וואס איז נייעס?

[ברסלבער]

[justify]נייעס איז א זאך וואס יעדער האט ליב צו ליינען, הערן, און זעהן. איינער מער און איינער ווייניגער, איינער מוז באקומען כסדר'דיג אפדעיטס פון די נייעס יעדער מינוט, א צווייטער דארף בלויז הערן צוויי מאל א טאג קול מבשר בוקר וערב, פאר א דריטן איז גענוג די נייעס וואס ער הערט צופרי אין מקוה, און אנדערע באגענוגען זיך מיט איינמאל סוף וואך צו ליינען אין צייטונג וואס ער האט פארפאסט די גאנצע וואך.
טרעפסט א חבר אויפן גאס איז געווענליך די ערשטע פראגע: וואס איז נייעס?
הצד השווה אז יעדער האט ליב נייעס, אבער דאס איז טאקע נאר ווען עס איז טאקע נייעס, אויב איז עס שוין אביסל עלטערע נייעס איז עס שוין בכלל נישט אינטערעסאנט. דאס איז אויך יעדער לפום דרגא דיליה, ביי איינעם איז עס שוין אלט א טאג שפעטער און ביי איינעם א וואך שפעטער.

וואס ליגט אונטער דעם? וואס מאכט מענטשן אזוי שטארק ליב האבן נייעס? דאס איז די טבע וואס דער אייבערשטער האט אריינגעשטעלט אין מענטשן. אבער ווען מען טראכט אריין, איז די טבע א געוואלדיגע חסד פאר אונז.
רוב דורכפעלער וואס מענטשן האבן אין לעבן, רוב מאל וואס מענטשן געבן אויף און מאכן אפ אז זיי וועלן שוין נישט מצליח זיין, סיי ווען דאס איז אין רוחניות'דיגע זאכן און סיי אין גשמיות, איז דאס געבויעט אויפן עבר, מען פרובירט איינמאל און נאכאמאל און א דריטע מאל, און ווען מען זעהט אז עס גייט נישט, געבט מען אינגאנצן אויף.
אבער ווען א מענטש האט די שטארקייט און ער געבט נישט אויף פאר קיין געלט אין די וועלט, ער וועט ווייטער פרובירן נאכאמאל און נאכאמאל, און אויב עס גייט נישט אויף איין וועג וועט ער פרובירן אנדערע וועגן, אבער ער וועט נישט אויפגעהויבן זיין רצון און ווילן צו מצליח זיין, דאן וועט ער זיכער צום סוף מצליח זיין.
מען קען דאס אסאך צוריק הערן פון מענטשן וואס האבן מצליח געווען, סיי מצליח געווען בגשמיות מיט געלט וכדו' און סיי גדולי ישראל וואס האבן מצליח געווען ברוחניות, ווען מען הערט צוריק זייער היסטאריע שטעלט זיך ארויס אז די הויפט סיבות פון זייער הצלחה איז געווען אז זיי האבן קיינמאל נישט אויפגעגעבן, זיי האבן זיך טאקע געמוטשעט קודם איינער מער און איינער ווייניגער, אבער מיט זייערע אייזענע רצונות האבן זיי דורכגעבראכן די שווערסטע מויערן. וויפיל מאל זיי זענען אראפ געפאלן און זיך אויסגעגליטשט האבן זיי זיך אייביג צוריק אויפגעהויבן און פרובירט נאכאאמל, און דאס איז געווען די סוד פון זייער הצלחה.

עס זאגט זיך זייער לייכט, אבער עס איז זייער שווער אויסצופירן למעשה. די דורכפעלער פונעם עבר דערקוטשענען און שטערן זייער שטארק צו קענען ווייטער אנגיין און זיך קאנצעטרירן אויפן עתיד.
און דערפאר האט דער אייבערשטער אריינגעלייגט אין די טבע אז מען האט ליב נייעס, אבער טאקע נאר נייעס. אביסל אלט, איז שוין נישט אינטערעסאנט, און דאס דארף מען אויסנוצן צום גוטן, פארגעסן פונעם עבר און זיך אריינלייגן בלויז אין נייעס, עס איז יעדע מינוט א נייע וועלט, עס איז נישט קיין חילוק וואס עס איז געשעהן נעכטן, היינט איז א נייע טאג און איך וועל פרובירן כאטש היינט מצליח צו זיין.

מיר זאגן יעדן טאג ביים דאווענען "המחדש בטובו בכל יום תמיד מעשי בראשית", דער אייבערשטער באנייעט יעדן טאג די וועלט פון פריש. לכאורה צו וואס פעלט דאס אויס? פארוואס האט דער אייבערשטער נישט געקענט באשאפן איינמאל די וועלט און עס אנשטעלן אז עס זאל ווייטער אליין פארן יעדן טאג? נאר דאס קומט ער אונז ווייזן, יעדן טאג איז א נייע יצירה, עס האט גארנישט מיט נעכטן, אז דו האסט נעכטן נישט מצליח געווען, פרוביר היינט, אפשר וועט עס היינט גיין.
אפשר איז היינט דיין גליקליכער מזל'דיגע טאג? און אויב דו וועסט פונקט היינט אויפגעבן און בלייבן זיצן מיט פארלייגטע הענט, וועסטו פארפאסן דיין ישועה!

סור מרע – הער שוין אויף צו קוקן אויף די שלעכטע דורכפעלער. ועשה טוב - לייג דיך אריין צו אויפטוהן עפעס גוטס אויף די וועלט.
בהצלחה![/justify]

[רויטע וואנצעס]

כתבתי במקו"א א ענדליכע בחינה
viewtopic.php?p=153538#p153538

[שמעקעדיג]

און איך האב געשריבן דערוועגן (לטוב ולרע) דא:
viewtopic.php?p=106381#p106381

[ברסלבער]

א פחד. איך האב גארנישט געוואוסט ווי אויסגעדראשן מיין נייעס איז, יעדער האט שוין גערעדט פון דעם...
אבער איך מיין אז מקום הניחו לי להתגדר, איך ברענג ארויס א פינטל וואס די אנדערע האבן נישט געשריבן.

[שמעקעדיג]

דיין פינטל איז נאך שטארקער ווי אלע אנדערע, יענץ איז שוין אלטע נייעס, דיינס איז פרישע!..
צום (פינטל) נייעס, דו ברענגסט ארויס דיין פרישע נקודה - כדרכך בקודש - זייער שיין און קלאר פול מיט חיזוק, עכ"פ איך האב זיך זיכער מחי' געווען דערמיט, און כ'בין זיכער נישט דער איינציגסטער.