צו וואס טויג אונז די מדינה?

[שפילער]

וויזוי האבן זיי אנגערייצט די ציונים זיך צו רייצן מיט דער אראבער?

[nothing]

סארי הערצל, האסט מיאוס אנגעזעצט. ווי האט נאר יענער געזאגט? "א פארכאכטע מדינה"! (מיט א ק)

מען שטייט שוין א חודש נאך די שוידערליכע אקטאבער דעם זיבעטן טעראר אטאקע, און קיין גרויסע ישועה זעט זיך נישט אן אויפן האריזאנט. יא, די מדינה האקט שטיקער, עזה איז פלאך, מען נעמט איין שפיטעלער און חאמאס באזעס... און? וואו אהין צילסטו פינקטליך?

אהה! מען גייט אויסמעקן חאמאס! יא יא, הצלחה רבה. לאמיר זיך נישט נאר'ן, אפילו לי יצויר אז חאמאס ווערט אפגעמעקט, ווערן יעצט איינגעזייט די קערנדלעך פארן נעקסטן ערגערן טעראר גרופע.

אז די קענסט אריינגיין קיין עזה און מקיים זיין דעם לא תחיה כל נשמה, איז איין זאך, אבער דאס גייט ממילא נישט געשען. נישט ישראל האט די מעגליכקייט דאס צו טון, נישט די וועלט וועט עס צולאזן, און נישט אז ס'איז גערעכט צו טון.

וואס וועט ווערן פון דעם יונגעלע וואס זיין טאטע מאמע און אפאר געשוויסטער זענען אפגעווישט געווארן אין אן איזרעילי מיסל אטאקע? ער וועט ווערן א פרידן שטיצער? גיי דריי אים א קאפ אז זיין משפחה איז נאר געווארן געכאפט אין קראוספייער בשעת'ן צילן חאמאס, יע יע, א גרויסע טעראריסט וועט ער אויסוואקסן.

וועלט פארזארגער הערן נישט אויף זיך צו מוטשענען מיט די מאראלישע קשיא איבער וואס עס איז די פערפארציאנאלער רעספאנס פאר די שמחת תורה אטאקע, און וויפיל פאלעסטינע קינדער עס דארפן גע'הרג'עט צו ווערן איידער מען האלט שוין ביים ריכטיגן שטאפל פון נקמה.

מד"י ווארטזאגער פון זייער זייט ענטפערן אז מען האט נישט קיין ברירה, מען מוז פטור ווערן פון חאמאס, נישט קיין חילוק וויפיל צווילע עס וועט קאסטן, און גערעכט זענען זיי, אזא אטאקע מוז מען אפענטפערן. אבער רבוש"ע, פאר יעדע חאמאס טעראריסט וואס מען עלימענירט, ווערט באשאפן פרישע 5 טעראריסטן! וואס איז די ענד געים דא?

אה, זאלן זיי גארנישט טון און בלויז אינוועסטירן אין שיץ? בויען הויעכע ווענט און שטעך דראטן? האבן מיר דאך שוין געזען וויאזוי דאס האט זיך אויסגעארבעט.

איז וואס יא?! גארנישט! ס'איז א פארק... מדינה! נישטא קיין געהעריגע עתיד!

די אלע וואס האקן א קאפ וועגן א 2 סטעיט סעלושן פארטאכלעווען אויך סתם די צייט. מען האלט יעצט די ווייטסטע ווי סיי ווען אין די געשיכטע אז דאס זאל פאסירן. די לינקע ישראלים זענען שוין אויך דערקעגן, און נאכן פלאך מאכן גאנץ עזה וועלן די פאר שלום ליבהאבער אין עזה זיך אויך שנעל טוישן די מיינונג. ס'איז גוט פאר געביגלטע סוטס דאס צו פאנטעזירן אויף טיווי נאכן זיך אנקוקן מיט פלאכע שטעט, און עס גליסט זיך צו ענדיגן מיט א געמאכטע האפענונג פון א הארמאנישער שלום וועלט, אבער פון ריאליטעט איז דאס גאר ווייט.

אלזא וואס יא? גארנישט! יעצט קען מען שוין גארנישט טון. פארמאכן די מדינה קען מען שוין אויך נישט, וואו גייען יעצט מיליאנען אידן גיין?

אבער דו הערצל, דו בן גריון, צו וואס האט דאס אויסגעפעלט? האסט טאקע געמיינט אז מיט דיין מדינה'לע וועט זיך אנטיסעמעטיזם אויפהערן?

איך לעב מיך אסאך רואיגער אין אמעריקע ווי מיינע ברידער אין ארץ הקודש. די שאנסן אז עפעס שלעכט זאל פאסירן צו מיינע קרובים אין ארץ ישראל איז פילפאכיג מער ווי פאר די אידן אין ניו יארק. די שאנסן אז א מיסל זאל פאלן אויף מיין הויז אדער אז איך זאל קומען אינטער נוקלעארע אטאקע איז כמעט נול, ווידערום מיינע ברידער אין די מדינה קענען דאס נישט זאגן.

די מדינה איז ארומגענומען מיט שונאים וואס ווילן איר פארטיליגן. איראן מיט אנדערע שונאים יאגן נאך דעם אטאם, און פלאנירן אויפן ערגסטן. צו וואס טויג די גאנצע זאך? איז נישט די פלאן פון נעמען א שטיק אומבאוואוינטע לאנד אין אגאנדע פאר א מדינה געווען פילפאכיג בעסער? נישט אז דאס וואלט יא אויסגעמעקט אנטיסעמעטיזם, אבער קיין מיליאנע אראבער וואס ברויזן נאך עד היום אויפן נאקבא וואלט דאס זיכער פארמיטן.

אנשטאט שיקן אייערע קינדער צום מיליטער ריזיקירנדיג זייער לעבן פארן מוטערלאנד, וואלט איר געקענט שיקן ענקערע קינדער שטודירן אין איניווערזיטעטן מיט א זיכערן געמיט. אפשר קען מען נאכאלטס אויפגעבן ישראל, און עס אויפטוישן מיט עפעס מער א שטילע ווינקעלע ערגעץ וואו אויפן כדור הארץ? אפשר קענען אונז אידן איינמאל פאר אלעמאל לעבן שטיל און מיט פרידן ווייט פארהוילן פון די רוישיגע וועלט?

אפשר אזוי וועלן מיר אויסלענדישע אידן אויך קענען לעבן מיט א רואיגקייט און נישט ווערן אפעקטירט פון די געפערליכע אויפשטייג אין אנטיסעמעטיזם וואס קומט פאר יעדעס מאל וואס די ענדלאזע קריג פלאקערט ווידער אויף.

די האסט אמאל געליינט וויפיל הרוגים אין פאגראמען סאיז געווען אין אייראפע אויף אידן און די הונדערט יאר פאר שש2 ?? איר קענט א״ב פון היסטאריע? די תירוץ איז לכאו קרוב צו 7 דיגיטס און דאס איז אלעס פאר שש3
בנוגע דייו טענה אז "איך לעב מיך אסאך רואיגער אין אמעריקע ווי מיינע ברידער אין ארץ הקודש"....
רבי איד ווייסט ווי שווער סאיז געווען אריינצוקומען אין אמעריקע דאנק גאט אז דיין זיידע האט באוויזן. וליתר שאת ווען נישט וואס אמעריקע זאל זעהן די באלק פליטים זיך ארינטירן און א״י בטח זיי וואלטן גארנישט אזוי גרינג אויפגענומען די אידן
מאך א משהו ריסערטש

[berlbalaguleh]

ס'איז אומזינסט זיך צו טענה'ן מיט דעם פותח האשכול. ער און אנדערע מענטשן פון זיין שניט זענען בלינד צום עבר און צום הווה און צום עתיד פון דעם אידישן פאלק.

איינס פון די טעותים (במזיד) וואס זיי מאכן איז, אז ווען נישט "די מדינה" וואלט נישט געווען קיין אנטיסעמיטיזם איבער די (גוי'אישע) וועלט.

די צווייטע (גרויסע) טעות וואס זיי מאכן איז אז ווען זיי האקן (אויף די ציונים און אויף די מדינה) זענען זיי מקיים די שיטה (הקדושה) פון זייער רעבי'ן זצוק"ל.

די דריטע (יסודות'דיגע) טעות וואס זיי מאכן איז אז די אלע אמעריקאנער גויים, און די גויים פון די גאנצע וועלט מיינען נישט זיי. (עיין בדבריו הקדושים פון דעם פותח האשכול). אויף א יעדע זאך האבן זיי א תירוץ. די רייאט אין קראון הייטס דורך די אומה שפילה די ניגגערס אין יארע 1991 למס' אקעגן ליובאוויטש איז ווייל די ליובאוויטשער זענען ציונים. איי פרעגט מען א קשיא. די אידן וועלכע זענן געהרג'עט געווארן דורך די ניגערישע באנדיטן און רוצחים אין דזשערזי סיטי זענען אויך געווען ציונים?! אמער דו און דיינע קאלעגעס זאגטץ דאך אז אלע צרות קומען פון די ציונים. און אין אמעריקע זענען די אידן שאנן ובטח. און ווען נישט די מדינה און די ציונים וואלט שוין געווען דער תיקון השלם. און אלע גויים וואלטן זיך געקומען בוקן פאר די אידן.

[סקעפטיקער]

ס'איז אומזינסט זיך צו טענה'ן מיט דעם פותח האשכול. ער און אנדערע מענטשן פון זיין שניט זענען בלינד צום עבר און צום הווה און צום עתיד פון דעם אידישן פאלק.

ווען דו וואלסט דיך גענומען די מיה צו קוקן ווער דער פותח האשכול איז, וואלסטו אליינס געלאכט פון דיין תגובה

[פונדאַמענטאַל]

אבער דו הערצל, דו בן גריון, צו וואס האט דאס אויסגעפעלט? האסט טאקע געמיינט אז מיט דיין מדינה'לע וועט זיך אנטיסעמעטיזם אויפהערן?

דא ליגט דיין טעות. דו מיינסט טאקע אז אהן די מדינה'לע וואלט זיך אנטיסעמיטיזם אויפגעהערט?
פונקט פארקערט! זיי, אנערקענענדיג אז אנטיסעמיטיזם האט נישט קיין הייל מיטל, און אז עס וועט זיך קיינמאל נישט אויפהערן, האבן מחליט געווען צו ענדערש בויען אן אייגן לאנד ווי איידער צו זיין אנגעוואנדן אין די גוטהארציגקייט פון די פעלקער.

עוד אוסיף:
ע"ד משל צו אן אדם גדול וועלכער האט זיך געוואנדען צום שניידער כדי צו פארברייטערן זיין רעקל, זינט עס איז אים שוין געווארן ענג דערין. אבער אין די צייט אפשניט וואס דער שניידער האט געארבעט דערויף, האט ער באוויזן צו מרחיב זיין די גבולים אויף אזא פארנעם אז ער האט פארשטאנען אז ער וועט ממילא דארפן א נייע... וכן עשה, ער האט זיך איינגעהאנדעלט אויך א נייע. למעשה האט ער געטראפן נוצן אין ביידע... שפאצירענדיג איין טאג מיטן פארראכטענעם רעקל באגעגנט ער א חבר, א קליגער - איינער וואס ערלויבט זיך צו גיין קעגן די נאראטיוו... וואס האט דיר אויסגעפעלט פאררעכטן די רעקל? האלט ער אים פאר, סתם איבריג געלט... איך האב דיר דאך נעכטן געזען ביי א שמחה מיט א שיינע נייע רעקל, עס פאסט דיר אפילו פיל בעסער... איך האב אלס געזאגט אז מען שפענדעט סתם איבעריג געלט אין אונזער סאסייעטי...

מעגליך אז די צושטאנד האט זיך געטוישט נאך אזא גרויסע געשעעניש ווי די האלאקאוסט, און עס האט באוויזן צו באשאפן נייע מולטי קולוטוראלע געזעלשאפטן וועלכע זענען סענסיטיוו צו אנטיסעמיטיזם און צו מלחמה בכלל. אבער די חלום פון בנימין זאב הרצל אויף מדינת היהודים איז געווען אין אינגאנצען אן אנדערע תקופה, און אונטערן אנדערע אומשטענדן. עס איז נעריש צו טענה'ן אז זיין עצה איז נישט ווערט וויבאלט די מצב האט זיך פארבעסערט מיט די יארן, אדער וויבאלט עס איז אונטערגעקומען נאך אן עצה.


בנוסף צו דעם (ואולי זו העיקר). די מעלה פון יישוב ארץ ישראל איז נישט בלויז געוואנדען אין די עניין פון פיזישע פארזיכערטקייט, די תשוקה וואס אידן האבן געהאט צוריק צו גיין צו אונזער לאנד איז פיל גרעסער און טיפער ווי דעם. דאס איז געווען אונזער חלום פאר טויזענטער יארן, און דאס איז פון די וויכטיגסטע חלקים פון אידישען פאלק (וואס דער וואס האט אמאל געעפנט א חומש וועט וויסן). און אויך פראקטיש איז דאס די איינציגע אופן ווי די אידישע פאלק האט א קיום און א עתיד (אינדרויסן פון ארטאדאקסיע), די אונטערשייד פון אחינו בגולה און אחינו בארץ איז קלאר. ממילא סיי אויב די ספעציפישע ציל איז עררייכט געווארען, סיי אויב עס איז געווען א דורכפאל פון די פערספעקטיוו, דארף מען פארשטיין אז דאס איז נישט געווען די איינציגע ציל מיטן מדינה.

[berlbalaguleh]

ווען דו וואלסט דיך גענומען די מיה צו קוקן ווער דער פותח האשכול איז, וואלסטו אליינס געלאכט פון דיין תגובה

סקעפקטיקער: ייש"כ. איך בין פארקערט פון דיר. איך בין נישט קיין סקעפטיקער. איך בין א תמימות'דיגער, א פלאטשיגער אן אונגערישער (א פאפא'נער). איך גלייב פאר א יעדן.

אדרבה, זאג מיר ווער דער בעל פותח האשכול איז, דאס וועט מיר פארענטפערן א סאך תמיהות'דיגע פלא'ס און קשיות.

דו קענסט מיר שרייבן אין אישי. איך וועל דיר שטארק דאנקבאר זיין.

[שמן למאור]

בקיצור, ס'איז גרויסע צרות...

[גראמאטישער]

אלס סאטמארער וועל איך צולייגן מיינע צוויי גרייצער.

וויאזוי, פארוואס און ווער עס האט געגרינדעט די מדינה איז נישט רעלעוואנט, הערצל איז געווען א געריבענע סעלף העיטינג איד וואס האט געגליכן די קריסטן מער ווי אידן אבער דאס מאכט נישט קיין חילוק אויפן אידעאל וואס ער'ט ארויפגעברענגט וואס איז אין פראקטיק גאר גוט.

די עיקר סיבה און ציהל פון די מדינה איז נאציאנאליזם און דאס געפיל אז מען דארף מיך דארט.

ווען א איד אימיגרירט קיין ישראל שפירט ער וועלקאם דארט און אז מען ברויך אים, פאר די געפיל וועלן מענטשן אויפגעבן דאס זיכערהייט און וועלן קעמפן דערפאר ביזן טויט, דאס איז די תאווה פון נאציאנאליזם און דערפאר איז רוב פון די חרדישע באפעלקערונג געפאלן דערפאר על אף וואס סאטמאר רב האט קלאר מברר געווען אז עס איז אסור און קיין גדול האט אים אפגעפרעגט פון הלכה שטאנדפונקט.

אוודאי מיט א מדינה קומט די פאקט אז מען וועט זיך קענען אליין באשיצן און פארטיידיגן.

צום טענה אז מיט די מדינה אויפן ארענע קען קיין האלאקאסט נישט פאסירן איז דאמירן בעלמא. וואס יא, אידן וועלן האבן וואו צו אנטלויפן, היטלער האט פון אנהויב אויך נישט געוואלט אויס'הרג'נען אלע אידן ווי באקאנט פון די מאדאגאסקאר פלאן, און עס לאזט זיך דמיונ'ען אז ווען די מדינה שטייט ווען וואלט היטלער דעפארטירט אלע אידן קיין ישראל ווי איידער אויס'שחט'ן.

מאנכע שפעקולירן און גלייבן באמת אז א האלאקאסט קען נישט פאסירן און די גאנצע שולד פון אנטיסעמיטיזם גייט אויף די מדינה, מען ברויך זיי דערמאנען אז די דייטשע אידן זענען געווען די גרעסטע פאטריאטן פאר זייער לאנד זיי האבן זיך באשיינפערליך געלאזט הרג'נען ביים ערשטן וועלט קריג און זענען געווען די בעסטע קעמפער, דייטשלאנד איז געווען פון די מאדערנסטע און מערסט-אויפגעקלערטסטע לענדער אין אייראפע אבער דייקא פון דארט איז די האלאקאסט געקומען און נישט פון רוסלאנד/אוקריינע וואו אידן האבן אלע יארן געליטן.

קיינער קען נישט זאגן מיט א זיכערהייט וואס עס וועט זיין אין אמעריקע מיט צוואנציג יאר ארום, פונקט ווי די דייטשע אידן האבן נישט גע'חלום'ט אז היטלער וועט באהערשן די מאכט און אויס'הרג'נען דייקא זיי די גרעסטע פאטריאטן.

צוריק צום אנהויב, צו זאגן אז די מדינה איז א דורכפאל איז טיפשות, די איינוואוינער ווילן דאס אפילו מיטן קאסט פון שונאים ביי אלע גרעניצן און די פחד פון טעראריסטן יעדע ליאדע מינוט, די מדינה איז א גרויסע דורכברוך פאר אידן אלגעמיין, כ'וועל אבער נישט זאגן אז זי האט צופיל געהאלפן פאר חרדים אין ישראל און אלטרא-ארטאדאקסן אין חוץ לארץ.

דא קומט די גרויסע "אבער".

דער באשעפער האט אונז באשוואוירן צו בלייבן אין גלות און "בלויז" ער וועט אונז אויסלייזן און צוריקברענגען אונזער נאציאנאלע שטאלץ, בעפאר ער לייזט אונז אויס טאר דאס נישט פאסירן. פינטל.

איך בין א איד און א סאטמארע חסיד וואס האט דורכגעלערנט דעם ביאור ויואל משה און מיין ערשטע געטריישאפט איז צום תורה הקדושה.

[אלפא]

אלס סאטמארער וועל איך צולייגן מיינע צוויי גרייצער.

איך בין א איד און א סאטמארע חסיד וואס האט דורכגעלערנט דעם ביאור ויואל משה און מיין ערשטע געטריישאפט איז צום תורה הקדושה.

זייער גוט געשריבן!

נאר אזויווי איך האב שוין דא ארויסגעברענגט איז נישט דא אין סאטמאר קיין געהעריגע סעפערעישאן צווישן די תורה און פאליטיק (church & state), שיין פון דיר אז דו טיילסט עס יא אפ.

לגבי די וואלידיטי פון ויואל משה פון אן הלכה שטאנדפונקט, קודם איז נישט אמת אז קיינער איז נישט ארויסגעקומען מיט קיין ביאור דערקעגן, דא איז שוין דא א גאנצע אשכול איבער דעם. אבער בכלל, מעשה רב פון די אלע גדולים וועלכע האבן עס איגנארירט מיט א גלאטן פנים זאגט שוין איינמאל עפעס, בפשטות האבן זיי עס ניטאמאל אנגעקוקט ווי אן הלכה נושא ענדערש אלס השקפה, און די ראיות אויף וואס די רבי בויט זיך איז אויך נישט אינגאנצן גלאט הלכה...

[גראמאטישער]

אלע רבנים האבן רעספעקטירט דעם סאטמאר רב, זיי וואלטן אים געמעגט צוליב טאן און עס צום ווייניגסטענס דורכשמועסן מיט אים אבער דאס האט נישט פאסירט עס איז נישט באוואוסט א פאל וואס איינע פון די גדולי חסידים/ליטאים האבן דאס בכלל דיסקוטירט מיט סאטמאר רב אחוץ מער ווי אויסטוישן צוויי ווערטער איבער די נושא.

כ'בין באקאנט מיט יענעם אשכול אבער איך זיך פאר א ספר פון עמיצער די שטאפל פון סאטמאר רב צו אפפרעגן זיינע טענות.

לאמער נישט פארדרייען דעם אשכול.

[אלפא]

צו די טענות דערקעגן קומען 'פון די זעלבע שטאפל' אדער נישט לאמיר לייגן אין א זייט, סיי ווייל א טענה איז א טענה אפגעזען די טוען, און סיי ווייל כמדומני איז יא דא פראמינענטע טענות פונעם סטייפלער וכדו'.

דאס אז קיינער האט זיך נישט אויסגע'טענה'ט מיטן רבי'ן איז אויב עפעס א קשיא אויפן רבי'ן נישט אויף זיי, עס ווייזט ענדערש אז זיי האבן ניטאמאל געפילט פאר וויכטיג דאס אפצושלאגן. פארשטייט זיך דאס איז נאר רעלעוואנט אויב דו ביזט אויף איין בלאט לגבי זייער גדלות.

עס איז ידוע אז דער רבי איז אריין צום בעלזא רב (צוויי מאל דאכט זיך) און ער האט אראפגעלייגט די קאפ אינמיטן. דער רבי פלעגט ווערן היבש צוהיצט איבער די נושאים און עס איז יתכן קיינער האט זיך נישט געזוכט קיין איבעריגע קאנפראנטאציעס.

[גראמאטישער]

אזוי צי אזוי, גלייב איך נישט אז איינע פון די פראמינענטע גדולים וואלטן לעגיטימיזירט דאס נאציאנאליזם און בלינדע געטריישאפט, זיי זענען בעיקר געווען מחולק אויף די טעקניקלס, לדוגמא בחירות נעמען געלט ועוד. דאס הייסט, וויאזוי מען לעבט מיט די רעגירונג נאך וואס די שאדן איז שוין געטאן געווארן.

דאס נאציאנאליזם וואס מען שמעקט אינעם חרדישע לאגער האט דאכט זיך קיינער מתיר געווען.

[berlbalaguleh]

גראמאטישער: איך בין אויך א סאטמער'ער חסיד, אין עפעס א פארם. איך האב אויך אדורכגעלערנט דעם ויואל משה.

איך וויל נאר אנווייזן עטליכע נקודות וואס איז כדאי צו באמערקן... דער סאטמער'ער רב זצ"ל אליין שרייבט אין די הקדמה פון ויואל משה אז... היינט וויבאלד ס'עקזיסטירט שוין א מדינה אין ארץ ישראל דארף מען מתפלל זיין אז ס'זאל נישט (ח"ו, כלשונו) בטל ווערן דורך די גויים. ווייל אויב יא, וועט ח"ו (כלשונו) נישט זיין גוט פאר אידן. באמערק, ער שרייבט נישט "ציונים", ער שרייבט "אידן".

ועוד: וואס טוט מען מיט דעם מאמר חז"ל ...אין ארץ ישראל נקנית אלא ביסורין...! דאס איז אקעגן די מענטשן וועלכע ווילן אויפווייזן אז ס'האט זיך נישט געלוינט צו האבן אן אייגענע מדינה ווייל ס'איז דארט דא (ליידער) טעראריזם און מלחמות.

זיכער איז דאס נישט קיין סאבסטיטוט פאר די גאולה שלימה און ביאת המשיח. נאר ביזדערווייל, מיין איך אז דער אייבישטער כביכול איז מער צופרידן ווען "אידן" געוועלטיגן אין ארץ ישראל ווי איידער די בני ישמעאל. פארשטייצעך אויב מ'פיהרט זיך (מער-ווייניגער) עפ"י התורה.

דא קומט אריין דאס רעליגיעזע ציוניזם און די רבנות הראשית. וועלכע פרובירן, עד שידם מגעת, צו אינפארסירן די הלכות פון די תורה, ווי שמירת שבת, אז געשעפטן זאללן נישט זיין אפן אום שבת, און די טראנספארטאציע זאל נישט ארבעטן אום שבת. אויך די הלכות פון גיטין וקידושין פרובירן זיי זייער שטארק צו קאנטראלירן, על אפם וחמתם פון די בייזוויליגע חילונים און אנדערע רשעים ווי אביגדור ליבערמאן (שר"י?).

וועגן דעם איז זייער וויכטיג אז די אידן וועלכע וואוינען אין ארץ ישראל זאללן יא גיין צו די בחירות (הטמאות?), אז מ'זאלל קענען ארייברענגען אזעלכע פיהרערס וועלכע זענען נישט קיין שונאי הדת, אזוי ווי נתניהו און מנחם בעגין איז געווען. ניין, די אמעריקאנער אידן און די אידן פון אנדערע לענדער דארפן נישט גיין צו די בחירות, נאר די אידן פון א"י זאללן יא גיין, פאר זייער אייגענע טובה...!

[טראלל]

ועוד: וואס טוט מען מיט דעם מאמר חז"ל...אין ארץ ישראל נקנית אלא ביסורין...! דאס איז אקעגן די מענטשן וועלכע ווילן אויפווייזן אז ס'האט זיך נישט געלוינט צו האבן אן אייגענע מדינה ווייל ס'איז דארט דא (ליידער) טעראריזם און מלחמות.

נו דאס איז דאך די טענה אז ארץ ישראל איז נישט ווערד די ייסורים וואס מ'דארף באצאלן דערפאר (עפ"ל? ווי האט יענער געזאגט, ווילאנג ס'איז עפר ארץ ישראל איז גוט...)

[גראמאטישער]

זיכער איז דאס נישט קיין סאבסטיטוט פאר די גאולה שלימה און ביאת המשיח. נאר ביזדערווייל. מיין איך אז דער אייבישטער כביכול איז מער צופרידן ווען "אידן" געוועלטיגן אין ארץ ישראל ווי איידער די בני ישמעאל. פארשטייצעך אויב מ'פיהרט זיך (מער-ווייניגער) עפ"י התורה.

דא קומט אריין דאס רעליגיעזע ציוניזם. און די רבנות הראשית. וועלכע פרובירן, עד שידם מגעת צו ענפארסירן די הלכות פון די תורה. ווי שמירת שבת. אז געשעפטן זאללן נישט זיין אפן אום שבת. און די טראנספארטאציע זאל נישט ארבעטן אום שבת. אויך די הלכות פון גיטין וקידושין פרובירן זיי זייער שטארק צו קאנטראלירן. על אפם וחמתם פון די בייזוויליגע חילונים און אנדערע רשעים ווי אביגדור ליבערמאן, (שר"י?).

וועגן דעם איז זייער וויכטיג אז די אידן וועלכע וואוינען אין ארץ ישראל זאללן יא גיין צו די בחירות (הטמאות?). אז מ'זאלל קענען ארייברענגען אזעלכע פיהרערס וועלכע זענען נישט קיין שונאי הדת. אזוי ווי נתניהו. און מנחם בעגין איז געווען. ניין. די אמעריקאנער אידן און די אידן פון אנדערע לענדער דארפן נישט גיין צו די בחירות. נאר די אידן פון א"י זאללן יא גיין. פאר זייער אייגענע טובה...!

דו ברענגסט אראפ לאגיק קעגן הלכה, ווער געווינט?

דיינע נקודות קען מען צונעמען אויף קליינע טעלערליך.

ווער זאגט אז אידן וואס פארשוועכן די תורה זענען בעסער ווי די בני ישמעאל? עובר זיין אין ארץ ישראל איז פילפאכיג הארבער ווי עובר זיין אין חוץ לארץ.

די אראבער ווי גרויסע רוצחים זיי זענען נאר און ווי שטארק זיי גלייכן נישט די אידן זענען נאכאלץ בעסער ווי די לינקע "אידן" וואס פארשוועכן די תורה אויף א שענדליכע אופן.

ארץ ישראל פלעגט צו זיין א ריינע לאנד ווען די אראבער האבן געהערשט דערויף ביז די ציונים דעמאלסדיגע חובבי וכ"ו האבן אנגעהויבן ארויפברענגען זייערע חלוצים און געגרינדעט די סאציאלעסטישע קיבוצים.

ווער האט דיר איינגערעדט אז פארן אויבערשטן איז בעסער אידן וואס האלטן אביסל צי אינגאנצן נישט די תורה ווי ערליכע אראבער?

ארץ ישראל איז קיינמאל געווען אזוי פארשוועכט מיט עוברי על הדת ווי זי איז היינט מיטן מדינה.


ממש לעצטענס האט די בג"ץ ארויסגעגעבן א פסק אז פרויען מעגן זיין רבנים אין די רבנות הראשית, האלטסט אז ווען זיי האבן עפעס פאוער וואלטן זיי דאס צוגעלאזט?

[berlbalaguleh]

ועוד: וואס טוט מען מיט דעם מאמר חז"ל...אין ארץ ישראל נקנית אלא ביסורין...! דאס איז אקעגן די מענטשן וועלכע ווילן אויפווייזן אז ס'האט זיך נישט געלוינט צו האבן אן אייגענע מדינה ווייל ס'איז דארט דא (ליידער) טעראריזם און מלחמות.

נו דאס איז דאך די טענה אז ארץ ישראל איז נישט ווערד די ייסורים וואס מ'דארף באצאלן דערפאר (עפ"ל? ווי האט יענער געזאגט, ווילאנג ס'איז עפר ארץ ישראל איז גוט...)

דו האסט שוין געהערט פון א (נארמאלן) איד וואס זאלל זאגן פאר'ן אייבישטן..."מוחל טובות. איך דארף נישט ארץ ישראל"...! אויסער די פאררוקטע ברואים פון די נטורי קרתא, פארשטייצעך.

ווען משיח וועט קומען (גאר בקרוב אי"ה). און די נטורי חרתא וועללן זיך (אויך) שטעללן אין ליין צוזאמען מיט די אנדערע אידן, וועלן איך זיי פאריאגן, (בלי"נ) און זאגן אז זיי זאללן גיין צו זייערע חברים קיין פאלעסטינע...!

[פונדאַמענטאַל]

ווער זאגט אז אידן וואס פארשוועכן די תורה זענען בעסער ווי די בני ישמעאל?

אפשר פארדעם פעלט זיך אויס נאציאנאליזם, צו פארשטיין די חשיבות פון א איד... ווי עס ווייזט אויס, טוען עס נישט די אנטי נאציאנאליזם עלעמענטן פארשטיין.

די אראבער ווי גרויסע רוצחים זיי זענען נאר און ווי שטארק זיי גלייכן נישט די אידן זענען נאכאלץ בעסער ווי די לינקע "אידן"

אוודאי, בעסער... ווייל די אראבער זענען רעכט?

ווער האט דיר איינגערעדט אז פארן אויבערשטן איז בעסער אידן וואס האלטן אביסל צי אינגאנצן נישט די תורה ווי ערליכע אראבער?

ווייל ער האט בוחר געווען עם ישראל פאר זיין פאלק, שוין דעמאלס האבן געוויסע (גאר ערליכע און דערהויבענע עובדי השם - ממש ווי מלאכים...) געפרעגט הללו עובדי עבודה זרה וכו' (טראץ וואס אפילו זיי האבן נישט גע'טענה'ט אז די מצרים זענען "בעסער" (די "ערליכע", די וועלכע האבן אריינגענומען די בהמות ביי מכת דבר...), זיי האבן בלויז גע'טענה'ט אז זיי זענען גלייך...).

ממש לעצטענס האט די בג"ץ ארויסגעגעבן א פסק אז פרויען מעגן זיין רבנים אין די רבנות הראשית, האלטסט אז ווען זיי האבן עפעס פאוער וואלטן זיי דאס צוגעלאזט?

געפערליך! ממש שוין בעסער א "ערליכע" אראבער....

[berlbalaguleh]

גראמאטישער: האמיר דאך געשמועסט אז משיח איז נאכנישט געקומען. און אונז ווארטן פאר די גאולה שלימה. נאר אין היינטיגן מצב הגלות אפילו אין ארץ ישראל איז נאכאלץ בעסער אז "אידן" געוועלטיגן איבער ארץ ישראל ווי איידער די "וואוילע און ערליכע" אראבער.

זיכער. די נישט ערליכע אידן וועלכע זענען נאך בבחינת בינונים אדער תינוקות שנשבו דארפן, און וועלן (בעז"ה) תשובה טון. די רשעים גמורים וועללן שוין באקומען זייער פארדינטע שטראף. איך וויין נישט פאר זיי. נאר די רוב באפעלקערונג אין ארץ ישראל זענען טייערע אידן.

דיין טעות. און דער טעות פון נאך א סאך אנדערע אידן בקהילתינו הקדושה איז, אז אויב מ'וועט אייביג נאר מקטרג זיין און זוכן שלעכטס אויף אידן איז מען מקיים די שיטה.

[גראמאטישער]

דאס איז מיין טענה.

ווער איז דער וואס האט אפגעמאכט אז גענצליך פרייע אידן וואס זענען טעגליך עובר אויף מצוות דאורייתא איז בעסער פאר באשעפער ווי אראבער וואס צום ווייניגסטענס פארשוועכן זיי נישט דעם ארץ הקודש מיט די לינקע געזעצן.

פארוואס קומט איר צום מסקנא אז פארן באשעפער איז בעסער א מדינה וואס יעדע סעקונדע פון איר עקזיסטענס איז א מרידה בה' ומשיחו ווי ארץ ישראל אונטער אראבער.

[ים רויבער]

אז מען רעדט שוין מיט אידן וואס ווייסן וואס די אויבערשטער טראכט און וויל, לאמיר אייך פרעגן:

אפשר וויל די אויבערשטער די אזוי גערופענע "פרייע" אידן פון א"י וואס כמעט אלע האבן א ברית מילה, האבן חתונה מיט אידן ע"י חופה וקידושין. און א שיינע ציבור לייגט תפילין טעגליך, האלט טהרת המשפחה וכו'.

איבער די פרייע אידן אין אמעריקע וואס רוב פון זיי זענען נעבעך אפגעריסן פון אידישקייט, האבן נישט קיין השגה וואס אידישקייט מיינט און וויל פון זיי, האלב האבן חתונה מיט גוים וכו'.

עס זענען דא א שיין ביסל ראשונים וואס האלטן אז כיבוש א"י בזמן הזה איז א מצוה, און רוב ראשונים האלטן אז ישוב א"י בזמן הזה איז א מצוה.

די שלש שבועות וואס ווערט דערמאנט איין מאל אין ש"ס איז נישט דערמאנט אין רוב ראשונים להלכה, און די מהרש"א ברענגט עס אראפ אין חידושי אגדות, דהיינו ער האט אנגענומען אז עס איז אגדתא.

לעומת די אלע הלכות, מצוות, שבחים וכו' אויף א"י וואס ווערט דערמאנט הונדערטע מאל.

[די קעפעלע]

[berlbalaguleh]

עס זענען דא א שיין ביסל ראשונים וואס האלטן אז כיבוש א"י בזמן הזה איז א מצוה, און רוב ראשונים האלטן אז ישוב א"י בזמן הזה איז א מצוה.

די שלש שבועות וואס ווערט דערמאנט איין מאל אין ש"ס איז נישט דערמאנט אין רוב ראשונים להלכה, און די מהרש"א ברענגט עס אראפ אין חידושי אגדות, דהיינו ער האט אנגענומען אז עס איז אגדתא.

לעומת די אלע הלכות, מצוות, שבחים וכו' אויף א"י וואס ווערט דערמאנט הונדערטע מאל.

דער סאטמאר'ע רבי זי"ע, אין ספר ויואל משה מאמר ג' שבועות סימן פ', שרייבט אליין אז די שלש שבועות איז נישט קיין הלכה, דערפאר ברענגט עס נישט דער רמב"ם. ווייל ער ברענגט נאר א זאך וואס מ'קען מבאר זיין אלס הלכה... עיין שם.

[סקעפטיקער]

דער סאטמאר'ע רבי זי"ע, אין ספר ויואל משה מאמר ג' שבועות סימן פ', שרייבט אליין אז די שלש שבועות איז נישט קיין הלכה, דערפאר ברענגט עס נישט דער רמב"ם. ווייל ער ברענגט נאר א זאך וואס מ'קען מבאר זיין אלס הלכה... עיין שם.

דאס מיינט פעיק ניוז. ער שרייבט עס טאקע דארט אבער מ'דארך עס נעמען אין קאנטעקסט, ער שרייבט אז די איסור איז דא אן די שבועות מצד כפירה אין די פרשת הגאולה אין נצבים און דאס שרייבט די רמב"ם יא, און די שבועות איז נישט להלכה (ווייל די הלכה איז אזוי בלא"ה) נאר להגדיל העונש וואס דאס דארף די רמב"ם נישט ברענגען.