אונטער-א-מינוט חסידות-ווארט

פשוט-קאמפליצירט · מאנטאג מערץ 16, 2015 5:54 pm

https://www.youtube.com/watch?v=fFVhrqxEKa0

מענטשן לערנען די תורה, ספעציפיש וועגן שבת, און וואונדערן זיך פארוואס זענען פאראן אזויפיל איסורים און דקדוקים אין יעדער זאך. פארוואס זאל מען שבת נישט טארן טאן דאס און יענץ? וועמען שטערט עס? פארוואס זאל עס זיין א סתירה מיט דער שבת-רו?

די תורה אליין גיט אבער דעם ענטפער: "וביום השביעי יהי' לכם קודש - שבת שבתון." שבת איז א מקום אין דער פיזישער זמן אין וועלכער די וועלט פונקציאנירט, ווען דער מענטש קען זיך פארקלייבן אין יענעם הייליגן, ריינעם ווינקל, אפגעטיילט פון דעם טומל און הו-הא, און געפינען דעם קשר צו ג-ט און צו זיך אליין.

"כל העושה מלאכה ביום השביעי יומת," טויט ער זיך דעם דאזיגן מקום און זמן בידיים. די תורה קומט נישט סטראשען, נאר ווייזט דעם מענטש וואס צו טאן, וויאזוי צוצוגיין צו דער זאך, כדי צו באקומען די געוואונטשענע תוצאות.

פשוט-קאמפליצירט · מאנטאג מערץ 16, 2015 6:07 pm

https://www.youtube.com/watch?v=hhxztyJkG9c

דערציילן אונז חז"ל אין מסכת מגילה, אז רבה און רבי זירא האבן זיך אוועקגעזעצט פראווען די פורים-סעודה אינאיינעם, און האבן דערביי מקיים געווען די מצוה פון טרינקען ביז'ן עד דלא ידע אריין. דאס האט געפירט דערצו, אז רבה האט געשאכטן רבי זירא'ן.

דאס עניגמאטיש שטיקל גמרא ווערט דורך די מפורשים. דער ליובאוויטשער רבי האט עס אזוי מפרש געווען. פאראן וויין, וואס האט די מעגליכקייט צו פארטשאדן א מענטש דעם קאפ און אים פירן צו באגיין ווילדע און אויסטערלישע מעשים. דאס איז דער וויין וואס פאר'שיכור'ט דעם גוף. דערנאך איז פאראן וויין - פון דער משפחה "יינה של תורה" - וואס פאר'שיכור'ט און נעמט איין דעם מענטש'ס נשמה און באוואוסטזיין, זיין אינטעלעקט און הארץ.

רבה, זאגט דער ליובאוויטשער רבי, האט אזוי פאר'שיכור'ט רבי זירא'ן מיט דעם דאזיגן "וויין", ביז די גאנצע וועלט האט פארלוירן איר משמעות ביי אים אין די אויגן. ס'איז געווען גלייך ווי רבה וואלט אים אפגעשאכטן און אפגעטויט דעם גוף.

פשוט-קאמפליצירט · מאנטאג מערץ 16, 2015 6:11 pm

https://www.youtube.com/watch?v=a6PSGP9kZhM

זרש קומט אונז לערנען א געוואלדיגע לעקציע אין לעבן. המן קערט זיך אום אהיים נאך א שרעקליכן טאג, מלא דורכפאלן און בושות. ער דערציילט וועגן אלעם צו די אנוועזנדע, און דאס ווייב זיינס רעאגירט נישט נאר מיט גיסן זאלץ אויף די וואונדן, נאר מיט'ן פרישע שווארצע נביאות: אם מזרע יהודים מרדכי וועסטו נאך ווייטער פארזעצן צו פאלן נאך טיפער אין דער ערד.

זרש'ס מהלך מאכט דעם מענטש זיין זיכער אז בעסער וועט שוין נישט ווערן, און ער ווערט אינגאנצן מיואש און גיט אלעס אויף. אין אזא מצב, קענען זאכן טאקע נישט בעסער ווערן.

אבער מיר דארפן געדענקען דעם פורימדיגן ונהפוך הוא. ווען עמיצער קומט זיך אויסרעדן און אויסוויינען, זיי אים מחזק, שטארק אים, ווייז אים וואו ס'איז נאך יא ליכטיג, וויאזוי עס וועט נאך ווערן בעסער.

פשוט-קאמפליצירט · דאנערשטאג מערץ 19, 2015 6:30 pm

https://www.youtube.com/watch?v=rbn9jguyRoI

משה רבינו איז פריער געווען אויפ'ן בארג און דערנאך אין הימל, וואו ער האט געלערנט פונעם אויבערשטן נישט נאר די גאנצע תורה, נאר אלע פירושים וואס אלע מפורשים און אלע דורות וועלן אין דער תורה אריינלערנען.

אידן האבן אבער געזאגט צו משה'ן: דאס איז צו גרויס און ארומנעמיג פאר אונז. מיר געפינען זיך דא, אויף דער קליינער, באגרעניצטער וועלט, מיט אירע קליינע, באגרעניצטע השגות. רעדזשע, משה אונזער רבי, צו אונז דא.

משה האט זיך טאקע אריינגעקוועטשט אין אן "אלף זעירא" און זיך אוועקגעשטעלט ביי דער טיר פון א קליינעם צימער, אן אוהל מועד, און באקומען פון ג-ט א מעסעדזש וועגן אים דינען אויף דער וועלט, מיט די וועלטישע השגות פון וואס אידן האבן דעמאלט פארמאגט: שעפעלעך און לעמעלעך, קי און אקסן.

געוואלדיג · דאנערשטאג מערץ 26, 2015 12:59 am

חייב אדם לראות את עצמו כאילו הוא יצא ממצרים.

את עצמו איז דאך איבריג, האב איך געהערט א טייער ווארט, ווען א מענטש האט א מעשה צו פארציילן וואס די גאנצע שטאט האט מיט געהאלטן וועט ער דאס דאך נישט פארציילן, ער האט נישט פאר וועם, אבער אויב האט ער צו פארציילן אז ער איז געווען אויף די לבנה, אה דעמאלטס וועלן שטיין ביי איהם קעפ אויף קעפ, ווער וויל נישט הערן אזא מעשה און ער וועט טאקע פארציילן מיט זאפט אז עס וועט רינען, וועט א מענטש טראכטן וואס האב איך פון פארציילן פאר מיינע קינדערלעך די מעשה פון יציאת מצרים ער האט דאס דאך שוין געהערט פון די טעיפ און פון זיין רבי, וואס קין איך שוין צולייגן, זאגט אונז דער בעל ההגדה ניין את עצמו כאילו הוא יצא מצרים כאילו עס איז נישטא קיינעם און נאר הוא עצמו ער אליין איז ארויס און געזעהן די זרוע הנטויה און אזוי וועט ער פארציילן ווי עס דארף צו זיין.

פשוט-קאמפליצירט · מאנטאג אפריל 20, 2015 2:41 pm

https://youtu.be/0BLgmHu0Zj0

מאכט זיך ביי יעדן אמאל א מצב, ווען מ'פילט זיך נידעריג און אינגאנצן אפגעהאקט פונעם מקור. אזא פוסטקייט איז א באדן רייף פאר מרירות און זעלבס-שולד - צוויי פסול'ע מצבי רוח, וואס באלאנגען נישט ביי קיינעם אין הארץ.
דער אמת איז אבער, אז דעמאלט, אין אזא מצב, איז דער מענטש דווקא געאייגנט אויפצונעמען די שפע און זיך דערלאנגען צו פרישע הויכן.

"למה אתה בוש?" האט משה רבינו געפרעגן אהרנ'ען. וואס איז: דו פילסט אז דו האסט פארלוירן דעם קשר און ביזט נישט גרייט אויף די מדריגות וואס די עבודה אין משכן שטעלן פאר? "לכך נבחרת": טאקע דערפאר ביזטו ראוי און גרייט דערצו!

פשוט-קאמפליצירט · מאנטאג אפריל 20, 2015 2:53 pm

https://youtu.be/i6tn1KJfCfY

וואס איז די עצה פאר עמיצן וואס קוקט אויף אלעם און אלעמען דורך שווארצע ברילן? ארויסגיין אביסל אליין אין וואלד; פילן די אליינקייט, די הילפסלאזיגקייט, שפירן וואס דאס מיינט נישט זיך קענען אן עצה געבן אליין אין לעבן. דעמאלט כאפט מען זיך אז די וועלט און אירע איינוואוינער זענען גוט און פיין, און דאס לעבן איז א ברכה.
"כל ימי אשר הנגע," אזוי לאנג ווי ער האט די אייגנשאפט אין זיך פון "בו יטמא," אז זאכן זענען נישט קלאר און גוט, "טמא הוא," איז פשט אז ער געפינט זיך אין אן אומריינעם, נישט גוטן מצב. נו, וואס איז די עצה? "בדד ישב," גיי ארויס פון דער געזעלשאפט און אוועק פון מענטשן. דארט און אזוי וועט ער באקומען אן אנדערן פערספעקטיוו און דערנאך קען ער צוריקקומען צו דער מענטשהייט און אלעס אנקוקן מיט א פאזיטיוון בליק.

פשוט-קאמפליצירט · דינסטאג מאי 05, 2015 6:37 pm

https://youtu.be/IrUjbW7w5NM

ס'מאכט זיך א מענטש וויל זיך פארבעסערן אבער ווערט פרוסטרירט ביים כאפן אז וויפיל ער פרובירט רירט ער זיך כמעט נישט פאראויס.
איז, הערט, טייערע אידן, וואס די חסידישע גדולים האבן געטייטשט. "קדושים תהי'," הייליג זאלט איר זיין. זאגן דערויף חז"ל, "יכול כמוני": איר קענט זיין ווי איך! וויאזוי? "תלמוד לומר," לערנט זיך זאגן, פאר זיך אליין, אינעם אייגענעם קאפ: "כי קדוש אני."
א מענטש זאל טראכטן און זיך פארשטעלן ווי ער איז דארט וואו ער וויל זיין, און ער וועט צום סוף אנקומען אהין.

פשוט-קאמפליצירט · מיטוואך מאי 06, 2015 5:25 pm

https://youtu.be/XhQEgi3l-Ns

יעדער רעדט פון אחדות צווישן אלע אידן. ס'איז אבער פאראן איין טאג אינעם יאר, ווען אזא דורכאויסיגער אחדות מאניפעסטירט זיך. ל"ג בעומר אין מירון טאנצן אינאיינעם אלע סארטן אידן, און יעדער פילט זיך היימיש און גלייך.
דאס איז דער כוח וואס אידישער מיסטיציזם, קבלה און חסידות, האבן אראפגעברענגט אויף דער וועלט. ל"ג בעומר איז די צייט צו פראקטיצירן דעם אחדות צווישן אלע אידן.

פשוט-קאמפליצירט · מיטוואך מאי 13, 2015 6:22 pm

https://www.youtube.com/watch?v=HckTwmcC-Cc

עס מאכט זיך א מענטש קומט אן צו אזא שטאפל, אז ער מוז זיך פארקויפן. דאס איז נישט קיין גוטער מצב, אבער די תורה זאגט אז פארט, "אחר נמכר," אפילו א מענטש איז דערגאנגען צו א מצב אז ער האט זיך געמוזט פארקויפן, "גאולה תהיה לו," ווייל "אחד מאחיו יגאלנו," א ברודער וואס פארמאגט אין זיך א קערנדל איינציגקייט - וואס פירט צו אינערליכער שלווה - וועט אין דעם פארקויפטן אויפפלאמען דעם אייגענעם "איך".

פשוט-קאמפליצירט · מיטוואך מאי 13, 2015 6:25 pm

https://youtu.be/SkYoPp_RRM8

מיר ארבעטן און ארבעטן, לויפן נאך דעם דאלאר ווייל עס דאכט זיך אונז אז וואס מער מאטעריאליסטישע דערגרייכונגען, אלץ מער סיפוק און צופרידנהייט וועלן מיר האבן.
זאגט דער איזשביצער: "והיתה הארץ שבת לה'," אויב דו וועסט לאזן דיין ארציות, דיין מאטעריאליזם במנוחה, "לכם לאכלה," וועסטו אנשטאט ארייננעמען אין זיך דעם אייגענעם איך; וועסט טרעפן זיך אליין.

פשוט-קאמפליצירט · פרייטאג מאי 22, 2015 4:03 pm

https://youtu.be/2tLwby84zRI

כפה עליהם הר כגיגית. וואס איז געווען דער חשבון: ווער וויל א תורה וואס ווערט געגעבן אונטער צוואנג?
מען דארף אבער געדענקען אז שוועריגקייטן און קאמפליקאציעס מאכן זיך ביי יעדן. מיר פרובירן געווענליך "ארויסצוקריכן" פון א שווערן מצב דורך גיין דא און זיך ווענדן דארט.
דער וועג איז ארומצונעמען דאס געראנגל און נישט אנטלויפן דערפון. די שוועריגקייטן פירן סוף כל סוף צו א קלארקייט אריין אין זיך אליין. ווען מען קומט אן צו דעם פונקט, ארבעט די תורה צו פירן דעם מענטש צו א גוט פלאץ.

פשוט-קאמפליצירט · פרייטאג מאי 22, 2015 4:08 pm

https://youtu.be/lVXoZhFXIqI

די אידן אינעם מדבר נאך קבלת התורה האבן זיך געפונען אויף א געוואלדיגן פלאץ, וואו דאס רוחניות איז געווען געדעכטער ווי די לופט. אט קומט ג-ט צוגיין און זאגט: "איך וויל לוי'ן, דעם שבט, צו טאן די עבודה." אידן האבן עס אנגענומען און זיך צוגעשטעלט.
פארוואס האט דער אויבערשטער אויסגעוועלט שבט לוי? זאגט דער שפת אמת: סתם. ווייל אזוי האט ער געוואלט. מיר האבן זיך אונטערגעווארפן דעם רצון פונעם אויבערשטן, ווייל דאס איז וואס מיר דארפן טאן - סתם אזוי, אן קיין סיבה.
ווען א מענטש איז צעקלאפט און עס גייט נישט וויאזוי ער וויל. ער וויל זיין גוט, אבער יעדער ריר קומט אן מיט געבראטענע צרות. אנשטאט זיך ווענדן צום אויבערשטן מיט א טענה: איך וויל דיך דינען, ביטע העלף מיר - בייגט מען דעם קאפ און מען טוט וואס מ'קען יא אונטער יענע אומשטענדן. פארוואס? ווייל דאס ווייל יעצט דער באשעפער פון אים. סתם אזוי. אן קיין טעם.