קאווע שטיבל

אפאר חדשים צוריק ווען איך האב מיך איינגעשריבן אין קאווע שטיבל און מיך באקענט מיט אירע פארשריפטן, האב איך אויסגעפונען אז איינע פון די תקנות איז אז די ניקס טארן נישט זיין נעמען פון פרויען. יעדער איז וועלקאם צו שרייבן, אבער די ניקס מיזן זיין אדער ניוטראל אדער מענעריש. איך מיז זאגן אז איך בין געווען גאר impressed פון די תקנה. איך געדענק נאך די אלטע בלאגס ווי חסידים פלעגן זיך צוזאם קומען, און ווי אפט זאכליכע שמועסן פלעגן זיך פארוואנדלען צו איין שטיק נארישקייט, אין טייל ווייל די genders פלעגן זיך אדער אריינפארן אדער flirten. אוודאי זענען נישט אלע שמועסן צוגעקומען צו די סארט נארישקייט, אבער gender איז זיכער געווען אן issue אין דערנידערן די קוואליטעט פון גענוג און נאך שמועסן. דערפאר האב איך געפילט אז נישט ערלויבן פרויערישע נעמען קען שטארק העלפן צו די objectivity און intellectual honesty אין די שמועסן דא.

גאנץ אנדערש אבער האלט איך פון די תקנה פון פארווישן פרויען'ס פנימער.

איך האב נאך נישט געוואוסט דעמאלס (איך האב דאס אייגענטלעך נאר אויסגעפונען נעכטן) אז מ'האט דא געמאכט אן אנקעטע איבער יא אדער נישט ערלויבן בילדער פון פרויען. עס וואלט מיר קיינמאל נישט בייגעפאלן אז אזא אינטעליגענטע גרופע ווי די וואס געפונען זיך דא זאל פאר א רגע נעמען אין באטראכט דאס נישט ערלויבן בילדער פון פרויען. איז דען דא אפילו איין מענטש דא וואס קוקט נישט אויף אנדערע סייטס? און איז דען נישט דא בילדער פון פרויען אויף יעדע סייט? און פון וואו נעמט זיך די גאנצע משוגעס פון מעקן פרויען'ס פנימער עניוועי? דאס איז א נייע מאדע, אויפגעטראכט אין די לעצטע generation.

לעצטנס האט מען דא חוזק געמאכט פון invitations וואס רעכענען נישט אויס נעמען פון באבעס. אבער די פארמעקן פון נעמען איז א דירעקט תוצאה פון מעקן פנימער. גארנישט שטעלט זיך נישט אפ. מיר מיזן אלץ גיין ווייטער און אלץ ווערן פרומער. איך וואלט געהאפט אז כאטש דא אין קאווע שטיבל וואלט מען געווען קלוגער פון די אומטראכטענדיגע קעלבלעך וואס supporten אזעלכע תקנות.