מילתא דבדיחותא

[קול גדול]

ס'איז אמאל א רב מיט זיינע תלמידים געגאנגן שפאצירן ביים טייך, און דאן האט דער רב באמערקט ווי נשים וואשן זיך, האט ער זיך אנגערופן פאר זיינע תלמידים געבטס אכטונג נישט צו מסתכל זיין ווייל דער וואס איז מסתכל איז מסכן זיינע אויגן. האט איין תלמיד פארדעקט איין אויג און האט געזאגט: רבי, איין אויג קען איך באשטיין מסכן צו זיין...

[שמואל הלוי]

עמעצער האט געהערט אין בית הכבוד פון א בית המדרש ווי א עלטערער איד זאגט אשר יצר הויך אויפן קול אין די נעקסטע שטיבל נעבן אים...

ארויסקומענדיג, גייט דער איד צו צום אלטן איד: ר' חיים, וואס עפעס זאגט איר די ברכה אשר יצר אינעווייניג אין ביהכ"ס? זאגט דער אלטער: "קוקט אהער, דא אויפן אשר יצר סיין שטייט: "א סגולה צו אריכות ימים צו זאגן די ברכה "אינווייניג"...

[שמואל הלוי]

צוויי אידענעס זענען געקומען צום רב מיט א טענה: זיי ביידע ווילן האבן א געוויסן בחור אלס חתן פאר זייער טאכטער, איינע זאגט אז זי האט איהם ערשט געזעהן, און די צווייטע זאגט פונקט דאס זעלבע.

רופט זיך אן דער רב: "איך ווייס נישט ווער פון אייך איז גערעכט, דערפאר ברענגט א מעסער, און מ'זאל צושניידן דעם חתן אויף צוויי, און יעדערער פון אייך וועט נעמען א טייל".

די ערשטע פרוי זאגט: "ניין רבי! אויב דאס איז פארבינדן מיט שפיכות-דמים, דאן וויל איך דאס נישט האבן, און איך זאג זיך אפ פון דעם גאנצן ענין.

ווידער די צווייטע האט געזאגט: "רבי, אייערע רייד זענען וואונדערבאר און פיל מיט חכמה! שניידט דעם חתן אויף העלפט!

אה! זאגט דער רב, "זי איז די ריכטיגע שוויגער!".

[שמואל הלוי]

א יונגערמאן זייענדיג אין גראסערי האט זיך גענומען נאשן פון די טשאקאלאדן, ווען ער האט באמערקט ווי דער בעל הבית קוקט, זאגט ער: א"ה, וויפיל קאסט א בליטש?"...

זאגט אים דער בעל הבית: "דאס קומענדיגע מאל זאלסטו נאשן פון די בליטש און פרעגן אויף די טשאקאלאד"...

[שמואל הלוי]

ווען מען האט געפרעגט דעם שאפער (SHOFER) פון לעצטן ליובאוויטש'ער רבי'ן וויאזוי ער הייסט, זאגט ער: "שופר של משיח".

[שמואל הלוי]

מ'האט געפינען א ליטווישן יונגערמאן זיך טובל'ען אין די כלים מקוה, אויף די פראגע וואס איז פשט פון זיך טובל'ען אין א כלים מקוה, זאגט דער ליטוואק: "דער ראש ישיבה האט מיר געזאגט אז איך בין א כלי ממש"...

[שמואל הלוי]

א קאצקער חסיד האט זיך איבער געקאצקעט אויף א קאצקע צוקער, און קאצקע רבי האט זיך געקאצקעט פאר געלעכטער...

[שמואל הלוי]

בשם אב"ד יארמע שליט"א: "גייט מיך נישט אן ווי הייס די גיהנם וועט זיין, אבער יומיד זאל נישט זיין"...

[שמואל הלוי]

א צעטל און א ביהמ"ד ליינט זיך וואו פאלגענד:

מודעה ואזהרה:

דאס סעלפאן אין ביהמ"ד ברויך זיין "ידמו כאבן" (silent), אין ערגסטענס פאל "יאחזמו רעד" (vibrate), און אויב וועט זיין "שמעו עמים" דאן אוי וועט זיין א "ירגזון", אזוי הויעך אז "חיל אחז יושבי פלשת", אפילו די פאליש זיצער'ס וועלן כאפן א ציטער!

[שמואל הלוי]

משנכנס אדר מרבין בשמחה - משנכנס ניסן ממעטין בתחנון....

[שמואל הלוי]

איך ווייס נישט פארוואס א W רופט זיך דאבל U, עס איז דאך א דאבל V?

[שמואל הלוי]

מאיר: ווי האלט דיין ווייב ביים פסח מאכן?
ברוך: אה זי האלט שוין לאנג ביי שפוך חמותך!

[שמואל הלוי]

א ארץ ישראל'דיגער איד האט מסביר געווען אז ער איז ממש געצווינגען צו גיין נאך געלט, זאגנדיג: "איך קען דאך נישט חתונה מאכן ווי א שנארער".

[קרעמער1]

פעסטער רבי שרייבט אויף טוויטער: אין די פעסטע מצה בעקערי באקט מען שוין היינט ׳ערב פסח מצות׳ ס׳זאל זיין גענוג פאר יעדן.

[שמואל הלוי]

אויב נאכן קריג וואלטן די זיידעס אנגעקומען קיין פלארידע, וואלטן מיר היינט געהאט ריזיגע קול קורא'ס וואס פארבאטן צו פארן קיין ניו יארק רח"ל...

[שמואל הלוי]

מיין חבר איז משוגע פרום, ער גייט הכנות ממש בעפאר יעדע אשר יצר...

[שמואל הלוי]

וואס איז די חילוק פון א הייסע מקוה און א הייסע טשאלענט?

אין די מקוה קומט קודם די אוטש און נאכדעם די אההה
און ביי טשאלענט איז פארקערט, קודם קומט די אההה און נאכדעם די אוטש...

ענליך צו דעם:
טשולענט איז ווי א קרעדיט קארד, האב הנאה יעצט און באצאהל שפעטער...

[קול גדול]

בשם אב"ד יארמע שליט"א: "גייט מיך נישט אן ווי הייס די גיהנם וועט זיין, אבער יומיד זאל נישט זיין"...

Go to Heaven for the climate, Hell for the company." Mark Twain"

[שמואל הלוי]

א עלטערער בחור האט זיך אפגערעדט: מיין שווער איז אזוי שטארק פאר די תקנות, אז ער וויל אפילו נישט מאכן קיין ווארט!

[שמואל הלוי]

איך האב געקויפט פאר מיין ווייב א סעלפאון, און זינט דאן איז עס אנגעשטעלט אויף ווייב-רעדט...

[שמואל הלוי]

אין א געוויסע ישיבה איז געווען א בחור הנקרא ראלי פאלי, דהיינו ארכו כרחבו, קליין און גראביש, וואס איז אין צוגאב אויך געווען א תם ומתמם עם תמימים, האט זיך אמאל פארגלוסט פאר א בחור צו טרייבן קאטאוועס פון אים, האט ער אים איינגערעדט אז ער קען מאכן מענטשן פאר א "רואה ואינו נראה"... דער תמים האט זיך צוגעכאפט דערצו און ער האט געוואלט ווערן אזא פאציענט, ס'איז דאך א מורא'דיגע מדריגה "רואה ואינו נראה".

דער לץ האט אים געהייסן אראפזעצן אויף א בענקל און ליינען קריאת שמע, און ער האט געזאגט אז ער מוז אויספאלגען אלע זיינע באפעלן און נאר אזוי וועט דאס ארבעטן.

ער האט אים איבערגעדעקט מיט א טלית, און געדרייט צען מאל מיט א טעפל וואסער און שמן זית, און האט געזאגט די פסוק פון הכו בסנוירים און אנא בכוח, ווען ער האט פארענדיגט די פראצעדור האט ער אראפגענומען זיין טלית און ער האט דערקלערט אז קיינער קען אים יעצט נישט זעהן אויף דריי שעה, אבער ער מוז קודם מאכן התפשטות הבגדים, און דאן הערשט קען ער אריינגיין אין בית מדרש.

דער חכם עתיק האט געגלייבט באמונה שלימה, און מקיים געווען דעם ויפשוט און איז אזוי אריין אין בית המדרש...

דער עולם האט זיך געקאטשעט פאר געלעכטער און געוויין אזש מען איז געליגן אויף דער ערד...

דער בחור איז ארויסגעלאפן פון בית מדרש מיט רויטע באקן, און ווי נאר ער טרעפט דעם לץ הייבט ער אן צו מאכן קולות אויף אים אז ער האט אים צו-נער געמאכט בפני קהל ועדה.

האט אים דער לץ געפרעגט: "דו האסט אלעס געטוהן אזוי ווי איך האב דיר געהייסן?".

האט ער געענטפערט: "יא!".

"דו האסט זיך געהעריג אויסגעטוהן?".

האט ער געענטפערט" "יא! אבער פארשטייט זיך די גאטשעס האט איך געלאזט".

האט אים דער לץ גענטפערט: "נו אוודאי האט דער עולם געלאכט, מען האט געזעהן א גאטשע אריינשפאצירן אין בית מדרש אן א מענטש"...

און דער תמים האט זיך בארוהיגט.

[שמואל הלוי]

נאך א מעשה מיט די זעלבע צוויי בחורים, היות דער תמים איז געווען א גראבאטש כנ"ל, האט אים דער לץ אויפגעקלערט אז ער איז שוואנגער און דאס איז די סיבה פון זיין גראבקייט, און ער האט אים נאך צוגעגעבן אז ער איז שוין אין די ניינטע חודש, און ער וועט מוזן אהיים פארן האבן צו האבן דאס קינד.

דער תמים האט זיך דערשראקן, און ער איז אריין צום ראש ישיבה זאגן אז ער מוז אהיים פארן... דער ראש ישיבה פרעגט אים וואס גייט פאר? אבער ער האט נישט געוואלט געהעריג ענטפערן. אבער דער ראש ישיבה האט אים גאר שטארק דערקוטשעט אז ער מוז דערציילן, ביז דער בחור האט זיך צוגעבויגן און געזאגט שטילערהייט אז ער איז אין "לעיבער" און ער גייט יעצט אהיים אריינצופארן אין שפיטאל, און ער האפט צו ברענגען פארן ר"י גוטע נייעס בקרוב.

דער ר"י האט זיך מורא'דיג צובייזערט, און ער האט אים געפרעגט ווער איז דער בחור וואס האט אים דאס איינגערעדט? ער האט אים געזאגט פארשטייט זיך, און דער ר"י איז צוגעגאנגען צום לץ און אראפגעלאזט א קלינגעדיגן פראסק אין פרצוף.

[שמואל הלוי]

א איד האט אמאל געזאגט קדיש אין ביהמ"ד, שרייט איינער אנטשולדיגט! איר האט נאר א האלבן מנין!
זאגט ער ס'איז גארנישט איך זאג נאר "חצי קדיש".