די גוטע חלקים פון אונזער "סיסטעם"

[DotCom]

בעז"ה

....אונזער סיסטעם איז פארדרייט! די גאנצע סיסטעם סאקט! דאס איז די ווערטער וואס מיר הערן, ליינען און וויינען אגאנצן טאג, ווער עס דרייט זיך נאר דא אין קאווע שטיבל פאר א קורצע צייט זעהט אז זייער אסאך אשכולות וועלן ביי די פערדע - פיפטע תגובה אריינפארן אין דעם ריכטונג, מען קוועטשט, קריטיקירט און מען קאמפלעינט אויפ'ן סיסטעם, דער סך הכל איז אז דער סיסטעם איז פארפוילט און דער עולם איז אנגעווייטאגט.

און אנגעווייטאגט מיט רעכט, מיר לעבן אין א דור עקש ופתלתול, א שלעכט פארדארבענע דור, א דור וואס די בתי דינים זענען קארופטירט, די רבנים זייערע וואס דארפן זיין אונזערע וועג ווייזער'ס זענען בלויז פארנומען מיט דעמאגאגישע דרשות צו ווייזן אז זיי זענען אין קאנטראל, א דור וואס עקסטרעמיסטישע סיקריקים - די א.ג. 'עסקנים' רייטן אויף אונזער תמימות, און טוהן דערמיט אלעס וואס זייער רשעות'דיג הארץ באגערט, א דור וואס אונזערע גייסטליכע פירער שלאגן זיך צווישן זיך ווי קליינע קינדער און נוצן אונזער בלוט און פלייש פאר זייער סעלפישע נצחונות, א דור וואס די גאנצע חינוך סיסטעם איז טאטאלי צובראכן און שטעלט זיך ארויס אלס א קאטאסטראפאלע דורכפאל, א דור וואס האט אנטוויקעלט א סיסטעם מיט אויפגעבלאזענע לעבנ'ס סטאנדארטן, א דור וואס האט אדאפטירט א באגריף פון 'לעבן פאר יענעם' - דער 'יענער' פייניגט אונז ברוטאליש אויף טריט און שריט, און ועל כולם רויבט ער אוועק אונזער שווער אפגעארבעטער געלטער און לעצט פארבליבענע כוחות הנפש מיט די הויעכע דירה געלטער און שפענדערישע שמחות, א.ד.ג.

אבער, איך וויל נישט דא אריינגיין אין די סיבות וואס האט אונז צוגעברענגט צום 'סיסטעם' און אויך נישט וויאזוי מען קען פאררעכטן דעם 'סיסטעם', סיי ווייל אויף דעם איז שוין דא אשכולות לרחצה און סיי ווייל איך גלייב אז דאס זענען נישט פון די זאכן וואס איז 'בידינו' צו טוישן, כאטש אז עפעס וועט זיך מוזן טוישן בקרוב איז אבער קלאר אז 'מיר' קענען נישט טוישן דעם סיסטעם אזוי זיפענדיג קאווע, ומה שלא יעשה השכל יעשה הזמן און ווי היסטאריע האט שוין באוויזן, אז יעדער דור האט זיך זיינע פראבלעמען און מיט דער צייט טוישט זיך עס, (ומחכים על משיח שיבא ויגאלינו בקרוב), די מערסטע וואס מיר קענען אבער יא טהון און וואס מיר דארפן טהון איז נישט זיך לאזן פאלן פאר'ן סיסטעם, די וועלט זאגט א ווערטל "סוקסעס איז די גרעסטע נקמה", מען קען האבן אייגענע סוקסעס און נקמה נעמען אינעם סיסטעם דורך ארויסנעמען די גוטע חלקים דערפון און לעבן א גוטן לעבן, אז די סיסטעם סאקט - סאקט מען עס צוריק וויפיל עס גייט, און מען לעבט ווייטער פאר זיך א געשמאקן טאג און מען לאכט אין די פויסטן, יעדע שלעכטע זאך האט אין זיך גוטע חלקים, און די חכמה איז צו בורר זיין די אוכל מתוך הפסולת, אזוי ווי רבי מאיר האט געטהון, רימון מצא, תוכו אכל וקליפתו זרק.

איך וויל מאכן א ליסטע פון די נאר גוטע און פאזיטיווע זאכן מיט וואס אונזער סיסטעם און איר לעבנסשטייגער איז געבענטשט, די גוטע זאכן מיט וואס אונזער קאמיוניטי איז געווארן צוגעבינדן און אנגעוויזן מיט די יארן און ווי נישט ווי האבן מיר אלע הנאה דערפון, אמת טאקע אז געוויסע זאכן זענען געבוירן געווארן נאר אדאנק די ביטערע מחלוקת'ער, און אסאך פון די פאזיטיווע זאכן אליינס האבן אויך א שלעכטע זייט, אבער איך וויל דא נאר רעדן פון די גוטע חלק, דאס איז וואס איז מיר נוגע, די אלע שלעכטע חלקים לאז איך פאר די פעסימיסטישע נארנים וואס ווילן ליידן, פאר די ריכטיגע סאקער'ס, די אייביגע לוזער'ס.

איך בעט דער עולם זאל צולייגן סיי וועלכע גוטע זאכן מען דערמאנט זיך נאר, אבער נאר אזעלכע זאכן וואס מיר האבן הנאה דערפון און בענעפיטירן דערפון, נישט קיין חילוק ווער דער מייסד איז, אדרבה אויב איז עס געבוירן דורך א מחלוקה אדער פאליטיק דארפט מען עס הערשט אויסנוצן, אבער פליז זיך האלטן צום נושא און נישט פארפארן, אויסדריקליך נאר אראפשרייבן דא די גוטע חלקים פון די 'סיסטעם'!

וזה החלי:

1. חברה הצלה, ראטעוועט לעבנ'ס טאג טעגליך, דורך זיין קאמינויטי בעיסד האבן זיי שנעלערע צוטריט צום באטרעפנדן.
2. חברה שומרים, היימישע איבערגעבענע וואלונטירן וואס באוואכן אונזער קאמינוטי.
3. חסד - גמ"ח הצלה - לינת הצדק, טראנפארטאציע צו מעדיקל פעסיליטי'ס און היטן קראנקע פון שפיטאל אביוז.
4. חי לייפליין, לעבנסוויכטיג.
5. בוני עולם – עי טיים, א שטאלץ פאר אידן.
6. וועד הצניעות, נאך אלעם היטן זיי אפ אונזערע אוצרות פון פארדארבענע עלעמענטן.
7. פארשידענע גמחי"ם פאר געלט, קליידער, און אלע ערליי פראדוקטן.
8. ס'דא ב"ה אמת'ע עסקנים לש"ש, פאר חינוך, שלום בית, ביזנעס, אידישקייט און לעגאלע פראבלעמען, אסאך זענען בחנם אבער דאס אידיש הארץ קען מען סייווי נישט באצאלן, מי כעמך ישראל.
9. קאווע שטיבלעך, מקוואות, היכלי התורה און סתם פאלישעס וואו מען סאשעלייזט זיך מינימום 2 מאל א טאג.
10. בחנם'דיגע –סעים דעי- גראסערי דעליווערי'ס, א מין סערוויס וואס כאב נאך אין ערגעץ נישט געזעהן.
11. קימפעטארן היימען, כאטש עס קאסט געלט איז עס אבער א געוואלדיגע אופטוה.
12. *חברים - קרעדיט בן תמליון
13. *תומכי שבת - עזר למזון - קרעדיט יידל
14. *חסד - מתעסקים - קרעדיט פארוואס נישט


די ליסטע איז נאך לאנג און מען דארף בלויז וועלן זעהן, פליז, קיעפ איט קאמינג.