווערערע זאכן צו טון, ווייל מען מוז אכטונג געבן אז מען שרייבט נישט ענליך צום פריערדיגען גלגול און דאס שטערט פון שרייבן מיט א קלארקייט.

דאס איז פארשטייט זיך אנדערש ביי יעדן מענטש, ווייל מאנכע אידן קענען שרייבן מיט כמה ניקים און יעדער ניק זאל האבן א צווייטע מיינונג יעדן טאג פון די וואך, אבער אלס א כלל איז נויטיג צו האלטן זיך אנאנים ווי ווייט מעגליך, און אפילו עס זעט אויס אז מען האט געטראפן א גוטער פריינט וואס טראגט די זעלבע מיינונגען ווי מיר, זאל מען זיך נאך אלס אפהאלטן פון באקענען פערזענליך.

[נח געציל]

קודם כל א גרויסן יישר כח אךשמח פאר די נוצבארע עדווייס, אזויווי איך בין היבש ניי אויף פארומס קען איך שטארק נוצן עצות פון ניקים וועלכע זענען מער עקספיריענסד ווי איך.

איך וואלט נאר געוואלט פרעגן איין זאך, און די שאלה איז מער געצילט צו די הנהלה. צו איז דא עפעס וואס די הנהלה פונעם סייט קען זען איבער א ניק? איך קען זיך נישט אזוי גוט אויס מיט די זאכן, אבער איך גלייב אז מיין אי מעיל אדרעסע זעט די הנהלה. איז דא נאך זאכן וואס די הנהלה זעט? ווצב"ש פון וועלכע שטאט איך שרייב, מיין איי פי אדרעסע, וכדו'.

[שמעקעדיג]

ביי "א ווארט צו דעם נייעם מעמבער", שטייט, צווישן אנדערס, ווי פאלגענד:

אידענטיטעט – ווי שפעטער דערמאנט, דארף יעדער וואס קומט אריין אין די פארומס זיך היטן נישט צו טאן דאס מינדעסטע וואס אנבאלאנגט דערגיין א צווייטנ'ס אידענטיטעט. אין "קאווע שטיבל", רעכנט דאס אויך אריין די חברי ההנהלה און מנהלים. דא קען יעדער זיין הונדערט פראצענט רואיג אז קיינער, אריינגערעכנט די מנהלים, וועט נישט פרובירן פארשן און גרינטעווען אין אייער מהות אדער אידענטיטעט. דאס טוען מיר אייך גאראנטירן.

viewtopic.php?f=12&t=5

[אךשמח]

איך וועל נישט שרייבן וואס די הנהלה קען יא אדער נישט זען, ווייל דאס ווייס איך נישט גענוי, און וועל לאזן פאר זיי עס צו ערקלערן, אבער אזויפיל קען איך יא זאגן, אז איך געטרוי זיי, אז אפילו אויב קענען זיי יא זען, האבן זיי אן אינטערעסע דווקא נישט צו דערגרינטעווען קיינעם'ס אידענטיטעט, ווייל פאר זיי ליגט איין זאך פאר די אויגן, אז דער פורום זאל זיין מיט א הצלחה און מען זאל זיך שפורן גוט און פריי צו שרייבן מיט א רואיגקייט.

[אייגענארטיג]

דאס האב איך געשריבן אין אן אנדערע אשכול

קינדערליך טוטס נישט אזעלעכע זאכן.

וועם גייט אן ווער יענער איז ווער דער איז.

די עיקר איז מלופטערט די מוח נאך א שווערע טאג ארבעט

אקעי טאטי, אז דו הייסט, וועלן מיר אלע שיין פאלגן.

א גוטע נאכט.

כהאב הנאה שעפעלע אזוי דארף מען טאקע טון ווען די וועסט גרויס ווערן וועסטו אויך אזוי פארשטיין.

ע"כ בדרך הלצה.

גיב מיר ביטע צו פארשטיין. פארוואס ווילסטו איינער זאל שרייבן דא ווען מ'וועט אים נאכגיין ווער ער איז.

ווען איך קום דא ארויף וויל איך זיך אויסלופטערן אן טראכטן אז איינער גייט נאכגיין ווער איך בין.

[קאמפיאטער]

אך שמח איך בין איינשטימיג מיט דיר!!!

[שמעקעדיג]

איך האף מען זאל נישט דארפן צוקומען צו דעם, אבער בכל אופן שהוא, אויב מאכט זיך אז איינער ווערט יא באקאנט מיטן צווייטן, ער געפינט אויס די ניק, האף איך אז מען קען האבן בלינדע טראסט אין אונזערע אינטעליגענטע שרייבער און ליינער דא, אז זיי וועלן פארשטיין אלעס צו האלטן פאר דעם גרעסטן סוד אונטער סיי וועלכע אומשטענדן. אפילו מען קומט זיי פרעגן אינפארמאציע פאר א שידוך.

[יואליש]

נישט ווייל איך ווייס, אבער כ'שטעל זיך פאר אז די הנהלה קען זעהן יעדע פאסט'ס איי פי אדרעסע. לגבי די פעסווארד זאגן זיי אז זיי זעהן עס נישט.

[שמעקעדיג]

נישט ווייל איך ווייס, אבער כ'שטעל זיך פאר אז די הנהלה קען זעהן יעדע פאסט'ס איי פי אדרעסע. לגבי די פעסווארד זאגן זיי אז זיי זעהן עס נישט.

איז מעגליך דורך אן IP אדרעס צו זעהן ווער דער יעניגער איז?

[נח געציל]

איך בין נאכאלץ נייגעריג צו וויסן וואס די הנהלה קען יא זען און נישט זען. איך האב נישט קיין שום סיבה חושד צו זיין קיינעם פון די הנהלה און איך געטרוי יעדן, אבער די הנהלה באשטייט פון מענטשן, און א מענטש איז נאר א מענטש. וואלט איך געקענט באשטיין צו וויסן, און עס וואלט מיר געמאכט רואיגער ווען איך ווייס, וואספארא אינפארמאציע די מענטשן אין די הנהלה ווייסן איבער א ניק.

בדרך אגב, און אביסל באופן הלצה. איך ליין דא גענוג, און עס פאסט נישט פאר אזא אויפגעקלערטע פלאץ ווי יעדער רב איז נחשד און אלע געמיינדע פירער ווערן באטראכט אלץ קארופטירט, צו זיין אזוי פארגלייבט מיט צוטרוי אין די הנהלה און האבן אזא בלינדע טראסט אין די אינטעליגענץ פון די שרייבער... מענטשן זענען מענטשן, און כבדהו וחשדהו איז אלץ א גוטער מהלך.

[ידען]

נח געציל

ממילא? וואס ווילסטו טוהן? אויפהערן שרייבן? פליז טוה עס נישט. מע דארף דיך נאך האבן.

סע זעהט אויס אז די הנהלה זענען אזעלעכע מענטשן וואס וועלן דיר פראבירען וויי צו טוהן?

[יידל]

נישט ווייל איך ווייס, אבער כ'שטעל זיך פאר אז די הנהלה קען זעהן יעדע פאסט'ס איי פי אדרעסע. לגבי די פעסווארד זאגן זיי אז זיי זעהן עס נישט.

איז מעגליך דורך אן IP אדרעס צו זעהן ווער דער יעניגער איז?

אויב די הנהלה האט טאקע איי-פי אדרעסן קענען זיי זיכער זען פון וועלכע שטאט (אדער לאנד) מ׳שרייבט, אבער איך גלייב נישט אז ס׳איז דא אן אופן אויסצוגעפינען א פונקטליכן אדרעס אדער נאמען.

אופנים זענען מסתמא דא, אבער דאס איז אומלעגאל, און די עף ביי איי פאלגט נאך מענטשן וואס טוען דאס.

[נולד מאוחר]

כ'טריי מיך צי פיקטשערן ווען וועט זיין די צייט אז הערשל ק. זאל דארפן האבן א אנאנמעס ניק צי קענען ליפטערן זיינע געדאנקען.מיט צימערמאן'ס ניק. און מורא האבן אז איינער וועט דערגיין זייער אידענטעטי..

[נח געציל]

נח געציל

ממילא? וואס ווילסטו טוהן? אויפהערן שרייבן? פליז טוה עס נישט. מע דארף דיך נאך האבן.

סע זעהט אויס אז די הנהלה זענען אזעלעכע מענטשן וואס וועלן דיר פראבירען וויי צו טוהן?

ידען,

ווער רעדט פון אויפהערן שרייבן, און איך האב נישט געזאגט אז איך וויל עפעס טון, איך האב אויך מקדים געווען אז איך האב נישט קיין שום סיבה חושד צו זיין די הנהלה, אייגנטליך קוקן זיי אויס זייער ארנטליכע מענטשן. דאס גאנצע וואס איך זאג איז איך וועל שפירן רואיגער ווען איך ווייס פון פאראויס וואספארא אינפארמאציע זיי ווייסן. ס'איז א נארמאלע פראגע און איך זע נישט וואס עס איז דא צו ווערן דעפענסיוו איבער דעם.

[נס קאווע]

קודם דארף מען זיך אליין קענען אין נאכדעם קען מען זיך באהאלטן

[אךשמח]

א לענגערע צייט צוריק האב איך געוואלט דא מגיב זיין אבער זיך נישט גענומען דערצו, אבער יעצט איז מיר אונטערגעקומען צו ליינען די ווערטער פון החכם המופלג שאץ מאץ אין אייוועלט אין אן אשכול מיט טענות אויף קאווע שטיבל אז עס א מקום וואס איז געשטעלט אויף כפירה ומינות, האב איך געקלערט אז איך וועל שרייבן את אשר בלבבי.

אויף די עצם טענה אויף דער מקום וועל איך נישט שרייבן, איינס, ווייל איך ווייס אז די מנהלים נעמען זייער ערנסט סיי וועלכע טענות מען האט, און וועלן נאכגעבן אפילו ווען זיי זעלבסט האלטן אנדערש. דאס האב איך זיך איבערצייגט ווען איך האב אליינס געהאט א דין ודברים מיט א צייט צוריק, בעת איך בין דא געווען מער אקטיוו, און זיי זענען באמת גרייט אויסצוהערן וואס די שרייבער האבן צו זאגן, און צווייטנס, איך בין שוין זייער זייער זעלטן בכלל אין עולם ה'בלאגס וה'פורומים, ממילא קען זיין אז איך בין שוין מער נישט אינפארמירט איבערן געטוישטן מצב.

וואס איך וויל יא שרייבן איז איבער דער נושא פון דעם אשכול, נעמליך, איבער די אנאנימיטעט פון די שרייבער.

א צייט צוריק האב איך באטראכט דעם צעטל וואס דער מוסד וואו איך שיק מיינע קינדער לערנען האט מיר געשיקט, אז איך זאל אונטערשרייבן, און געזען די אפציעס וואס זיי שטעלן מיר אהער, און געטראכט אז א חלק וועט זיך ווארשיינליך אונטערגעבן און טאקע אויף אן אמת אפהאקן קשר מיטן כלי משחית, אבער א גרויסער רוב, ספעציעל די וואס דארפן נישט האבן קיין שייכות מיטן אינטערנעט בכלל צו זייער פרנסה, אדער קענען זיך באגיין אן דעם, וועלן פשוט אונטערשרייבן א שקר אז זיי האבן נישט עקסעס, און מעגליך אז מען וועט זיי אפירהאלטן דערפאר שפעטער, אבער אויך מעגליך אז מען וועט קיינמאל נישט געוואויר ווערן.

און איך האב עס באטראכט פון א שרייבערישן שטאנדפונקט, אז וואס זאל א איד וואס זיין איינציגסטער סיבה פארן זיין אנליין איז, אז ער גלייכט צו שרייבן און זיך לאזן הערן?

ער קען שרייבן אז ער האט א פילטער, אבער אויב דארף ער עס נישט צוליב פרנסה, איז ער דאך עובר יהרג ואל יעבור אויב ער איז אויפן אינטערנעט, דעריבער וועט ער גיכער שרייבן א שקר אז ער האט נישט דערצו קיין שייכות. וואס פאסירט דאן? ער וועט מוזן פארברענען אלע זיינע ניקים, נעמען און קשר וואס קענען ציען די אידענטיטעט בענדלעך צו אים, און וועט שרייבן אונטער א נייעם ניק, און אויב איז ער אויף פעיסבוק חלילה, וועט ער אויך דארט מוזן גיין אין באהעלטעניש לאך, און דאן וועט גארנישט אפהאלטן אים פון שרייבן ככל העולה על רוחו.

(און דאס איז א גאר גרויסער טעות אין מיינע אויגן, בנוגע די אינטערנעט מערכה, ווייל בעסער איז אויב מען שרייבט מיטן וויסן אז מען קען דיר נאכקוקן, ווי איידער שרייבן פארשלייערט אינגאנצן).

און יעצט לאמיר גיין צו די ווערטער פון שאץ מאץ וואס שרייבט, צווישן אנדערע:

ווי געשריבן אין מיין אלטן אשכול, גארנישט בלייבט נישט קיין סוד, די אלע מנהיגים פון די בלאג'ס מיט די שריייבער'ס וועלן אמאל נתגלה ווערן לעיני השמש, און דאן וועלן די בושות זיין גרויס, אויף צוריק איז שוין נישטא קיין וועג, די אלע ניוול מיט לצנות וואס ווערט געשריבן זענען פארצייכנט און דאקאמענטירט לדורות עולם, און אויף אייביג וועט מען קענען אנצייגן זעהסטו אט די מנוולישע תגובה דאס האט יענער און יענער געשריבן..., כאטש היינט איז ער זיך מוחל די עוונות, און שפילט שיינע איד צוליב שידוכים,

וואס הייסט אז גארנישט בלייבט נישט קיין סוד?

אויב מיינסטו אז הקב"ה וועט אים אויפדעקן, דאן ביסטו גערעכט און פארן כל יכול איז גארנישט דא קיין אפהאלט, אבער דער דרך העולם וואס ער האט איינגעפירט איז נישט דא קיין מעגליכקייט געוואויר צו ווערן קיין אידענטיטעט פון קיינעם, אויב יענער האט עס נישט ארויסגעגעבן פאר קיין צווייטן.

נאכדעם וואס מען האט אים אנגעפרעגט אז ער נוצט שטארקע דיבורים וואס האבן נישט קיין האפט, האט ער געשריבן ווייטער:

איך סטראשע????...
מיין פוינט איז אז אין די נישט ווייטע פארגאנגענהייט איז געוועהן געוויסע פורם'ס ווי מ'האט געשריבן דברים שלא כהוגן און ס'איז נתגלה געווארן,
איך מיין פשוט די טובה פון די שרייבער'ס, אין פאקט ווער ס'איז אביסל שארף און וויל באמת וויסן קען דערגיין אין נאו טיים ווער א געוויסע ניק איז, ס'איז בכלל נישט שווער....
סאו, דעריבער זאג איך אז די מנוולישע שרייבער'ס וועלכע וועלן אמאל נתגלה ווערן, זיי וועלן אליין מוזן עסן די קאנסיקווענסן דערפון, איך סטראשע נישט, איך רעד פון פאקטן וועלכע וועט זיך אויסשטעלן נישט לטובתם,

למשל, דער ניק וואקסט אונטער, און זיין זון (א בחור פון 14 יאר) האט אמאל ציטריט צו זיין טאטנס געצייג און זעהט עפעס זיין טאטע רופט זיך א געוויסע ניק, און שפעטער זעהט ער אנדערע תגובות פון דעם זעלבן ניק (וואס איצט ווייסט ער שוין אז דער שרייבער איז זיין טאטע אליין) וואס פארא פנים וועט ער טראגן קעגן זיינע קינדער, לאמיר פרעגן אפן די אלע ניק'ס (יושבי חושך) זענט איר 100 פראצענט באקוועם אז ענקערע קינדער זאלן ליינען אטע דאס וואס איר שרייבט?.....
זייט'ס ריאליסטיש!

אמת, אז אין דער נישט ווייטע פארגאנגענהייט איז נתגלה געווארן די אידענטיטעט פון די מנהלים אדער שרייבער, ווייל, איינס, זיי האבן זיך ארויסגעגעבן ווייל זיי האבן זיך געוואלט אויפטון פאר זייערע חברים, און אויך ווייל מען האט גענוצט אומאיידעלע מיטלען דערצו (ואין כאן מקומו) און אזא איינער וואס האט זיך געלאזט נארן, קען און מעג טאקע אנגערופן ווערן מיטן נאמען וואס דו האסט אים געגעבן דארט.

אבער אויב א מענטש מאכט אפ מיט א שטארקע פעסטקייט, אז יעבור עלי מה, און אויב וויל איך ווייטער קענען שרייבן און ארויסברענגען מיינע מיינונגען לאור עולם, טאר איך נישט ארויסגעבן סיי וועלכע אינפארמאציע פון מיר, און אויך נישט שרייבן קיינע פערזענליכע פרטים אפילו אויב מען זוכט אן עצה צום ביישפיל, דאן זענען די שאנסן מען זאל געוואויר ווערן זיין ריכטיגער נאמען, ממש נול.

נאך א נקודה, דער מענטש וואס וויל באמת האלטן זיין אידענטיטעט בצנעה, דארף אכטונג געבן אז ווען ער פייערט אין שול אויף א געוויסע עוולה, און ער קלערט אז ער דארף עס אויך מפרסם זיין אויפן נעט, זאל גאר שטארק איבערטראכטן אויב עס לוינט, ווייל אין זעלבן שמועס וואס ער האט זיך געקאכט, קען זיין אז זיין גוטער חבר וואס איז דארט מיטגעשטאנען און אפשר מיטגעשטימט מיט דיין מיינונג, איז א ניק בשכינות צו דעם זעלבן נושא וואס דו גייסט שרייבן, און דאן קען ער ציען א מסכנא אז דו ביסט יענער

און איך וועל ענדיגן מיט דעם אז איך פולשטענדיג מסכים מיט דער לעצטער פאראגראף אז א מענטש, א בעל בחירה דארף און מוז טראגן אחריות אויף זיינע מעשים און אויף די ווערטער וואס ער שרייבט סיי ביחיד און אוודאי ברבים.

[berlbalaguleh]

איך האף מען זאל נישט דארפן צוקומען צו דעם, אבער בכל אופן שהוא, אויב מאכט זיך אז איינער ווערט יא באקאנט מיטן צווייטן, ער געפינט אויס די ניק, האף איך אז מען קען האבן בלינדע טראסט אין אונזערע אינטעליגענטע שרייבער און ליינער דא, אז זיי וועלן פארשטיין אלעס צו האלטן פאר דעם גרעסטן סוד אונטער סיי וועלכע אומשטענדן. אפילו מען קומט זיי פרעגן אינפארמאציע פאר א שידוך.

דו ברענגסט אויף א נייע מעגליכקייט וואס וועט זיך אפשר אריינארבעטן און ווערן א טייל פון אונזער טאג טעגליכן לעבן. אז מען זאל שעפן אינפארמאציע וועגן א שידוך וכדו' פון דעם אופן און אינהאלט וואס איינער שרייבט. אבער לפי האמת זעה איך אין די פאר חדשים זינט איך האב אנטדעקט דעם וואונדערליכן סייט אז אלע מעמבערס וואס שרייבן דא זענען ארנטליכע, אינטעליגענטע מענטשן וואס שרייבן זאכליכע ענטפערס אלס א טייל פון א דעבאטע און פארמיידן זיך פון פערזענליכע אטאקעס, וואס ברענגט נאר צער און עגמ"נ. וואס איז ליידער אן ערשיינונג אויף א סאך אנדערע וועבסייטס און בלאגס. א גרויס טייל פון די הצלחה איז צו פארדאנקען די הנהלה וואס שטייט על המשמר אז זאכן זאלן געפיהרט ווערן אויפ'ן ריכטיגן וועג.

[berlbalaguleh]

איך בין נאכאלץ נייגעריג צו וויסן וואס די הנהלה קען יא זען און נישט זען. איך האב נישט קיין שום סיבה חושד צו זיין קיינעם פון די הנהלה און איך געטרוי יעדן, אבער די הנהלה באשטייט פון מענטשן, און א מענטש איז נאר א מענטש. וואלט איך געקענט באשטיין צו וויסן, און עס וואלט מיר געמאכט רואיגער ווען איך ווייס, וואספארא אינפארמאציע די מענטשן אין די הנהלה ווייסן איבער א ניק.

בדרך אגב, און אביסל באופן הלצה. איך ליין דא גענוג, און עס פאסט נישט פאר אזא אויפגעקלערטע פלאץ ווי יעדער רב איז נחשד און אלע געמיינדע פירער ווערן באטראכט אלץ קארופטירט, צו זיין אזוי פארגלייבט מיט צוטרוי אין די הנהלה און האבן אזא בלינדע טראסט אין די אינטעליגענץ פון די שרייבער... מענטשן זענען מענטשן, און כבדהו וחשדהו איז אלץ א גוטער מהלך.

דו ביסט אביסל מגזם ([b] אויף עברית.רח"ל מהאי דעתא. מגזים[/b .דער עולם אויף דעם וועבסייט ווייזט נישט ארויס אומצוטרוי צו אלע רבנים. נאר צו די וואס קומען ארויס מיט נייע איסורים יעדע וואך און מ'קען זיי חושד זיין אין האבן פריוואטע נגיעות אדער זיי אליין פיהרן זיך נישט אזוי.

[boxcover]

נישט ווייל איך ווייס, אבער כ'שטעל זיך פאר אז די הנהלה קען זעהן יעדע פאסט'ס איי פי אדרעסע. לגבי די פעסווארד זאגן זיי אז זיי זעהן עס נישט.

איז מעגליך דורך אן IP אדרעס צו זעהן ווער דער יעניגער איז?

אין אסאך פעלער, ספעציעל מיט א דעדיקעיטעד IP אדדרעס (למשל אין געוויסע ארבייט פלעצער), איז עס גלוי וידוע.

[berlbalaguleh]

דער ענטפער (מיין יעצטיגע תגובה) איז לכאורה מער אן ענטפער צו "שאץ מאץ און "איי-וועלט". דער עולם וואס ליינט און שרייבט אויף קאווע שטיבל איז ב"ה אן ארנטליכער און אינטעליגענטער עולם. אין די אכט חדשים וואס איך געפין זיך אויף קאווע שטיבל האב איך נאכנישט באגעגנט קיין איין שרייבער וואס זאל שרייבן דברי כפירה ומינות אדער "מנוולות" ווי דו רופסט עס אן. אדער שרייבן באליידיגנדע ווערטער אדער סטראשען א צווייטן. דאס אלעס איז אין מערסטנטייל צו פארדאנקען די הנהלה, וואס האט איינגעשטעלט אזא אטמאספער. שלא כדרכם פון אנדערע וועבסייטס וואו מ'באציט זיך מיט שנאה צו איינעם וואס דרוקט אויס א מיינונג וואס איז אנדערש ווי די פארטיי ליניע. אדער געוויסע שרייבער וועלכע האבן פאראורטייל פאר אנדער גרופעס.