קאווע שטיבל

א גוט יאר חברים

איך האב מיר נארוואס צוריקגעקערט פון מיין וואקאציע אין די 'גאלדענע לאנד' אמעריקע לכבוד א שמחה, עס איז גראדע נישט די ערשטע מאל וואס איך בין דארט אבער יא דאס ערשטע מאל וואס איך האב א משהו מער אבסעווירט די קולטוארע חילוקים צווישן אמעריקא און אייראפע – ווי איך וואוין – וועל איך עס אביסעלע צולייגן דא.
אן אנטשולדיגונג למפרע פאר די סענסיטיווע פאטריאטן צווישן אייך וועלכע וועלן דאס מעגליך אננעמען פערזענליך.

איך וועל אנפאנגען מיט פאקטן פון מיין נסיעה'לע - געוויסע מערקבארע אנעקדאטן וועלכע האט געצויגן מיין אויפמערקזאמקייט, און דערנאך אפשר א לעפלע אנאליז.

• אנקומענדיג אין עירפארט אריינצוטשעקן – אין מיין וואוין-ארט האב איך געבעטן פאר אזא בעזינעט (א קליינע פלאץ פאר א בעבי צו ליגן אין פליגער), האט ער מיר פראבירט צו פארשאפן איין, ער האט מיר אפי' געטוישט זיצן פאר א טייערן זיץ צו זיין עליגעבעל פאר דעם (עס קען נאר ליגן ביי א וואנט פון פארנט) אבער למעשה לא עלתה בידו וויבאלד אנדערע האבן שוין עס אויסגעכאפט און עס איז נאר דא א מספר מצומצם אויף יעדע פליגער דערפון. פילדיג שלעכט פאר מיר האט ער מסדר געווען איך זאל האבן אן עקסטערן זיץ פארן בעבי עכ"פ – הגם איך האב לכתחילה נאר באצאלט פאר א infant on lap.
• אויך האט ער מסכים געווען אריינצונעמען מיין עקסטערע האנט-באגאש (וועלכע איך האב גענומען פאר קליידונג אנשטאט צאלן פאר א רענצל) פון אונטן פון פליגער, מיר אפצוליידיגן מיינע הענט.
• אנקומענדיג צום געיט האט דער מאן-דאמר דארט מיר געזען מיטן קינד און מיט א doona (א געבארגטע אגב..) וועלכע בד"כ שיקט מען אריין פון אונטן פונעם פליגער פארן אויפשטייגן, זעענדיג דאס און מיין עקסטערע זיץ האט ער מיר אנגעטראגן דאס מיטצונעמען אויפן פליגער ארויף, צו האבון א מכובד'יג מקום פאר מיין זונ'דל.

ע"כ די הקדמה. די נסיעה אליין איז ב"ה אדורך געשמירט.

• אנקומענדיג קיין JFK– זייענדיג אויסלענדישע – האט אונז אפגעווארט א שורה פון דארט ביז האוואי, געהערט פון א צווייטן וואס האט ליטערעלי געווארט דארט 3 קיילעכיגע שעה! ב"ה איך בין אפגעקומען מיט חצי כופר 'נאר' ווארטענדיג 1.5 שעה אין יענע שורה – ווי קיינער האט זיך נישט צוטון געמאכט פונעם פאקט בכלל אז דא זענען דא מידע אויסגעמאטערטע אויסלענדער – נאך א לאנגע רייזע – אפגערעדט פון בענקלעך אדער עפעס, זענען רוב בארדער טישלעך גאר געווען פארמאכט, מיט א מכשפה אין פארנט מאכענדיג יאמערליכע קולות אויף ווער נאר עס דערוואגט זיך צו טרעטן איבערן ליניע פאר די צייט, ווער רעדט נאך פון געבן פרייאריטעט פאר גרעסערע משפחות אדער משפחות מיט קליינע אומגעדולדיגע קינדער (ווי אין אסאך איירופעישע עירפארטס)...
• א מין צוריקגעשטאנענקייט וואס הערשט דארט, שוין לאנג נישט געזען אזאנס – זיכער נישט אין אזא מאדערנע לאנד וועלכע איז זאגאר די יושב ראש פון פארגעשריטענקייט, אן אפגעריסענע שטח פון די ניינצן דרייסיגערס נאך, אן קיין קלארע סיינס וואו יעדע זאל גיין אדער זיך שטעלן, פלוס די קולות טאמער בטעות פארשטייסטו נישט אליין..
• די אפיציר דארט זעט אויס ממש ווי פון די אינקיוויזיציע ארויס, דערוואגן זאל א שמייכן זיך צו באווייזן..
• א טראלי פאר די רענצלעך ווילסטו? אהער מיט 6 דאללער און דו מעגסט האבן די זכייה צו נוצן 'אמעריקע'ס וועגעלע פאר געציילטע מינוטן! די אמעריקאנער מענטאליטעט בתוקפו! דו פארשטייסט מסתמא אפי' נישט וואס איז מאדנע דערין, ווילסט נוצן - באצאל?! טאקע דערפאר האב איך געמאכט מיין הקדמה'לע.
• אנקומענדיג נאך די קאסטומס, ווארטענדיג אויפן טעקסי, וואס מיינט עטס, דארט איז יא געווען וואו זיך צו זעצן נאכן שטיין אזוי לאנג? א נעכטיגן טאג! אין אמעריקע זיצט מען נאר אין חד גדיא..
• דא האב איך גראדע געמאכט א שטיקל טעות (איגנארירנדיג די ווארענונגען נישט צו נעמען די מעקסיקאנער פריוואטע טעקסי דרייווערס, איך האב זיך אבער פארט איינגערעדט אז עס וועט זיין ביליגער ווי די געלע שמאטעס..) און געפאלן צום בקשה פון די פילצאליגע 'היימישע' טעקסי דרייווערס – וועלכע האבן אזא שמור-לי-ואשמור-לך-ביזנעס פון רעקאמענדירן איינער דעם צווייטן, לאזענדיג זיך איינרעדן פון זייער צוזאג אז עס גייט נישט קאסטן מער ווי $75 אריין קיין וויליאמסבורג, למעשה אנקומענדיג (אן קיין טראפיק) ווייזט ער אויף זיין אומשילדיג מיטער וועלכע צייגט אזוי געלט-גייציגערהייט נישט מיר נישט דיר 120 דאללער, האבענדיג געפארן מיט אסאך אנדערע האב איך געוואוסט אז שוין צורעכענענדיג די הימל שרייענדע אינפלאציע דארף עס נישט צו זיין מער ווי $100 לכל היותר, און דאס האב איך אים אהין-געגעבן, ער האט געוויינט איבער זיין פאמיליע וועלכע ער דארף נעבעך אויסהאלטן און אז זיין מיטער איז פולקאם אויסגעהאלטן, אבער מ'אוביי תחכמיני'דיג האב איך דאך אויך א פאמיליע.. איז עס געבליבן ביי דעם.
(אויב זענט איר באזארגט, ווייס איך שוין פונעם קאר-סערוויס וואס נעמט א קנאפע 50 טאלער – גענוצט אויפן וועג אהיים.)
• די דירה'לע מוז איך זאגן איז געווען פיין צוגעשטעלט (דורך א קרוב מיינע – פארשאפט בחינם)
• פאנגט זיך אן מיט עסן און אמעריקע. ווייסן מיר דאך אלע ווי עס זענען דא די בעסטע מאכלים? אין אמעריקע פארשטייטצעך! אבער וואסעפעס? טאקע אן אויסוואל פון בייגל ביז פיצא/סושי ביז פליישיגע רעסטוראנען, אבער מער-ווייניגער אלעס מיטן אקוראט דעם זעלבן שניט. דא אין איירופע – טאקע ווייניג אכילה, אבער ווי יא, איז עס אייגענארטיג אין סטיל און געשמאק. ווער רעדט נאך פון די פרייזן, ווי פאר אן אומשילדיג נאכטמאל איז $50 דאלער דזשאסט אבאוט גענוג.
• גיין צום גראסערי איז פשוט אן עבירה! די הימל שרייענדע פרייזן דארט, די אמאליגע פריצים האבן נישט געקענט אויסליידיגן זייער מאסן'ס טעשער אזוי גוט ווי איין אמעריקאנע גראסערי אויספלוג. אזש איך פארשטיי באמת נישט פארוואס דער עולם איז נישט אויף הונגער סטרייק. נאכדעם וואונדערט מען זיך נאך פארוואס די גראסעריס לייגן נישט זייער פרייזן אויפן פאליצע #ווייז-די-פרייז?! א פאברעך פאר זיך..
• אז מ'רעדט שוין פון טייערע עסן האב איך אויפגעפאסט ביי וועם אלס איך בין נאר געווען, די הויכע סטאנדארד פון עסן צו וואס מען איז געוואוינט, נעם אסטרייכער קוקיס, גאלדען פלאו אראנדז דזשוס, מהדרין יאגורטס, און א טוץ פון אנדערע טייערע ברענדס, וועלכע זענען משום איזה סיבה די 'נארם' דארטן, און לאו דוקא ביי פארמעגליכע אירע, דאהי זענען אויך דא די אלע ברענדס, אבער על אף זייער בעסערע קוואליטעט(?!) איז עס דיגנאזירט פאר עשירים. פינטל. פשוטע אידן קויפן ביליגערע עסנווארג.
איך האב דאס מצדיק געווען מיט די 'פוד-סטעמפ' געניסעריי וועלכע ברענגט אז עסן זאל זיין מעגליך מער א שפענדעריי. אולי.
• און רעדענדיג פון איינקויפן, די געדאנק דארט פון 'פלוס-טעקס' וויזויהייסטעסנאר, דאס אז אויפן פאליצע איז דא איין פרייז אבער מות יומת - צאלן וועסטו צאלן - געוויס אויך פאר אונזער הויכ-געשעצטע רעגירונג, צו וואס מודיע זיין פאראויס? צו וואס עס אריינרעכענען אינעם פרייז לכתחילה? ממש א שאד. אפשר דערפאר זענען אייראפעיער ארימער – זיי האבן נישט געכאפט די מארקעטינג גאונות פון די אמעריקאנער סוחרים..
(איך וועל זיך פרייען צו הערן אז דאס איז אזא געזעץ צו וואס - נישט פארמינערנדיג די מאדנעקייט דערפון..)
• וואס מען קויפט איז א באזונדערע סוביעקט, דאס אז 'יעדע' -אויסדרוקליך- קויפט די זעלבע זאכן (נישט קיין וואונדער די ענליכע עסן סטילן,) מיין ווייב האט דאס ממש נישט געקענט דערטראגן, פון די קערידשעס, די מעטשינג קליידער, די טייערע צירונגען, א.א.וו. טון 'אנדערש ווי יעדעם' אדער קויפן אין די ביליגערע סארט געשעפטן איז נישט סתם קיין עוולה, עס באשיינפערליך כאראקטיזירט דעם קונה אלס 'כאנטש' אדער אין בעסטן פאל אלס אן עליען... איז דאך לעיזער קרויס הייליג גערעכט!
• די צוריקגעשטאנענקייט ווי פריער דערמאנט, שפיגלט זיך אפ ווי נישט. זייענדיג צוגעוואוינט צו נוצן פובליק טראנספארטאציע האב איך עס גענוצט דארטן אויך – הגם מאן דכר שמיה, קיינער האט נישט געהאט קיין אנונג איבער זייער סקעדולס וכדו', נעמליך, קארס איז דאך די 'נארם'.. – אבער איך וועל מודה זיין אז עס איז טאקע געווען יענץ געשעפט, אפגעריסענע סטאנציעס – טאקע פאסיג פאר א וואוינארט פאר די טויזענטע אימיגראנטן און היימלאזע. צופליקטע באנען, (נישט אז די מאנסי-טרעילס באס איז עפעס בעסער..). אנצוקומען פון איין פלאץ צום צווייטן נישט קיין חילוק ווי נאנט – מוז מען לכה"פ טוישן צוויי מאל אינצווישן. ווער רעדט נאך פון די עלעוועיטארס ארויס פונעם סטאנציע, די שמעק דארט קען זיך רואיג פארמעסטן מיטן סקאנק...
• די פרעכהייט אין אמעריקע בכלליות, ווי ביי די עזרת נשים איז מיין ווייב געווען שאקירט צו הערן פריוואטע נושאים צוגאסן אין די מאסן - ווי מקוה אדער פריוואטע לעבן, און אויפן באן, איז עס מיט דעם דיסרעספעקט איינער צום צווייטן שטופענדיג זיך ארויף און אראפ ווי כאילו קיין צווייטע אין עקזיסטענס, און אויפן ראוד אודאי ווען טראפיק געזעצן אדער סטאביליטעט איז קיין נושא בכלל, ווייסט בכלל איינער אז די לינקע ליניע אויפן הייוועי דארף מכלומ'רשט צו זיין די שנעלערע ליניע?!
איין נקודה טובה איז יא דא דערין, אז מ'נעמט עכ"פ אן זאכן זייער נישט פערזענליך, ווען איינער פייפט (אויך אזא טרענד..) פייפט מען צוריק, איינער כאפט זיך אריין אין פארנט – איז נישט עק וועלט – אנדערש ווי אייראפע ווי חשבונות האלטן אן ווילאנג יענער איז נאך אין האריזאנט.
• סיינס און באן סטאנציעס אדער אויפן ראוד איז נישט צום דבר בכלל. די שאנסן צו בלאנדזשענען זענען גרעסער ווען מ'גייט נאך די סיינס ווי ווען מ'פראבירט צו 'געסן' דעם וועג אליין. פון עקספיריענס.
• די היצן און הומידיטי יענער וואך איז פארשטייט זיך נישט די איינוואוינערס שולד, אבער פארט עפעס וואס וואלט געמעגט אראפקלאפן זייער שטאלץ.
• א ביהמ"ד איז ווי א באן סטאנציע, און א חתונה איז ווי א שאפינג-מאאל! די מניינים פארן ווי טרעינס, און יא, מ'איגנארירט זיך אויך איינער דעם צווייטן ווען מעגליך. און ביי א חתונה (שוין אפגעזען די חופה אויפן גאס – ווי א מארקעט.) טוט זיך די ביזנעס אויפן העכסטן פארנעם ווי נישט דיר מיינט מען.. איינער האט דיר געלאדנט בכלל דא צום עקספאו? אנטשולדיגט, איך האב פארגעסן אז ניטאמאל דעם פראגע וועסטו הערן..

איצטער אפאר שיינע חלקים:
• סערוויס פון אלע סארט (פאר געלט שטייטצעך) איז דא אסאך, אריינגערעכנט אן אויסוואל פון געשעפטן און שולן!
• מ'איז מער העפליך און ווארעם.
• מ'קריכט נישט אין קיינעמס קישקעס אריין.
• וואו זיי ווילן איז שוין איינמאל מאדנעזירט – א שטייגער ווי די געגנט ארום און אין דעם פרידאם טורעם אין מאנהעטן (און להבדיל אסאך בתי מדרשים).
• רוחניות (און רעזאלט פון גשמיות..) שפרידלט אויף א מאסיוון פארנעם – הגם זייער סיסטעמאטיש ווי געשמועסט.
• צווישן די אלע רעסטוראנען איז למעשה דא גוטע בשר אויך.
עס גייט ווייטער, נישט געזארגט, איך בין נאר נישט און די פאזיטיוון גיסטע יעצט איבער דעם לאנד...

• נישט פארגעסן די צווייטע טייל פונעם עירפארט געשיכטע, וואו אויפן וועג אהיים נישט נאר וואס פאר געוויסע (צוריקגעשטאנענע) סיבות איז מיין קינד'ס טיקעט געווען אומזעבאר און איך האב געדארפט צאלן אויפן פלאץ פאר א נייע, ניטאמאל אויסהערן וועגן א בעסערע זיץ לכבוד די בעבי האט דער יעניגער מסכים געווען, למעשה איז געווען דארט א ליידיגע זיץ, אבער די געדאנק פון ארויפנעמען דעם doona אן באצאלן דעפאר איז געווען ווי נבלה רייד, נישט משנה וואס די חברה אויפן וועג אהין האבן געטון. די ליניע ווידער פאר סעקיוריטי, די צוריקגעשטאנענע סיסטעם פון סקענען, און די הארטנעקיגקייט דארט, איז דאך שוין בס"ה חזרה, אבער פאר מיר איז עס פריש געווען פיינפול.
• ב"ה מ'איז צוריק אהיים בשלום, און נאר פאר איך פארגעס, דאהי אין עירפארט האב איך דאס מאל אויפגעפאסט אויף די צוגעשטעלטע בענק צו זיצן בשעת'ן ווארטן פאר די רענצלעך אויפן בעלט.. אן אימזיסטע באנוס..

איך מיין עס איז קלאר אז איך בין ווייט נישט קיין פאטריאט פאר אמעריקע, אויב עפעס, זייער אויפגערעגט אויף די אוממענטשליכקייט דארט. דאס אבער אז איך זע נאר די מעלות אין מיין מדינה און בעיקר די חסרונות דארט איז פארשטענדליך, בפרט אז צו וואס מען איז צוגעוואוינט איז ביי דעפינאציע א מעלה און נארמאל.

עס האט זיך פארצויגן לענגער ווי געפלאנט, (איך האב אליינס נישט געכאפט ווי בייז איך בין.. עס איז נישט שלעכט זיך אויסצוגעבן אויף פאפיר – נוסח אייראפע..) נאר איין ווארט אלס דרויסענדיגער אנאלאזירער:

אין איין ווארט איז מיין אנאליז אז די גרויסקייט און דעמאגראפיע פון אמעריקע איז וואס האט לכאו' צוגעברענגט אזא קולטוארע עיליענעישאן-alienation, ווי יעדער זעט נאר זיך און האט פשוט נישט קיין צייט (-טיים איז מאני) צו באמערקן אדער קערן – אפגעזען זיך צוקראצן פון א צווייטן. די עקאנאמיע און מענטאליטעט איז זייער פלואיד – עס רינט - מ'פארגינט מער, מ'גיבט אויס מער, און יא, מ'מאכט אויך מער אין רעזאלט. די סיסטעמאטישקייט מיט וועלכע דאס ווערט אבער באגלייט איז אומדעטרעגליך פאר א דרויסענדיגער, הגם אויפן ערשטן בליק זענען די אפארטוניטיס און מעגליכקייטן היבש גלאנציג פאר אן ארימער אויסלענדער.
די צוריקגעשטאנענקייט איז נאך א תוצאה פון זיין מיטן קאפ צו סאך פאראויס, און די געלט-גייציגקייט בס"ה א סורווייוועל מעכאניזם.

די שטאלץ אין/מיט אמעריקע איז בעצם נאך א נושא, אבער אויבן אויף נעמט זיך עס פון די באקסעדיגע סיסטעם ווי מען וואקסט אויף און ביי דעם ענדיגט זיך די (בעסטע) וועלט.

לעומת זה, אין אייראפע לדעתי, וואו הגם אלעס פארט שטייטער און פונקטליכער, קומט עס אבער מיט מיט מער קוואליטעט – וועלכע מ'קען שווער מסביר זיין פאר א פאריאגטע אמעריקאנער וואס האט קוים צייט צו טראכטן איבער קוואליטי אדער מינונג. דער וואס פארשטייט פארשטייט!
עס איז בולט אין די חילוק צווישן אמעריקאנער קארן אנקעגן אייראפעאישע (דייטשע וכדו') ווי די אמעריקאנער זענען מעגליך באקוועמער אויפן שארט טערם (ווער האלט דען א קאר לענגער..) אבער די פונקטליכקייט און דויערהאפטיקייט פון אייראפעישע קארן איז אומפאגלייכבאר פאר וועם נאר עס מאכט אויס...

אין א טענה'ריי מיט א חבר (נאך זיין ערשטן באזיך דארט), ווי ער איז געווארן אנציקט פון די פאקט אז מען judged כמעט נישט קיין צווייטן דארט (כ"ז ער פאסט אריין לפנים אינעם סיסטעם), און אז די ווערייעטי פון מענטאליטעטן און אפציעס איז פאר אים ממש מעין עולם הבא, האב איך אים געראטן צו וואוינען דארט פאר אפאר חדשים, און אליינס פילן די הונגער אין זיין זעל פאר די אויפמערקזאמקייט און לעבנס ווירדע צו וועלכע ער איז געווארן נורטורד אלע זיינע יארן..

גענוג געווען פאר יעצט. כ'האף נאכאמאל עטס זענטס מיר מוחל פאר די כפיית טובה פון הכנסת אורחים, איך טו עס על סמך ענקער מעלה פון זיך נישט צוקראצן..

יישר כח פארן אויסהערן.

הרבה יותר ממה שקראתי יש כאן.
סיי איבער מיינע פריוואטע עקספיריענסעס דארטן איבערן וואך, און בעיקר איבער אנאלאזירן די מענטאליטעטן און די חילוקים פון די קולטורן.

איך האב עס אבער ענדערש געוואלט שרייבן ווי שנעלער אונטערן ווארימע רישומא פונעם נסיעה, ווי אויסגערוטערהייט אבער ווייניגער ארגינעל..

לעצטנס איז טאקע דא אזא טרענד אויף סאציאלע מידיע אז מ'פארט קיין דייטשלאנד צ.ב. און מ'מאכט comparison קליפס און ווידיאוס צו אמעריקע, למעשה דארפסטו פארשטיין איין זאך, ווער מיינסטו איז בכלל געקומען קיין אמעריקע in the fist place? אלע לא יוצלח'ס, שלימזל'ס, אנזעצערס און בעלי חובות וואס ס'זיי נישט גוט געגאנגען אין אייראפע האבן געהויבן פיס און אנטלאפן קיין אמעריטשקע אנצופאנגען א פריש בלעטל, אזוי האט זיך צאמגעקליבן אסאך שלימזלדיגע גענעס דערפאר קוקט עס ליידער אזוי אויס... נאר גראדע האט זיך ארויסגעשטעלט אז וויבאלד אמעריקע איז געוועהן ווייט פון אלע נארישע אייראפעאישע מלחמות אין לויף פון די יארן האבן זיי געהאט מער צייט און ענערגיע זיך אויפצובויען דערפאר זענען זיי געווארן אזוי סוקסעספול, פון דא זעהט מען די מעלה פון אחדות (דא ערגעץ אזא גמרא איבער די תקופה פון אחאב)

איך ווייס נישט וואו דו וואוינסט און צו דו מיינסט עס ערענסט, בכל אופן קען עס זיין א ריכטיגע נקודה.

איך האב גראדע נישט געוויסט פון דעם 'טרענד' צו זאגן, איך האב עס פשוט געטון זיך אויסצוגעבן מיין פרוסטרירונג..

טשעק אויס דעם חברה'מאן, גאנץ שפאסיג... https://www.youtube.com/shorts/tIwjNmbTA38

ער טרייבט אבער שפאס מער פון די דייטשן, אז דו זוכסט לצנות אויף אמעריקאנער איז געוועהן פאר אפאר יאר צוריק א טיקטאק טרענד What's The Dumbest Thing an American Has Ever Said To You?, ס'דא גאנצעטע ליקוטים דערפון אויף יוטיוב, ליצי לצנות.

אויב ביזטו א בריטישער וואלסטו מעגליך ענדשויט די lost in the pond טשאנעל

אלפא, אלעס וואס דו שרייבסט איז ריכטיג און פארשטייט זיך אלעס קען מען מסביר זיין אבער די מציאות גייט זיך נישט טוישן. איין זאך זאלסטו נישט פארגעסן ווען דו שרייבסט אמעריקע, אמעריקע איז ריזיג גרויס און דו האסט סך הכל גוט אראפ געלייגט די ניו־יארקער עיר פארטס און די הייליגע שטאט וויליאמסבורג. גיי ארויס פון וויליאמסבורג און ניו־יארק בכלל קענסטו האבן פארשידענע אנדערע עקספעריענסעס. פאר ווער עס איז שוין ארום געפארן אמעריקע קען מעיד זיין. אבער איין זאך דארף מען דאנקען דעם אייבערשטן אז די וועלט איז פארשידענארטיג. שטעל דיך פאר ווען יעדער איז די זעלבע וואלט די וועלט געווען בארינג, וואלסט נישט געהאט וואס צו שרייבן.

נ.ב. ביטע שרייב "אין" און "און" מער ריכטיג. "אין" איז אזוי ווי אין ענגליש "in". "און" איז אזוי ווי אין ענגליש "and".

yatzmachp האט געשריבן:אלפא, אלעס וואס דו שרייבסט איז ריכטיג און פארשטייט זיך אלעס קען מען מסביר זיין אבער די מציאות גייט זיך נישט טוישן. איין זאך זאלסטו נישט פארגעסן ווען דו שרייבסט אמעריקע, אמעריקע איז ריזיג גרויס און דו האסט סך הכל גוט אראפ געלייגט די ניו־יארקער עיר פארטס און די הייליגע שטאט וויליאמסבורג. גיי ארויס פון וויליאמסבורג און ניו־יארק בכלל קענסטו האבן פארשידענע אנדערע עקספעריענסעס. פאר ווער עס איז שוין ארום געפארן אמעריקע קען מעיד זיין. אבער איין זאך דארף מען דאנקען דעם אייבערשטן אז די וועלט איז פארשידענארטיג. שטעל דיך פאר ווען יעדער איז די זעלבע וואלט די וועלט געווען בארינג, וואלסט נישט געהאט וואס צו שרייבן.

ריכטיג פאר ריכטיג!

yatzmachp האט געשריבן: נ.ב. ביטע שרייב "אין" און "און" מער ריכטיג. "אין" איז אזוי ווי אין ענגליש "in". "און" איז אזוי ווי אין ענגליש "and".

עס איז ווייט פון מוגה דעם ארטיקל (געשריבן געיאגט ווי געשמועסט), איך ווייס פון דעם חילוק, איך פראביר נארמאל אויפצופאסן. אנטשולדיגט אז עס האט דיר נערווירט,
איך האב נארוואס מגיה געווען אביסל, ביטע צייכן מיר צו די איבעריגע און איך וועל עס פארבעסערן.

זייער אינטערסאנט געשריבן און איך בין נישט באליידיגט...

אגב זעהט מען אז דו האסט געשריבן זייער אנגעבלאזן, ווען דו קענסט ווען ארויסברענגען פונקט אזויפיל מעלות וואס ס'איז דא אין אמעריקא, עפעס פאזיטיוו האסטו אריינגעווארפן אויף יוצא צו זיין, אז מ'זאל נישט קענען האבן קיין טענות...

געוויסע זאכן שפיר איך אויך טאקע, למשל די אינפארסטראקטשער אין אמעריקא איז איום ונורא, איינער האט מיר לעצטנס אויפגעמערקט אז אונז צאלן ביטער טייערע טאלס אויף בריקן וואס שטייען שוין פאר צענדליגע יארן, וואס זענען שוין זיבן מאל אויסגעצאלט.

די ראודס שפירן זיך ווי אוקראינישע ראודס, די קאר שפרינגט ארום א גאנצן צייט, נישט אייביג גייט מיר עס אן אבער ווען איך בין אין א שלעכטע גיסטע אדער ווען איך בין הונגעריג קען עס מיר צוטרעטן צו די נערוון... היינט אויף א געוויסע ראוד האב איך פרובירט צו כאפן אויב עפעס גייט פאר מיט די ראוד אדער איך האב א פלעט טייער...

בנוגע די טייערע פרייזן, האסטו א פוינט פון די אנדערע זייט הערשט דא אין אמעריקא א מוראדיגע ברייטקייט, אזא רחבות, קען זיין ס'האט מיט די אונגערישע פאמיליע ווי איך בין אויפגעוואקסן, די היימישע אונגארישע קאמיוניטיס, איך ווייס נישט פארוואס דו קוקסט עס אן ווי א חסרון, איך האב לעצטנס געזעהן א קארטון, וואס מ'זעהט איין קינד פרעגן א צווייטע קינד אויב ביי זיי אין שטוב מאכט מען א פרעיער, א ברכה פארן עסן, האט דער צווייטער געענטפערט, ניין מיין מאמע איז א אונגארישע זי קען קאכן, דארף מען נישט מתפלל זיין פארן אריינעמען די עסן אין מויל...

די חלק פון די עירפארטס איז אויך א שטארקע נקודה, ווען איך שטיי אין עירפארט שפיר איך ווי א קרימינאל, סאך הכול וויל איך פארן ערגעץ, וואס איז די עטיטוד? ווייל איינער האט געוואלט אמאל אויפרייסן א עראפלאן איז שוין יעדער נחשד אויף וועלן אויפרייסן עראפלאנען?

איך קלער צו איך זאל זיך נעמען חוזק מאכן יעצט פון די איזרעיליס און די אייראפעיאישע, אלס נקמה... איך האב שוין באזוכט אין ארץ ישראל פאר א לאנגע צייט און אין לאנדאן און אנטווערפן פאר קורצע באזוכן אבער איך האב געזאגט אנפאנג אז איך האב מיך נישט באליידיגט, סאו איך וועל מיך האלטן דערצו...

דאס איז זיכער אז עטס האטס נישט געהאט טראמפ פאר פרעזידענט, דאס איז א זאך וואס נאר אונז אמעריקאנע זענען זוכה דערצו!

תרמב האט געשריבן:זייער אינטערסאנט געשריבן און איך בין נישט באליידיגט...

אגב זעהט מען אז דו האסט געשריבן זייער אנגעבלאזן, ווען דו קענסט ווען ארויסברענגען פונקט אזויפיל מעלות וואס ס'איז דא אין אמעריקא, עפעס פאזיטיוו האסטו אריינגעווארפן אויף יוצא צו זיין, אז מ'זאל נישט קענען האבן קיין טענות...

קוק אהער, איך האב בעצם א גינסטיגע בליק אויף אמעריקא (מיין טאטע קומט גאר פון דארט... ששש...)
בנוגע מיין יעצטיגע באזיך איז עס געווען אן ענליכע בחינה ווי דיין שלעכטע גיסטע אויפן הייוועי. איך האב אנגעפאנגען אין JFK מיט א שלעכטן פיס און געענדיגט מיט אן ערגערן, איז דאך נישט מער ווי בארעכטיגט אהיים צוקומען און נעמען די פעדער מיט די רויטע טינט...

בנוגע די טייערע פרייזן, האסטו א פוינט פון די אנדערע זייט הערשט דא אין אמעריקא א מוראדיגע ברייטקייט, אזא רחבות, קען זיין ס'האט מיט די אונגערישע פאמיליע ווי איך בין אויפגעוואקסן, די היימישע אונגארישע קאמיוניטיס, איך ווייס נישט פארוואס דו קוקסט עס אן ווי א חסרון, איך האב לעצטנס געזעהן א קארטון, וואס מ'זעהט איין קינד פרעגן א צווייטע קינד אויב ביי זיי אין שטוב מאכט מען א פרעיער, א ברכה פארן עסן, האט דער צווייטער געענטפערט, ניין מיין מאמע איז א אונגארישע זי קען קאכן, דארף מען נישט מתפלל זיין פארן אריינעמען די עסן אין מויל...

רחבות, עס איז אין א וועג טאקע א מעלה, אבער נישט פאר א סאסייעטי ווי די 'אידן אין אמעריקא' וואס שטופט סיסטעמאטיש ארויף סטאנדארטן און ברענגט מער לעכער אין טאש ווי צופרידענהייט (פאר דער אין אמעריקא וואס איז בכלל אינטרעסירט דערין...)
און בעיקר האב איך טאקע געמיינט אוועקצומאכן די סיסטעמאטישקייט דארט וועלכע קומט במקצת אלס רעזולטאט פון די רחבות..

דאס איז זיכער אז עטס האטס נישט געהאט טראמפ פאר פרעזידענט, דאס איז א זאך וואס נאר אונז אמעריקאנע זענען זוכה דערצו!

טראמפ פאר פרעזידענט האבן מיר אלע געהאט! בפרט כל זמן קול מבשר איז די הויפט נייעס קוואל.. דאס אז ניו יארק איז נענטער קיין וואשינגטאן אדער די פאקט אז נאר דארט קען מען שטומען מיינט נישט אז די דראמא האט זיך נישט צושפרייט איבעראל...

איך קלער צו איך זאל זיך נעמען חוזק מאכן יעצט פון די איזרעיליס און די אייראפעיאישע, אלס נקמה... איך האב שוין באזוכט אין ארץ ישראל פאר א לאנגע צייט און אין לאנדאן און אנטווערפן פאר קורצע באזוכן אבער איך האב געזאגט אנפאנג אז איך האב מיך נישט באליידיגט, סאו איך וועל מיך האלטן דערצו...

אדרבה, ברענג אהער גוטע סחורה אויף יוראפ!

זיי נישט ברוגז, אבער פון דיין גאנצן ארטיקל זעט מען אז סך הכל ביסטו א שטאלצע אייראפעישע וואס האלט עולמות פון די אזויגערופענע ''קוואלעטי אףף לייף'' פון אייראפע.

אייראפע האט טאקע א געוויסע קלאסישקייט, אבער גארנישט מער פון דעם. נישט קיין נאמאלערע צופרידענע מענטשן, און מ'קען מיינען ווי שיין די ראוידס זענען ביי ענק.

אין אייראפע קען יעדער איינער בלאזן אויף דיר, קארג און סעלפיש נעקסט לעוועל, אבער אז ס'איז דא א שענערע ערפארט ווי jfk דעמאלטס מיינט אז אייראפע על הגובה.

די אראפעישע האלטן זיך פאר אפענערע און ברייטערע מענטשן, בו בזמן ווען זיי זענען שמייליג ווען ס'קומט צו זייער פלאץ. רוב אמעריקאנע אויב דו גייסט זיי פארקויפן די לאקש אז די העלטקעיר סיסטעם איז בעסער דארט, גייען זיי אפשר דיך גלייבן, און אפשר אפילו ווערן אנטציקט פון די סיסטעם. משא''כ אין יוראפ זענען זיי פארגלייבט אז אנז האבן די 'בעסטע' - נישט ווייניגער! - העלט קעיר, 'בעסטע' וואקעישענ'ס, 'בעסטע' עסן - כאטש וואס ביי די אידן זיכער איז נישטא קיין פערטל רעסטוראנטען ווי אין אמעריקא - און פארשטייט זיך די בעסטע קארן וואס האלב אמעריקא האט סייווי.

איך וואלט מציע געווען פארן פותח האשכול, גיי ארויס פון דיין באקס, ס'איז זייער א גוטע זאך אז די עולם האט קארן, אזוי אויך אלע אנדערע זאכן, נישט אלעס דארף זיין ווי דיר אין אייראפע, מ'ווערט נישט אפגעפרעגט אז מ'קויפט אנדערע ברענדס, ס'געשעט נישט גארנישט אז מספענדט א דאלער מער.

Welcome to USA!

זיך צוריק-טענה'ן האט נישט קיין זון, וויל איך בין נישט אויסן צו באשטעטיגן (אדער לייקענען) דיין הנחה.
איך מיין אבער אז דיין אייגענע תגובה ברענגט ארויס די פאקערטע פון דיין געדאנק. למעשה האלסטו יא אז אמעריקא איז בעסער, נישט אזוי?!

אלס איירופעאישע האלט איך טאקע מער פון די אייראפעאישע קלאסישקייט - אדער קוואליטי ווי איך רוף עס - אבער איך בין קלאר ביי די מיינונג אז עס איז נישט פאר די געהירן פון שטאלצע אמעריקאנער וועלכע זענען דאס באמת נישט מחשיב און האבן אנדערע קולטוארע טעיסט-באדס, און אז עס איז נישט איינס בעסער אביעקטיוו פונעם צווייטן!

גאר שטארק הנאה געהאט פון דיין באשרייבונג רב אלפא, עס איז גוט צו הערן אז אסאך פון די זאכן וואס זענען אזוי שטארק א חלק פו מיין לעבן איז נישט מחויב המציאות עס קען זיין אנדערש אויך, איך קען קאנעקטן צו אסאך נקודות וואס דו האסט געשריבען, איינער פון זיי איז "די געלט גייציגקייט איז א סורווייוועל מעקעניזם", קען זיין דו האסט געמיינט עפעס טיפער אבער איך שפיר עס אויף די ביינער, א גאנצן טאג איז מען להוט נאכן דאלאר אבער נישט ווייל איך וויל זיין רייך נאר ווייל איך וויל נישט דערטראנקען ווערן, איך וויל בלייבן אויפן וואסער,

בעל אחריות האט געשריבן:גאר שטארק הנאה געהאט פון דיין באשרייבונג רב אלפא, עס איז גוט צו הערן אז אסאך פון די זאכן וואס זענען אזוי שטארק א חלק פו מיין לעבן איז נישט מחויב המציאות עס קען זיין אנדערש אויך,

ייש"כ.
אויב איז עס טאקע די ערשטע מאל וואס דו/איינער אנערקענט עס האט זיך עס טאקע געלוינט!

איך האב אלס בחור געלערנט א שטיק צייט אין אן אמעריקאנער ישיבה, עס האט געהאט זייער אסאך גוטע זייטן דערצו, די איין זאך אבער וואס איך האב נישט געקענט דערליידן איז די שטאלצקייט (גאוה בלע"ז) פון די עולם דארט, כמעט יעדער נארמאלער בחור האט אנגעקוקט אלס הנחה פשוטה אז אמעריקע איז די סאמע בעסטע פלאץ אויפן כדור הארץ סיי אלס די לעבנס קוואליטעט און סיי מיט די זייטיגע בענעפיטן ברוח ובגשם. וועלכע קען אפי' זיין אמת במקצת (בפרט פאר א געבוירענע דארט ווי געשמועסט), אבער די פארמאכטקייט און נאאיווקייט דערפין איז וואס האט מיר געשטערט.
זיי פלעגן אלס חוזק מאכן פון די יוראפעיער וועלכע האבן קליינע השגות אין אסאך הינזיכטן, אבער וואס איז שנעל געשען (און געשעט מיט כמעט יעדער יוראפעיער ערגעץ דורכאויס זיין לעבן) אז מ'זעט איין ווי די וועלט איז אביסל ברייטער ווי מיין היים לאנד, עס זענען דא פארשידנארטיגע קולטורן און קאלירפולע השגות. בעת וואס די אמעריקאנער זייענדיג אין (טאקע גרעסערן) קעסטל זענען בדרך כלל געבליבן דארט, ניטאמאל מתוך עגאאיזם, איך קוק עס אן מער אלס די טרייבקראפט נאך געלט און סוקסעס וואס הערשט דארט וועלכע בלאקירט די קאנאלן צום ברייטערן וואסער...

דאס איז א חלק פון מיין כונה ארגינעל מיט דעם באשרייבונג דא.

זע איך אז דער סאציאלאגיסט דעטאקוויל האט מיר שוין אויסגעכאפט מיטן אבזערווירן און אנאלאזירן אמעריקאנער.
בתוך הדברים האט ער אויפגעמערקט וויאזוי געלט איז דארטן אלעס, און וויאזוי מ'נוצט ווייניגער די אייגענע קאפ אין אמעריקע - נאכן זיין צו פארגלייבט אינעם סיסטעם..

איך קען נישט מער ווי געבן גערעכט פאר דיין ארטיקל, וועלכע איז, אגב, הערליך שיין און צוקער זיס...

נאר כדאי צו וויסן אז JFK איז שוין יארן גערעיטעד אלס איינע פון די 10 ערגסטע עירפארטס פון די וועלט בכלליות, בנוסף צו דעם קומט צו די עקלהאפטיגע התנהגות פון די TSA, ווי תרמב שרייבט שוין, יעדער איז דארט חשוד פאר אלעם ערגסטן ביז דו ווייזט אויף אז נישט... עה, נע, אפילו דעמאלס אויך נישט... אפילו נאר אנקומענדיג מיט די קאר צום פארקינג לאט, באגעגנט מען א ריזיגע צאל נערוועזע און גערעגטע פאליציאנטן וואס האבן שוין לאנג פארגעסן ווי אזוי מען רעדט שטיל, קולי קולות איז די נארם. דער פאסאנזשיר שפירט ממש ווי לעבן א תפיסה.

איטס נאט יור פאטהערס אמעריטשקע...

אלפא האט געשריבן: ↑דאנערשטאג אוגוסט 31, 2023 4:57 am

בעל אחריות האט געשריבן:גאר שטארק הנאה געהאט פון דיין באשרייבונג רב אלפא, עס איז גוט צו הערן אז אסאך פון די זאכן וואס זענען אזוי שטארק א חלק פו מיין לעבן איז נישט מחויב המציאות עס קען זיין אנדערש אויך,

ייש"כ.
אויב איז עס טאקע די ערשטע מאל וואס דו/איינער אנערקענט עס האט זיך עס טאקע געלוינט!

איך האב אלס בחור געלערנט א שטיק צייט אין אן אמעריקאנער ישיבה, עס האט געהאט זייער אסאך גוטע זייטן דערצו, די איין זאך אבער וואס איך האב נישט געקענט דערליידן איז די שטאלצקייט (גאוה בלע"ז) פון די עולם דארט, כמעט יעדער נארמאלער בחור האט אנגעקוקט אלס הנחה פשוטה אז אמעריקע איז די סאמע בעסטע פלאץ אויפן כדור הארץ סיי אלס די לעבנס קוואליטעט און סיי מיט די זייטיגע בענעפיטן ברוח ובגשם. וועלכע קען אפי' זיין אמת במקצת (בפרט פאר א געבוירענע דארט ווי געשמועסט), אבער די פארמאכטקייט און נאאיווקייט דערפין איז וואס האט מיר געשטערט.
זיי פלעגן אלס חוזק מאכן פון די יוראפעיער וועלכע האבן קליינע השגות אין אסאך הינזיכטן, אבער וואס איז שנעל געשען (און געשעט מיט כמעט יעדער יוראפעיער ערגעץ דורכאויס זיין לעבן) אז מ'זעט איין ווי די וועלט איז אביסל ברייטער ווי מיין היים לאנד, עס זענען דא פארשידנארטיגע קולטורן און קאלירפולע השגות. בעת וואס די אמעריקאנער זייענדיג אין (טאקע גרעסערן) קעסטל זענען בדרך כלל געבליבן דארט, ניטאמאל מתוך עגאאיזם, איך קוק עס אן מער אלס די טרייבקראפט נאך געלט און סוקסעס וואס הערשט דארט וועלכע בלאקירט די קאנאלן צום ברייטערן וואסער...

דאס איז א חלק פון מיין כונה ארגינעל מיט דעם באשרייבונג דא.

אלפא זייער א שיינע ארטיקל , איך זעה נישט פארוואס דו פארפירסט אזוי וועגן די אמעריקאנע גאוה איך מיין דו מאכסט א טעות מיט דעם ביי יודן זיכער איך האב קיינמאל נישט געזעהן די אמעריקאנע יודן זענען שטאלטץ מיט זייער לאנד בכלל נישט, פארקערט איך האב געלערענט אין ארץ ישראל אלטס בחור און געהאט אסאך ענגלישע בחורים חברים און זיי זענען אלע געווען ביזי מיט די עגלישע אלעס און גערעדט מיט סך מער גאוה און שטאלץ וועגן ענגלאנד

איך קלער שוין פון לאנג, ס'איז דא פלעצער ווי ס'איז אלטץ דא העיט, עיריפארט, סיטי האל, נעטינאל גראד, ווי אויך ביי אידן, למשל גדר/משומר, אריינשרייבן אין די מוסדות, קהל אָפיס, מצה בעקעריי, טשאפל, וואס ווען מען גייט אריין פילט מען אז גלייך אזא קאנפליקט און אינטרעס, געווענליך איז עס פלעצער ווי זיי האלטן אז די דארפסט ממילא אנקומען צו זיי, זענען אלע מענטשן שלעכט נאר זיי מאכן א שיינע פנים ווייל די מוזט צוקומען צו זיי, אדער ביי די פלעצער ארבעטן שלעכטע מענטשן,?

די ווארטן און jfk איז געפערליך אסאך מאל גייען די אויסלענדישע לעינס אסאך שנעלער פון די בירגער לעין אבער מ'קען דאנלאדען די passport moble app און מיט דעם איז מען אידרויסען ביז 5 10 מינוט

דיין אנאליז איז בעצם אויף ניו יארק. נישט אויף אמעריקע בכלל . ווען די קומסט למשל אן צו אן עירפאר אין דרום אמעריקע וואלט עס מסתם געווען גאנץ א אנדערע עקספיריעס.

ניו יארק איז באקאנט פאר א ווילדע שטאט . מיט אירע מעלות און חסרונות. אבער דאס איז ניו יארק . נישט אמעריקע.

די צפון מזרח סטעיטס זענען היבש ענדליך איינע צום צווייטען . אבער ווען די גייסט צו אנדערע עקען פון אמעריקע איז עס א אנדערע מענטאליטעט .